ନୂଆଦିଲ୍ଲୀ: ଟଳମଳ ଭାରତୀୟ ଅର୍ଥବ୍ୟବସ୍ଥା । ସ୍ଥିତି ସୁଧରିବ କି ନାହିଁ ସେ ନେଇ କୌଣସି ପ୍ରମାଣ ନାହିଁ । ନୋବେଲ ଜିତିବା ପରେ ଭାରତୀୟ ବଂଶୋଦ୍ଭବ ଅଭିଜିତ ବାନାର୍ଜୀ ଦେଶ ଅର୍ଥନୀତି ପାଇଁ ଚିନ୍ତା ଦର୍ଶାଇ ଏନେଇ ପ୍ରତିକ୍ରିୟା ଦେଇଛନ୍ତି ।
ଏକ ପ୍ରମୁଖ ଗଣାମାଧ୍ୟମକୁ ସାକ୍ଷାତକାର ଦେଇ ସେ ମତ ଦେଇଛନ୍ତି ଯେ, ‘ଅର୍ଥବ୍ୟବସ୍ଥା ଅସ୍ଥିର ହୋଇପଡିଛି । ବର୍ତ୍ତମାନ ତଥ୍ୟକୁ ଦେଖିବାକୁ ଗଲେ ଆଗାମୀ ଭବିଷ୍ୟତର ଭରସା ପାଉନି । ଗତ 5ରୁ 6 ବର୍ଷ ମଧ୍ୟରେ ଅର୍ଥନୀତି ଗତିଶୀଳ ନେଇ କିଛିଟା ଆଶ୍ବସ୍ତି ମିଳିଥିଲା। ହେଲେ ଏବେ ଆଉ ନାହିଁ । ଏଣୁ ନୀତି ତିଆରି ପୂର୍ବରୁ ସରକାରଙ୍କୁ ଏହାର ମୂଲ୍ୟାଙ୍କନ କରିବା ଦରକାର । ଏହାକୁ ବୁଝିବା ଆବଶ୍ୟକ । ଏବେ ବି ଲାଗୁ ଥିବା ନୀତିକୁ ଠିକ ଢଙ୍ଗରେ ପରଖାଯାଇନି । ଏସବୁକୁ କେବଳ ଏକ ବିକଳ୍ପ ଭାବେ ବ୍ୟବହାର କରାଯାଉଛି।’
ବିତର୍କର ବିଷୟ ଯେ, ନିକଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ମଧ୍ୟ ଜିଏସଟିରେ ତ୍ରୁଟି ରହିଥିବା ନେଇ ମାନିଛନ୍ତି। ଏହା ଯୋଗୁଁ ସମସ୍ୟା ହେଉଛି , ହେଲେ ଏନେଇ ସେ କିଛି କରିପାରିବେ ନାହିଁ , ଏହା ଦେଶର ଆଇନ ବୋଲି କହି ସେ ହାତ ଯୋଡିଦେଇଥିଲେ। ଏପଟେ ଅଭିଜିତ ମଧ୍ୟ ସମାନ ଭାବେ ସରକାରଙ୍କ ନୀତି ଉପରେ ପ୍ରଶ୍ନ କରିଛନ୍ତି।
