ନୂଆଦିଲ୍ଲୀ: ଆଜିଠୁ (ମଙ୍ଗଳବାର) ଆରମ୍ଭ ହେଲା ଭାରତୀୟ ରିଜର୍ଭ ବ୍ୟାଙ୍କର ମୁଦ୍ରାନୀତି ସମୀକ୍ଷା ବୈଠକ । ଏହା ନୂଆ ଆର୍ଥିକ ବର୍ଷ(2019-20)ର ପ୍ରଥମ ଦ୍ବିମାସିକ ମୌଦ୍ରିକ ସମୀକ୍ଷା । ଆଶା କରାଯାଉଛି ନିର୍ବାଚନୀ ଘଡିରେ ଜନତାଙ୍କୁ ଆଶ୍ବସ୍ତି ଦେବାକୁ ପୁଣି ହ୍ରାସ ହୋଇପାରେ ରେପୋ ରେଟ ଦର ।
ଆରବିଆଇର 6 ଜଣିଆ ମୁଦ୍ରା ନୀତି କମିଟି ଏ ନେଇ ସମୀକ୍ଷା କରିବେ । ଆଜିଠାରୁ 3 ଦିନ ଧରି ଏହି ବୈଠକ ଚାଲିବ । ଏହା ପରେ ଆସନ୍ତା 4 ତାରିଖରେ କମିଟି ନେଇଥିବା ନିଷ୍ପତ୍ତିକୁ ଘୋଷଣା କରାଯିବ ।
ବୈଷୟିକ ସ୍ତରରେ ଆର୍ଥିକ ସ୍ଥିତିକୁ ନଜରରେ ରଖି ରେପୋ ରେଟ ଦର ନିର୍ଦ୍ଧାରଣ କରାଯିବ । ବିଶେଷଜ୍ଞଙ୍କ କହିବା ଅନୁଯାୟୀ, ବ୍ୟାଙ୍କ ଗୁଡିକର ସ୍ଥିତିକୁ ମଜବୁତ ଓ ଲୋନକୁ ଶସ୍ତା କରିବା ପାଇଁ ରେପୋ ରେଟକୁ 0.25 ବେସିକ ପଏଣ୍ଟ ହ୍ରାସ କରାଯିବ ।
ରେପୋ ରେଟ ଦର, ଏହାକୁ ନଜରରେ ରଖି କେନ୍ଦ୍ରୀୟ ବ୍ୟାଙ୍କ ଦେଶର ସମସ୍ତ ବାଣିଜ୍ୟିକ ବ୍ୟାଙ୍କକୁ ଋଣ ଦେଇଥାଏ । ଯଦି ଏହି ହାର ହ୍ରାସ ହୁଏ ତେବେ ଗ୍ରାହକ (ଋଣ ଗ୍ରହୀତା) ମଧ୍ୟ କମ ସୁଧରେ ଋଣ ନେଇପାରିବେ ।
