ନୂଆଦିଲ୍ଲୀ: ଲଗାତାର ମାନ୍ଦା ପରେ ବଢିଲା ସେୟାର ସୂଚକାଙ୍କ । ସପ୍ତାହର ପ୍ରଥମ ଦିନରୁ ପ୍ରଫିଟରେ କାରବାର । ସୋମବାର ସକାଳୁ ସେନସେକ୍ସ 39 ହଜାର 600 ପାର କରିଛି । ସେପଟେ ନିଫ୍ଟି ମଧ୍ୟ ଭଲ ପ୍ରଦର୍ଶନ କରି 11, 860କୁ ଛୁଇଁଛି ।
ଏସିଆ ବଜାରରେ ଅଭିବୃଦ୍ଧି ଓ ବୈଷୟିକ ସ୍ତରରେ ସକରାତ୍ମକ ପ୍ରଭାବ ଭାରତୀୟ ସେୟାର ବଜାର ଉପରେ ପଡିଛି । ଏଥିଯୋଗୁଁ ସେୟାର ରେଖା ଉପରମୁହାଁ ହେଉଛି । ଯେଉଁଥିପାଇଁ ନିବେଶକ ମଧ୍ୟ ଅଧିକ ଟଙ୍କା ଲଗାଇବାକୁ ଉତ୍ସାହିତ ଅଛନ୍ତି ।
ସୋମବାର ବମ୍ବେ ଷ୍ଟକ ଏକ୍ସଚେଞ୍ଜର (ବିଏସଇ) 30 ସେୟାର ଉପରେ ଆଧାରିତ ସୂଚକାଙ୍କ ସେନସେକ୍ସ 200 ପଏଣ୍ଟ ବଢି 39,600କୁ ଡେଇଁଛି । ସେହିପରି ନ୍ୟାସନାଲ ଷ୍ଟକ ଏକ୍ସଚେଞ୍ଜ (ଏନଏସଇ)ର 30 ସେୟାର ଉପରେ ଆଧାରିତ ସୂଚକାଙ୍କ ନିଫ୍ଟି 70 ପଏଣ୍ଟ ବୃଦ୍ଧି ପାଇ 11,860ରେ କାରବାର କରୁଛି।
ତେବେ ଆଗକୁ ବଜେଟ ଆସୁଥିବାରୁ ଆଶା- ଆଶଙ୍କା ଜାରି ରହିଛି । ନୂଆ ଅର୍ଥମନ୍ତ୍ରୀଙ୍କ ଅଧିନରେ ପ୍ରଥମ ବଜେଟରେ କେଉଁ ସବୁ ଆର୍ଥିକ ଦିଗ ପାଇଁ ବ୍ୟୟବରାଦ ହେବ । ସେ ଉପରେ ରହିଛି ନିବେଶକଙ୍କ ଫୋକସ । ସେହିପରି ଆମେରିକା ଓ ଚୀନ ମଧ୍ୟରେ ଚାଲିଥିବା ଟ୍ରେଡୱାରରେ ବ୍ରେକ ଲାଗିବା ସଙ୍କେତ ପ୍ରଭାବ ମଧ୍ୟ ବଜାର ଉପରେ ପଡିବ ।
