ନୂଆଦିଲ୍ଲୀ: ଦ୍ରବ୍ୟ ଓ ସେବା କର(ଜିଏସଟି) ଉପରେ ବିପର୍ଯ୍ୟୟ ସେସ ଲାଗୁ ନେଇ କୌଣସି ବିଚାର କରାଯାଉନାହିଁ । କାରଣ ପୂର୍ବରୁ ହିଁ କମ୍ପାନୀଙ୍କ ବିକ୍ରି ହ୍ରାସ ପାଇଛି। ଏଥିସହ ଚାହିଦା ହ୍ରାସର ମଧ୍ୟ ଚ୍ୟାଲେଞ୍ଜ ସୃଷ୍ଟି ହୋଇଛି । ଅର୍ଥ ମନ୍ତ୍ରାଳୟ ଏ ନେଇ ସୂଚନା ଦେଇଛି ।
ଏହା ପୂର୍ବରୁ ଚର୍ଚ୍ଚା ଜୋର ଧରିଥିଲା ଯେ କେନ୍ଦ୍ର ସରକାର ଜିଏସଟି ଉପରେ ବିପର୍ଯ୍ୟୟ ସେସ ଲାଗୁ ନେଇ ବିଚାର କରୁଛନ୍ତି । ଯେପରି କେରଳ ସରକାର ଗତ ବର୍ଷ ଜୁନରେ ବିପର୍ଯ୍ୟୟ ସେସ ଲଗାଇଥିଲେ ।
ତେବେ ଏ ନେଇ ସ୍ପଷ୍ଟ କରି ମନ୍ତ୍ରାଳୟ ପକ୍ଷରୁ କୁହାଯାଇଛି କି, କୋଭିଡ-19 ମହାମାରୀ ମଧ୍ୟରେ ଆର୍ଥିକ ପରିସ୍ଥିତି ବିଗିଡିଯାଇଛି । ଏଭଳି ସମୟରେ ବିପର୍ଯ୍ୟୟ ଉପକର ଲଗାଇବା ମଧ୍ୟ କୌଣସି ବିପର୍ଯ୍ୟୟ ଠାରୁ କମ ନୁହେଁ ।
ବିକ୍ରି ପରିମାଣ ପୂର୍ବରୁ ହିଁ ହ୍ରାସ ପାଇଛି । ଉଦ୍ୟୋଗ ଜଗତ ମଧ୍ୟ ମାନ୍ଦାମୁହାଁ । ଶ୍ରମିକ ମାନେ କାମଧନ୍ଦା ଅଭାବକୁ କଠିନ ସମସ୍ୟାର ସାମ୍ନା କରୁଛନ୍ତି । ଏଭଳି ସଙ୍କଟ ସମୟରେ କର ବଢାଇବା ଅର୍ଥ ଓଲଟା କ୍ଷତି ହେବ, ଉପଭୋକ୍ତାଙ୍କ କ୍ରୟ ଶକ୍ତି କମିବା ସହ ବଜାର ଦୁର୍ବଳ ପଡିବ ବୋଲି କୁହାଯାଇଛି ।
