ନୂଆଦିଲ୍ଲୀ: ଦରବୃଦ୍ଧି ମୋର୍ଚ୍ଚାରେ ମୋଦି ସରକାରଙ୍କୁ ଡବଲ ଝଟକା । ଗୋଟିଏ ପଟେ ଔଦ୍ୟୋଗିକ ଉତ୍ପାଦନ (ଆଇଆଇପି) ଖସିଥିବା ବେଳେ ଅନ୍ୟପଟେ ଖୁଚୁରା ମୁଦ୍ରାସ୍ପୀତି(ସିପିଆଇ) ବଢିଛି । ଶୁକ୍ରବାର କେନ୍ଦ୍ର ପରିସଂଖ୍ୟାନ କାର୍ଯ୍ୟାଳୟ ପକ୍ଷରୁ ଏ ନେଇ ସୂଚନା ଦିଆଯାଇଛି ।
ମେ ରେ ଔଦ୍ୟୋଗିକ ଉତ୍ପାଦନ ହ୍ରାସ ପାଇ 3.1 ପ୍ରତିଶତ ଛୁଇଁଛି । ଯାହାକି ଏପ୍ରିଲରେ 3.4 ପ୍ରତିଶତ ରହିଥିଲା । ସେପଟେ ଜୁନ ମାସରେ ଖୁଚୁରା ମୁଦ୍ରାସ୍ପୀତି ହାର 8 ମାସର ସର୍ବୋଚ୍ଚ ସ୍ତରକୁ ବୃଦ୍ଧି ପାଇ 3.18 ପ୍ରତିଶତରେ ପହଞ୍ଚିଛି । ମେ ରେ ଏହା 3.01 ପ୍ରତିଶତ ରହିଥିଲା ।
ଖାଦ୍ୟ ସାମଗ୍ରୀ ଦର ବଢୁଥିବାରୁ ଦେଶରେ ମୁଦ୍ରାସ୍ପୀତି ବଢୁଛି । ଏଥିଯୋଗୁଁ ଗତମାସରେ ମୁଦ୍ରାସ୍ପୀତି 2.17କୁ ବୃଦ୍ଧି ପାଇଥିଲା । ଯାହାକି ମେ ରେ 1.83 ପ୍ରତିଶତ ଥିଲା ।
ତେବେ ଅଗଷ୍ଟରେ ହେବାକୁ ଥିବା ଭାରତୀୟ ରିଜର୍ଭ ବ୍ୟାଙ୍କର ମୁଦ୍ରାନୀତି ସମୀକ୍ଷା ବୈଠକରେ ଦରଦାମକୁ ନଜରରେ ରଖି ରେପୋରେଟ ଦର ନିର୍ଦ୍ଧାରଣ ହେବ । ସୁଧହାର ହ୍ରାସ ନେଇ ଅନୁମାନ କରାଯାଉଛି ।
