ବ୍ରହ୍ମପୁର: ଗଞ୍ଜାମ ଜିଲ୍ଲା ବ୍ରହ୍ମପୁର ସହରର ସର୍ବାଙ୍ଗୀନ ବିକାଶ ପାଇଁ ମୋଟ ୩୮୯ କୋଟି ଟଙ୍କାର ବଜେଟକୁ ପ୍ରସ୍ତୁତ କରିଛି ବ୍ରହ୍ମପୁର ମହାନଗର ନିଗମ । ସହରର ଉନ୍ନୟନମୂଳକ କାର୍ଯ୍ୟ ପାଇଁ ଚଳିତ ୨୦୨୧ ଓ ୨୦୨୨ ବର୍ଷ ନିମନ୍ତେ ଏଭଳି ବଜେଟ୍ ଉପସ୍ଥାପନା କରିଛି ନିଗମ ।
ଗଞ୍ଜାମ ଜିଲ୍ଲାପାଳ ତଥା ନିଗମର ପ୍ରଶାସକ ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ସହରର ଅନେକ ଲୋକାଭିମୁଖୀ କାର୍ଯ୍ୟ କରିବା ପାଇଁ ଏହି ବଜେଟରେ ରଖାଯାଇଛି ଅନେକ ବ୍ୟବସ୍ଥା । ଯାହାକି ସହରକୁ ସର୍ବାଙ୍ଗୀନ ବିକାଶ ପାଇଁ ଅନେକ ଫଳପ୍ରଦ ହୋଇପାରିବ । ଏହି ବଜେଟରେ ମୁଖ୍ୟତଃ ସହରର ବିଭିନ୍ନ ପୋଖରୀର ପୁନରୁଦ୍ଧାର, ରାସ୍ତା, ନାଳନର୍ଦ୍ଦମାର ମରାମତି ଓ ବିଭିନ୍ନ ସୌନ୍ଦର୍ଯ୍ୟକରଣ କାର୍ଯ୍ୟକୁ ଗୁରୁତ୍ୱ ଦିଆଯାଇଥିବା କୁହାଯାଇଛି । ଏପରିକି ବଜେଟକୁ ଅନୁମୋଦନ କରାଯିବା ପୂର୍ବରୁ ଏନେଇ ନିର୍ବାଚିତ ପ୍ରତିନିଧିମାନଙ୍କ ଠାରୁ ଆରମ୍ଭ କରି ଜନସାଧାରଣଙ୍କ ମତାମତ ନିଆଯାଇଥିବା କୁହାଯାଇଛି ।
ଏପରିକି ସହରବାସୀଙ୍କ ପାଇଁ ବ୍ରହ୍ମପୁରର ସ୍ମାର୍ଟ ରୋଡ, ପ୍ଲାନେଟୋରିୟମ, ସାଇନ୍ସ ପାର୍କ, ସହର ପ୍ରବେଶ ପଥରେ ଫାଟକ, ୱାଟର ବଡି କ୍ଲିନିଙ୍ଗ ମେସିନ, ଆଧୁନିକ ଜିମ୍ନାସିୟମ, ଫୁଡ୍ କୋର୍ଟ, ମାର୍କେଟ କମ୍ପ୍ଲେକ୍ସ, ମେଗା ଡ୍ରେନ ଭଳି କାର୍ଯ୍ୟ ହାତକୁ ନିଆଯିବ । ଯାହାକୁ ସହରବାସୀ ପୂର୍ବରୁ ଚାହିଁ ଆସୁଥିଲେ । ଏହି ବଜେଟ ଅନୁମୋଦନ ବୈଠକରେ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ, ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡା, ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଏବଂ ନିଗମ କମିଶନର ସିଦ୍ଧେଶ୍ୱର ବଳିରାମ ବୋନ୍ଦାରଙ୍କ ସମେତ ବରିଷ୍ଠ ଅଧିକାରୀ ଗଣ ଉପସ୍ଥିତ ଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
