ନୂଆଦିଲ୍ଲୀ: ଶୁକ୍ରବାର ଭାରତୀୟ ରିଜର୍ଭ ବ୍ୟାଙ୍କ ରେପୋରେଟ ଦର 40 ବେସିସ ପଏଣ୍ଟ ହ୍ରାସ କରି 4 ପ୍ରତିଶତ କରିଛି । ଆରବିଆଇର ଏହି ପଦକ୍ଷେପକୁ ପ୍ରଂଶସା କରି ଉଦ୍ୟୋଗ ଜଗତ କହିଛି କି, ଏହା ଦ୍ବାରା କ୍ଷୁଦ୍ର ବ୍ୟବସାୟୀଙ୍କୁ ରିଲିଫ ମିଳିବା ସହ ଚାହିଦା ମଧ୍ୟ ବୃଦ୍ଧି ପାଇବ ।
ଉଦ୍ୟୋଗ ଜଗତ କହିଛି ଯେ, କୋରୋନା ଭାଇରସ ମହାମାରୀରେ ଦୁର୍ବଳ ହୋଇପଡିଥିବା ଅର୍ଥବ୍ୟବସ୍ଥାକୁ ବଳ ଦେବା ପାଇଁ ରିଜର୍ଭ ବ୍ୟାଙ୍କ ଓ ସରକାରଙ୍କ ପକ୍ଷରୁ ନିରନ୍ତର ଆଧାରରେ ଆହୁରି ସମର୍ଥନର ଆବଶ୍ୟକତା ଜରୁରୀ ରହିଛି ।
ରେପୋରେଟ ଦର ହ୍ରାସ ସହ ଆରବିଆଇ ଇଏମଆଇ ସ୍ଥଗିତ ଅବଧି ଆହୁରି 3 ମାସ ବଢାଇଛି । ଏଥିସହ ଆରବିଆଇ ବ୍ୟାଙ୍କ ପାଇଁ କର୍ପୋରେଟ ଋଣ ସୀମା ନେଟୱର୍ଥ ବଢାଇ 30 ପ୍ରତିଶତ କରିଛି ।
ସେହିଭଳି ଏସବିଆଇ ଅଧ୍ୟକ୍ଷ ରଜନୀଶ କୁମାର ଶୁକ୍ରବାର ଭିଡିଓ କନଫରେନ୍ସିଂ ମାଧ୍ୟମରେ ଗଣମାଧ୍ୟମକୁ କହିଛନ୍ତି ଯେ, ‘‘ଅର୍ଥବ୍ୟବସ୍ଥାକୁ ଟ୍ରାକକୁ ଆଣିବା ପାଇଁ ସରକାର ଓ ଆରବିଆଇ ପୂରା ପ୍ରୟାସ କରୁଛନ୍ତି । ତେବେ ଉଦ୍ୟୋଗ ଜଗତ ସାମ୍ନା କରୁଥିବା ଚ୍ୟାଲେଞ୍ଜର ମଧ୍ୟ ଚିହ୍ଟଟ କରି ତାହାର ସମାଧାନ ବାଟ କାଢିବା ପାଇଁ ମଧ୍ୟ ରିଜର୍ଭ ବ୍ୟାଙ୍କ ଓ ସରକାର ଉଦ୍ୟମ କରିବା ଜରୁରୀ ।
ଫେଡେରେସନ୍ ଅଫ୍ ଇଣ୍ଡିଆନ୍ ରପ୍ତାନି ସଙ୍ଗଠନ (FIEO) ମଧ୍ୟ ଆରବିଆଇର ସମସ୍ତ ଘୋଷଣାକୁ ସ୍ବାଗତ କରିବା ସହ ଏହା କୋରୋନାରେ ପ୍ରଭାବିତ ରପ୍ତାନୀ ସେକ୍ଟରକୁ ସହଯୋଗ କରିବ ବୋଲି କହିଛି ।
ରପ୍ତାନୀକାରୀଙ୍କ ପାଇଁ ବିଶେଷ ବ୍ୟବସ୍ଥା କରିବା ସହ ରପ୍ତାନୀ ଋଣ (Export credit) ଅବଧି ଏକ ବର୍ଷରୁ 15 ମାସକୁ ବୃଦ୍ଧି କରିଛି ଆରବିଆଇ ।
ଏହି ପଦକ୍ଷେପ ଦ୍ବାରା ରପ୍ତାନୀକାରୀଙ୍କ ପାଖରେ ଅଧିକ ନଗଦ ଉପଲବ୍ଧ ହେବ ବୋଲି ଫିୟୋର ଅଧ୍ୟକ୍ଷ ଶରଦ କୁମାର ସରାଫ କହିଛନ୍ତି ।
ଉଦ୍ୟୋଗ ସଙ୍ଗଠନ CII ର ମହାନିର୍ଦ୍ଦେଶକ ଚନ୍ଦ୍ରଜିତ ବାନାର୍ଜୀ କହିଛନ୍ତି ଯେ ଋଣ କିସ୍ତି ସ୍ଥଗିତ ସୁବିଧା ଅଣ ବ୍ୟାଙ୍କିଙ୍ଗ ଆର୍ଥିକ କମ୍ପାନୀ (ଏନବିଏଫସି)କୁ ବି ଦେବା ପାଇଁ ବିଚାର କରିବା ଦରକାର ।
Assocham ପ୍ରେସିଡେଣ୍ଟ ନିରଞ୍ଜନ ହିରାନନ୍ଦାନୀ କହିଛନ୍ତି କି, ‘‘ ଲକଡାଉନ ଜାରି ପରଠୁ ଲଗାତାର ଆରବିଆଇ ପକ୍ଷରୁ ଗ୍ରହଣ କରାଯାଉଥିବା ପଦକ୍ଷେପ ଘରୋଇ ଉପଭୋଗ ବୃଦ୍ଧି ଓ କୋରୋନା ମାଡରେ ପ୍ରଭାବିତ ସମସ୍ତ କ୍ଷେତ୍ରକୁ ଲିକ୍ୟୁଡିଟି ପହଞ୍ଚାଇବାରେ ସାହାଯ୍ୟ କରିବ ।
ଆରବିଆଇର ପ୍ରୟାସରେ ଚଳିତ ଆର୍ଥିକ ବର୍ଷର ଦ୍ବିତୀୟ ଛଅ ମାସରେ ଅର୍ଥବ୍ୟବସ୍ଥାକୁ ଆଗକୁ ବଢିବାରେ ସହଯୋଗ ମିଳିବ ବୋଲି ନିରଞ୍ଜନ କହିଛନ୍ତି ।
