ନୂଆଦିଲ୍ଲୀ: ଆୟକର ବିଭାଗ 1 ସପ୍ତାହରେ 10.2 ଲକ୍ଷ କରଦାତାଙ୍କୁ ମୋଟ 4,250 କୋଟି ଟଙ୍କା ରିଫଣ୍ଡ ଜାରି କରିଛି । ବୁଧବାର କେନ୍ଦ୍ରୀୟ ପ୍ରତ୍ୟକ୍ଷ ବୋର୍ଡ(ସିବିଡିଟି) ଏନେଇ ସୂଚନା ଦେଇଛି ।
ଗତ ସପ୍ତାହରେ ଅର୍ଥମନ୍ତ୍ରଣାଳୟ କହିଥିଲା ଯେ, ଶୀଘ୍ର ସେ 5 ଲକ୍ଷ କୋଟି ପର୍ଯ୍ୟନ୍ତ କର ରିଫଣ୍ଡ ଜାରି କରିବ । ଏହା ଦ୍ବାରା କୋଭିଡ-19 ସଙ୍କଟରେ ଜୁଝୁଥିବା ପାଖାପାଖି 14 ଲକ୍ଷ ବ୍ୟକ୍ତିଗତ ଓ କାରବାରୀ ଆୟକରଦାତାଙ୍କୁ ଆଶ୍ବସ୍ତି ମିଳିବ ।
ଜଣେ ଅଧିକାରୀ ନିଜ ବିବୃତ୍ତିରେ କହିଛନ୍ତି ଯେ, ସିବିଡିଟି 5ରୁ 7 କାର୍ଯ୍ୟଦିବସରେ ଏହି 10.2 ଲକ୍ଷ ଆୟକରଦାତାଙ୍କ ଆକାଉଣ୍ଟକୁ ଟଙ୍କା ପଠାଇବ ।
ସିବିଡିଟି ହେଉଛି ବ୍ୟକ୍ତିଗତ ଆୟକର ଓ କମ୍ପାନୀ କର ମାମଲା ସହ ଜଡିତ ପ୍ରତ୍ୟକ୍ଷ କର କ୍ଷେତ୍ରରେ ଶୀର୍ଷ ସରକାରୀ ସଂସ୍ଥା । ଗତ ଆର୍ଥିକ ବର୍ଷରେ ସିବିଡିଟି ମୋଟ 1.84 ଲକ୍ଷ କୋଟି ଟଙ୍କା ରିଫଣ୍ଡ ଜାରି କରିଥିଲା ।
ତେବେ ବିଭାଗ ପକ୍ଷରୁ କୁହାଯାଇଛି ଯେ, ପାଖାପାଖି 1.74 ଲକ୍ଷ କ୍ଷେତ୍ରରେ କରଦାତାଙ୍କୁ ପଠାଯାଇଥିବା ଇମେଲର ଜବାବ ଆସିବ ବାକି ରହିଛି ।
