ନୂଆଦିଲ୍ଲୀ: କର ସଂଗ୍ରହ ହ୍ରାସ ବୋଝ ମଧ୍ୟରେ ଦ୍ରବ୍ୟ ଓ ସେବା କର(ଜିଏସଟି) ପରିଷଦର 40 ତମ ବୈଠକ ଜୁନ 14ରେ ହୋଇପାରେ । କୋରୋନା ଭାଇରସ ମହାମାରୀ ସଙ୍କଟ ଆରମ୍ଭ ପରେ ଏହା ଜିଏସଟି ପରିଷଦର ପ୍ରଥମ ବୈଠକ ।
କୋରୋନା ଭାଇରସ ମହାମାରୀ ପ୍ରସାରକୁ ରୋକିବା ପାଇଁ ମାର୍ଚ୍ଚ 25ରୁ ଦେଶବ୍ୟାପି ଲକଡାଉନ ଜାରି ରହିଛି । ଫଳରେ ଆର୍ଥିକ କାର୍ଯ୍ୟକଳାପ ଠପ ରହିବା ସହ କାମଧନ୍ଦା ବନ୍ଦ ରହିଛି । ଯେଉଁଥିପାଇଁ କର ସଂଗ୍ରହ ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି ।
ତେବେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଜିଏସଟି ପରିଷଦର ବୈଠକ ବସିବ । ଏଥିରେ ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ପ୍ରତିନିଧି ସାମିଲ ହୋଇଥାନ୍ତି । ତେବେ କୋରାନା କଟକଣା ଯୋଗୁଁ ଆଗାମୀ ବୈଠକ ଭିଡିଓ କନଫରେନ୍ସି ଜରିଆରେ ହେବ ।
ତେବେ କର ସଂଗ୍ରହ ବୃଦ୍ଧି ପାଇଁ ଅଣ ଆବଶ୍ୟକ ବସ୍ତୁ ଉପରେ ଜିଏସଟି ଦର ବଢାଇବା ନେଇ ଚର୍ଚ୍ଚା ଜୋର ଧରିଛି । କିନ୍ତୁ ଦର ବଢିଲେ ଲୋକଙ୍କ ଉପଯୋଗୀତା ହ୍ରାସ ପାଇବ ଓ ଆର୍ଥିକ ସୁଧାର ବାଧାପ୍ରାପ୍ତ ହେବ । ଏ ନେଇ ଯୁକ୍ତି ବାଢି ଅର୍ଥମନ୍ତ୍ରାଳୟ ଜିଏସଟି ବୃଦ୍ଧିକୁ ଖଣ୍ଡନ କରିଛି ।
ସୌଜନ୍ୟ: PTI
