ବାଲେଶ୍ବର: ଖୋଖୋ ଖେଳରେ (Khokho competition) ବାଜି ମାରିଲା ବାଲେଶ୍ବର ଟିମ୍ । ଦମଦାର ପ୍ରଦର୍ଶନ କରି ବିଜୟୀ ମୁକୁଟ ପିନ୍ଧିଛି ବାଲେଶ୍ବର ପୁରୁଷ ଦଳ । ପୁରୁଷ ବର୍ଗରେ କିଟ୍ ଦଳକୁ ହରାଇ ଚମ୍ପିଆନ ହୋଇଛି ବାଲେଶ୍ବର ଟିମ । ସେପଟେ ମହିଳା ବର୍ଗରେ ଦ୍ବିତୀୟ ସ୍ଥାନରେ ଅଛନ୍ତି ମହିଳା ଦଳ । ସଫଳତା ପାଉଁ ଉଭୟ ଦଳକୁ ଛୁଟିଛି ପ୍ରଶଂସାର ସୁଅ ।
୧୨ ତାରିଖରୁ ଅନୁଗୋଳ ଷ୍ଟାଡିୟମରେ ଚାଲିଥିବା ୫୪ ତମ ରାଜ୍ୟସ୍ତରୀୟ ସିନିୟର ଖୋ-ଖୋ ପ୍ରତିଯୋଗିତାର ପୁରୁଷ ବର୍ଗରେ ବାଲେଶ୍ଵର ପୁରୁଷ ଦଳ କିଟ୍ କୁ ହରାଇ ଚମ୍ପିଆନ ହୋଇଛି । ମହିଳା ବର୍ଗରେ ବାଲେଶ୍ଵର ମହିଳା ଦଳ କିଟ୍ ଟିମଠୁ ହାରି ରନର୍ସ ଅପ୍ ହୋଇଛନ୍ତି । ମହିଳା ବର୍ଗରେ କିଟ୍ ମହିଳା ଦଳ ଚାମ୍ପିୟନ ହୋଇଛି । ଉଭୟ ବର୍ଗର ଚାମ୍ପିୟନ ଏବଂ ରନର୍ସ ଅପ୍ ଦଳକୁ ଟ୍ରଫି ସହ ପୁରସ୍କାର ରାଶି ପ୍ରଦାନ କରାଯାଇଛି।
ମହିଳା ବର୍ଗରେ ବାଲେଶ୍ଵରର ପ୍ରିୟଙ୍କା ସିଂହ ଶ୍ରେଷ୍ଠ ଖେଳାଳି ଏବଂ ପୁରୁଷ ବର୍ଗରେ ବାଲେଶ୍ଵରର ଜଗନ୍ନାଥ ମୁର୍ମୁ ଶ୍ରେଷ୍ଠ ଖେଳାଳି ଓ ଲିପୁନ ମୁଖୀ ଶ୍ରେଷ୍ଠ ଚେଜର ବିବେଚିତ ହୋଇଛନ୍ତି । ଏହି ପ୍ରତିଯୋଗିତାରେ ୨୨ଟି ଜିଲ୍ଲା ଅଶଂ ଗ୍ରହଣ କରିଥିଲା । ପୁରୁଷ ବିଭାଗରେ ୨୨ ଦଳର ୩୦୮ ଏବଂ ମହିଳା ବିଭାଗରେ ୧୮ ଦଳରୁ ୨୫୨ ଜଣ ଭାଗ ନେଇଥିଲେ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
