ରାଇରଙ୍ଗପୁର: ଗତ ମେ ମାସରେ ଦୁର୍ଘଟଣାର ଶିକାର ହୋଇଥିବା ହାସ୍ୟ ଅଭିନେତା ସଲିଲଙ୍କ ସୋମବାର ଦିନ ପରଲୋକ ଘଟିଥିଲା । ତେବେ ମଙ୍ଗଳବାର ଦିନ ସଲିଲଙ୍କ ପାର୍ଥିବ ଶରୀର ସନ୍ଧ୍ୟା ୫.୩୦ ସମୟରେ କରଞ୍ଜିଆ ସ୍ଥିତ ବାସଭବନକୁ ଅଣାଯାଇଥିଲା । ତେବେ ତାଙ୍କର ଶେଷ ଦର୍ଶନ ପାଇଁ କରଞ୍ଜିଆ ସ୍ଥିତ ବାସଭବନରେ ପ୍ରବଳ ଜନସମାଗମ ହୋଇଥିଲା ।
ଶୋକାକୁଳ ପରିବେଶ ମଧ୍ୟରେ ମିତ୍ରଙ୍କ ମୃତଶରୀରକୁ ଏକ ଶୋଭାଯାତ୍ରାରେ କରଞ୍ଜିଆ ବଜାର ପରିକ୍ରମା କରିବା ସହିତ ଦେଓ ନଦୀ କୂଳରେ ଥିବା ଶ୍ମଶାନକୁ ନେଆଯାଇଥିଲା । ସେଠାରେ ତାଙ୍କ ଶେଷକୃତ୍ୟ ସମ୍ପନ୍ନ ହୋଇଛି ।
ସୂଚନାଥାଉକି, ଗତ ମେ ୧୨ ତାରିଖରେରେ ଦୁର୍ଘଟଣାର ଶିକାର ହୋଇଥିଲେ ଅଭିନେତା ସଲିଲ । ସେ ଦିନ ସଲିଲ ମିତ୍ର ଏକ ଇଣ୍ଡିଗୋ କାର ଯୋଗେ କରଞ୍ଜିଆ ଅଭିମୁଖେ ଯାଉଥିବା ବେଳେ କେନ୍ଦୁଝର ଜିଲ୍ଲା ଘଟଗାଁ କଲେଜ ଛକ ନିକଟରେ ତାଙ୍କ ଗାଡ଼ି ସମ୍ମୁଖକୁ ଏକ ଗାଈ ଚାଲିଆସିଥିଲା । ଫଳରେ କାରଟି ଭାରସାମ୍ୟ ହରାଇ ଓଲଟି ପଡିଥିଲା । ଏହି ଦୁର୍ଘଟଣାରେ କାର ଚାଳକ ସାମାନ୍ୟ ଆହତ ହୋଇଥିବା ବେଳେ ସଲିଲ ମିତ୍ରଙ୍କ ଡାହାଣ ହାତ ଓ ଗୋଡ ଭାଙ୍ଗିଯିବା ସହିତ ମୁଣ୍ଡରେ ଏକାଧିକ ସ୍ଥାନରେ କ୍ଷତ ହୋଇଥିଲା ।
ତେବେ ଗୁରୁତର ଅବସ୍ଥାରେ ଘଟଗାଁ ଡାକ୍ତରଖାନାରୁ କିମ୍ସ ଡାକ୍ତରଖାନାକୁ ନିଆଯାଇଥିଲା। ସେଠାରେ ତାଙ୍କର ଚିକିତ୍ସା ଜାରି ରହିଥିଲା । କିନ୍ତୁ ସୋମବାର ବିଳମ୍ବିତ ରାତିରେ ସଲିଲ ଇହଧାମ ତ୍ୟାଗ କରିଥିଲେ । ତେବେ ମୃତ୍ୟୁବେଳକୁ ତାଙ୍କ ନିକଟରେ ପତ୍ନୀ ଓ 2 ଝିଅ ଉପସ୍ଥିତ ଥିଲେ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
