ଏହି ସମ୍ମିଳନୀରେ ବିଶ୍ୱର ବହୁ ରାଷ୍ଟ୍ରରୁ ବିଶିଷ୍ଟ ବୈଜ୍ଞାନିକମାନେ ସାମିଲ ହୋଇଛନ୍ତି । ସମ୍ମିଳନୀରେ ମିଜାଇଲ ରେଞ୍ଜ ସମ୍ପର୍କିତ ନୂତନ ଜ୍ଞାନକୌଶଳ ବାବଦରେ ଆଲୋଚନା କରାଯିବ । ବିଦେଶ ଏବଂ ଦେଶର ବିଭିନ୍ନ ପ୍ରତିଷ୍ଠାନରୁ ଆସିଥିବା ପ୍ରାୟ 300ରୁ ଉର୍ଦ୍ଧ୍ବ ପ୍ରତିନିଧି ଏଥିରେ ଅଂଶଗ୍ରହଣ କରିଛନ୍ତି ।
କାର୍ଯ୍ୟକ୍ରମ ଆରମ୍ଭରେ ପୁଲୱାମାରେ ଶହୀଦ ହୋଇଥିବା ଯବାନଙ୍କ ଉଦ୍ଦେଶ୍ୟରେ ନିରବ ପ୍ରାର୍ଥନା କରାଯାଇଥିଲା । ଏଥିସହ ବାଲେଶ୍ୱର ଭଳି ଏକ ଜାଗାରେ ବିଶ୍ୱସ୍ତରୀୟ ସମ୍ମିଳନୀ ଆୟୋଜିତ ହୋଇଥିବାରୁ ଆୟୋଜକ ମାନେ ଖୁସି ବ୍ୟକ୍ତ କରିଛନ୍ତି । ଦୀର୍ଘ 30 ବର୍ଷର ଅପେକ୍ଷା ପରେ ଏମିତି ଏକ କାର୍ଯ୍ୟକ୍ରମ ଆୟୋଜନ ହୋଇଛି । ଚାନ୍ଦିପୁର ଆଇଟିଆରର ସାରା ବିଶ୍ୱରେ ସ୍ୱତନ୍ତ୍ର ପରିଚୟ ରହିଛି ବୋଲି ଉପସ୍ଥିତ ଅତିଥିମାନେ ମତବ୍ୟକ୍ତ କରିଥିଲେ । ଏହି ଅବସରରେ ସନ୍ଦର୍ଭ ଓ ପ୍ରଦର୍ଶନୀ ପୁସ୍ତିକା ଉନ୍ମୋଚନ କରାଯାଇଥିଲା ।
ଉଦଘାଟନୀ ଉତ୍ସବରେ ଅନ୍ୟତମ ଅତିଥି ଭାବେ ଡିଆରଡିଓର ପୂର୍ବତନ ଅଧ୍ୟକ୍ଷ ଅବିନାଶ ଚନ୍ଦ୍ର, ଡିଜି (ଏମଏସଏସ) ଏମ.ଏସ.ଆର ପ୍ରସାଦ, ଆଟିଆର ନିର୍ଦ୍ଦେଶକ ଡ. ବିକେ ଦାସ, ସଂଯୋଜିକା ବି. ସୂଚରିତା ପ୍ରମୁଖ ଉପସ୍ଥିତ ଥିଲେ । ବୈଜ୍ଞାନିକ ମିଲନ କୁମାର ପାଲ ମଞ୍ଚ ସଂଚାଳନ କରିଥିଲେ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
