ମୁମ୍ବାଇ: କୋରୋନାକୁ ମାତ ଦେବା ପାଇଁ ଋଷରେ ଟିକା ପ୍ରସ୍ତୁତ କରିବା ଖବର ପରେ ସୁନା ଓ ରୂପା ଦାମ ବୃଦ୍ଧିରେ ଲାଗିଛି ବିରାମ । ଘରୋଇ ଫ୍ୟୁଚର ବଜାରରେ ସୁନା ଦାମ 10 ଗ୍ରାମ ପ୍ରତି 50,000 ଟଙ୍କା ତଳକୁ ଖସିଛି । ସେହିପରି ରୂପା ଦାମ ରେକର୍ଡ ସ୍ତରରୁ କିଲୋ ପ୍ରତି 17 ,000 ଟଙ୍କା କମିଛି ।
ମଲ୍ଟି କମୋଡିଟି ଏକ୍ସଚେଞ୍ଜରେ ବୁଧବାର ସକାଳ 10.14 ରେ ଅକ୍ଟୋବର ସୁନା 1,600 ଟଙ୍କା ହ୍ରାସ ହୋଇ 10 ଗ୍ରାମ ପ୍ରତି 50,329 ଟଙ୍କା ଟଙ୍କାରେ କାରବାର ଚାଲିଛିଲା , ଯେତେବେଳେ କି ଏହା ପୂର୍ବରୁ କାରବାର ସମୟରେ ସୁନା ଦାମ 10 ଗ୍ରାମ ପିଛା 49,955 ଟଙ୍କାକୁ ଖସିଥିଲା । ତେବେ ଦ୍ବିପ୍ରହରରେ ପୁଣି ଏଥିରେ ବୃଦ୍ଧି ଦେଖାଦେଇଥିଲା ।
ସେହିଭଳି ଏମସିଏକ୍ସରେ ସେପ୍ଟମ୍ବର ରୂପା ପୂର୍ବ କାରବାର ତୁଳନାରେ 5,244 ଟଙ୍କା ହ୍ରାସ ହୋଇ 61,690 ଟଙ୍କାରେ କାରବାର କରୁଥିଲା । ଯେତେବଳେ କି କାରବାର ସମୟରେ ରୂପା ଦାମ 60,910 ଟଙ୍କାକୁ ଖସିଥିଲା ।
ଋଷ ସଫଳତାପୂର୍ବକ ଖୁବ କମ ସମୟ କୋରୋନା ରୋଗୀଙ୍କ ପାଇଁ ସଞ୍ଜୀବନୀ ଆଣିବା ନେଇ ଘୋଷଣା କରିଛି । ଏଥିପାଇଁ ନିବେଶକ ଆଶ୍ବସ୍ତ ହେବା ସହ ସୁନା ଓ ରୂପା ଦାମରେ ବ୍ରେକ ଲାଗିଛି ।
ଗତ ଶୁକ୍ରବାର ଏମସିଏକ୍ସରେ ସୁନା ଦାମ 10 ଗ୍ରାମ ପିଛା ରେକର୍ଡ ସ୍ତର 56,191 ଟଙ୍କାକୁ ଉଛୁଳିଥିବା ବେଳେ ଏବେ ସୁଦ୍ଧା ଏଥିରେ 6,200 ଟଙ୍କା ହ୍ରାସ ଦେଖାଦେଇଛି । ସେହିପରି ପୂରା କିଲୋ 77,949 ଟଙ୍କା ରହିଥିଲା ବେଳେ ଏବେ ସେଥିରେ 17000 ଟଙ୍କା ହ୍ରାସ ହୋଇଥିବା ଦେଖାଦେଇଛି ।
