ନୂଆଦିଲ୍ଲୀ: ଟେଲିକମ କମ୍ପାନୀ ଭାରତୀ ଏୟାରଟେଲକୁ ଆଉ ଏକ ଝଟକା । ଆଡଜଷ୍ଟେଡ ଗ୍ରସ ରେଭିନ୍ୟୁ (ଏଜିଆର) ବକେୟାର ଚିନ୍ତା ନ ସରୁଣୁ ଆମଦାନୀ ଲାଇସେନ୍ସରେ ଲାଗିଲା ପ୍ରତିବନ୍ଧକ । ବାଣିଜ୍ୟ ମନ୍ତ୍ରାଣଳୟର ଏଭଳି କଡା କାର୍ଯ୍ୟନୁଷ୍ଠାନ ଯୋଗୁଁ ଆହୁରି ଘାଟାରେ ପଡିପାରେ କମ୍ପାନୀ ।
ରପ୍ତାନୀ ସମ୍ବନ୍ଧୀୟ ସର୍ତ୍ତ ପୂରଣ କରି ନଥିବାରୁ ଏୟାରଟେଲ ଉପରେ ପ୍ରତିବନ୍ଧକ ଲଗାଯାଇଛି । ବାଣିଜ୍ୟ ମନ୍ତ୍ରାଣଳୟ ଅଧିନରେ ଆସୁଥିବା ବିଦେଶ ବ୍ୟାପର ମହାନିର୍ଦ୍ଦେଶାଳୟ , ଏୟାରଟେଲକୁ ‘ଡିନାଇଡ ଏଣ୍ଟ୍ରି ଲିଷ୍ଟ’ରେ ପକେଇ ଦେଇଛି । ଏକ୍ସପୋର୍ଟ ପ୍ରମୋସନ କ୍ୟାପିଟାଲ ଗୁଡସ ସ୍କିମ(EPCG) ଅଧିନରେ ଭାରତୀ ଏୟାରଟେଲ ତାର ରପ୍ତାନୀ ବାଧାକୁ ପୂରା କରିନାହିଁ ।
ଯେଉଁ ସବୁ କମ୍ପାନୀକୁ ଡିନାଇଡ ଏଣ୍ଟ୍ରି ଲିଷ୍ଟରେ ରଖାଯାଏ, ସେମାନଙ୍କ ଲାଇସେନ୍ସ ଶେଷ ହୋଇଯାଇଥାଏ । ଫଳରେ କମ୍ପାନୀ ଏବେ ବିଦେଶୀ ବ୍ୟାପାର ମହାନିର୍ଦ୍ଦେଶାଳୟ ଅଧିନରେ କୌଣସି ପ୍ରକାର ଆମଦାନୀ ସୁଯୋଗ ବା ଲାଇସେନ୍ସ ହାସିଲ କରିପାରିବ ନାହିଁ ।
ତେବେ ଏନେଇ ଏୟାରଟେଲକୁ ବମ୍ବେ ଷ୍ଟକ ଏକ୍ସଚେଞ୍ଜକୁ ସଫେଇ ମାଗିଛି । ହେଲେ ଏବେ ସୁଦ୍ଧା କମ୍ପାନୀ ପକ୍ଷରୁ ଷ୍ଟକ ଏକ୍ସଚେଞ୍ଜକୁ କୌଣସି ଯବାବ ଦିଆଯାଇନାହିଁ ।
