ମୁମ୍ବାଇ: ସୋସିଆଲ ମିଡିଆରେ ପ୍ରଚାରିତ ମିଥ୍ୟା ଖବର ଉପରେ ରୋକ ଲଗାଇବାକୁ ମୁହଁ ଖୋଲିଲା ଆରବିଆଇ । ବନ୍ଦ ହେବନି କୌଣସି ବ୍ୟାଙ୍କ । ଏ ନେଇ ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ସ୍ପଷ୍ଟ କରାଯାଇଛି ।
ପ୍ରକାଶ ଥାଉ ଯେ, ଆରବିଆଇ 9 ବାଣିଜ୍ୟିକ ବ୍ୟାଙ୍କ ବନ୍ଦ କରିବାକୁ ଯାଉଥିବା ନେଇ ଗତ କିଛି ଦିନ ଧରି ବହୁ ସୋସିଆଲ ମିଡିଆ ସାଇଟରେ ପ୍ରଚାର ହେଉଥିଲା । ଏହାକୁ ଖଣ୍ଡନ କରି ଆରବିଆଇ ସହ ଅର୍ଥ ସଚିବ ଏକ ସ୍ପଷ୍ଟିକରଣ ଦେଇଛନ୍ତି ।
ଅର୍ଥ ସଚିବ ରାଜୀବ କୁମାର ସୋସିଆଲ ମିଡିଆରେ ଚାଲିଥିବା ଏହି ଖବରକୁ ଏକ ଗୁଜବ ଦର୍ଶାଇ କହିଛନ୍ତି ଯେ, ‘ସରକାର ସାର୍ବଜନୀନ ବ୍ୟାଙ୍କଗୁଡିକୁ ଟଙ୍କା ଯୋଗାଇଦେଇ ମଜବୁତ କରିବାକୁ ଯୋଜନା କରୁଛନ୍ତି, ଯେପରି ଗ୍ରାହକଙ୍କୁ ଆହୁରି ଭଲ ଭାବେ ସେବା ମିଳିବ । ଏଣୁ ଏସବୁ ବ୍ୟାଙ୍କ ବନ୍ଦ ନେଇ କୌଣସି ପ୍ରଶ୍ନ ମଧ୍ୟ ଉଠୁନି ।’
