ବାଲେଶ୍ବର: ଫେସବୁକରୁ ଆରମ୍ଭ ହୋଇଥିବା ପ୍ରେମରେ ଧୋକା ମିଳିବା ପରେ ଶେଷରେ ପ୍ରେମିକା ନ୍ୟାୟ ଦାବି କରି ଥାନା ଆଗରେ ଆତ୍ମାହୁତି ଉଦ୍ୟମ କରିଛି । ଏମିତି ଘଟଣା ବାଲେଶ୍ଵର ଜିଲ୍ଲା ସିମୁଳିଆ ଥାନା ପରିସରରେ ଦେଖିବାକୁ ମିଳିଛି ।
ମିଳିଥିବା ସୂଚନା ଅନୁସାରେ, ଭଦ୍ରକ ଜିଲ୍ଲା ଅଗରପଡ଼ା ଅଞ୍ଚଳର ଜଣେ ଯୁବତୀଙ୍କ ସିମୁଳିଆ ଥାନା କୁପୁରା ଅଞ୍ଚଳର ଜସିମ ସାହାଜିଙ୍କ ସହ ଫେସବୁକରେ ପ୍ରେମ ସମ୍ପର୍କ ଗଢି ଉଠିଥିଲା । ପରେ ବିବାହର ପ୍ରତିଶୃତି ଓ ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ଗଢି ଉଠିଥିଲା । ସମୟକ୍ରମେ 2 ଜଣ ବିବାହ ବନ୍ଧନରେ ବାନ୍ଧି ହୋଇ ଚେନ୍ନାଇର ଏକ ହୋଟେଲରେ ରହିଥିଲେ । ଏବେ ଯୁବତୀ ଜଣକ ୫ ମାସର ଗର୍ଭବତୀ ହୋଇଥିବା ବେଳେ ଅଚାନକ ଯୁବକ ଭୁବନେଶ୍ବରରୁ ଯୁବତୀକୁ ଏକୁଟିଆ ଛାଡି ପଳେଇ ଆସିଥିଲେ ।
ଯୁବକ ଜଣକ ଫୋନ କଲେ ଉଠାଉ ନଥିବାରୁ ଯୁବତୀ ଜଣଙ୍କ ଗତ ମାସ ଜୁନ 9 ତାରିଖରେ ସିମୁଳିଆ ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଏକ ମାସ ବିତି ଯାଇଥିଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ନ ନେବା ପରେ ଯୁବତୀ ଜଣଙ୍କ ଥାନା ଆଗରେ କିରୋସିନି ଢାଳି ଆତ୍ମହତ୍ୟା ଉଦ୍ୟମ କରିଥିଲେ । ପୋଲିସ ଯୁବତୀଙ୍କୁ ଆତ୍ମାହୁତିରୁ ନିବୃତ୍ତ କରିବା ସହ ତଦନ୍ତ ଆରମ୍ଭ କରିଥିବା ଜଣାପଡିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
