ନୂଆଦିଲ୍ଲୀ: କୋରୋନା ପ୍ରତିହିତ ପାଇଁ ଲଗାଯାଇଥିବା ଲକଡାଉନ ଯୋଗୁଁ ଉଡାଣ ଉପରେ ରୋକ ଲଗାଯାଇଥିଲା । ଏଥିଯୋଗୁଁ ବିମାନ ଶିଳ୍ପ ବିପର୍ଯ୍ୟସ୍ଥ ହୋଇପଡିଛି । ଏଥିମଧ୍ୟରେ ଘରୋଇ ବିମାନ କମ୍ପାନୀ ସ୍ପାଇସଜେଟ ଏହାର କ୍ଷତି ରିପୋର୍ଟ ପ୍ରକାଶ କରିଛି । କୋଭିଡ ଯୋଗୁଁ ଚଳିତ ଆର୍ଥିକ ବର୍ଷର ପ୍ରଥମ ତ୍ରୟମାସ (ଏପ୍ରିଲ-ଜୁନ)ରେ ସ୍ପାଇସଜେଟ 600.5 କୋଟି ଟଙ୍କା ନିଟ କ୍ଷତି ସହିଛି ।
କମ୍ପାନୀ କହିଛି କି, ଗତ ଆର୍ଥିକ ବର୍ଷ ସମାନ ଅବଧିରେ 262.8 କୋଟି ଟଙ୍କା ନିଟ ଲାଭ ମିଳିଥିଲା । ସେହିଭଳି 2020-21 ପ୍ରଥମ ତ୍ରୟମାସରେ କମ୍ପାନୀର ପରିଚାଳନା ଆୟ 521କୋଟି ଟଙ୍କା ରହିଛି । ଯାହାକି ପୂର୍ବ ବର୍ଷ ସମାନ ଅବଧିରେ 3,002.8 କୋଟି ଟଙ୍କା ଥିଲା । ସେହିଭଳି ପରିଚାଳନା ବ୍ୟୟ 1,311.6 କୋଟି ଟଙ୍କା ଥିଲାବେଳେ ଗତ ବର୍ଷ ଏହା 2,886.7 କୋଟି ଟଙ୍କା ଥିଲା ।
ସ୍ପାଇସଜେଟର ଚେୟାରମ୍ୟାନ ଓ ପରିଚାଳନା ନିର୍ଦ୍ଦେଶକ ଅଜୟ ସିଂହ କହିଛନ୍ତି କି ପ୍ରଥମ ତ୍ରୟମାସରେ ଉଡାଣ ସ୍ଥଗିତ ଥିଲା । ଆଉ ମହାମାରୀ କାରଣରୁ ସୃଷ୍ଟି ହୋଇଥିବା ସମସ୍ୟାଗୁଡ଼ିକ ଚାହିଦା ହ୍ରାସ କରିଛି ।
ପ୍ରକାଶ ଯେ, ଚଳିତ ଆର୍ଥିକ ବର୍ଷ ଜୁନ ତ୍ରୟମାସରେ ସ୍ପାଇସଜେଟ ବ୍ୟତୀତ ଇଣ୍ଡିଗୋ ଏୟାରୱେଜର ମଧ୍ୟ କ୍ଷତି ହୋଇଛି । ଏହି ତ୍ରୟମାସରେ କମ୍ପାନୀ 2844.3 କୋଟି ଟଙ୍କା କ୍ଷତି ସହିଛି । ମାର୍ଚ୍ଚ ମାସରେ ଲକଡାଉନ ଯୋଗୁଁ ଉଡାଣ ଉପରେ ରୋକ ଲଗାଯାଇଥିଲା । ଯେଉଁଥିପାଇଁ ବିମାନ କମ୍ପାନୀଙ୍କୁ ପ୍ରବଳ କ୍ଷତି ସହିବାକୁ ପଡିଛି ।
