ସମ୍ବଲପୁର: ଜିଲ୍ଲାରେ ବେଶ ଧୂମଧାମରେ ପାଳିତ ହୋଇଛି ପ୍ରସିଦ୍ଧ ଶୀତଳ ଷଷ୍ଠୀ ଯାତ୍ରା । ଦେବଦମ୍ପତିଙ୍କ ଏହି ବିବାହ ଉତ୍ସବରେ ଝାଡୁଆପଡା, ନନ୍ଦପଡା, ମୁଦିପଡା, ବଡବଜାର ଓ ବାଲିବନ୍ଧା ସମେତ ସହରର ପ୍ରମୁଖ ଶୀତଳଷଷ୍ଠୀ ଯାତ୍ରା କମିଟିର ବରଯାତ୍ରୀ ଶୋଭାଯାତ୍ରା ବେଶ ଧୂମଧାମରେ ଅନୁଷ୍ଠିତ ହୋଇଯାଇଛି ।
ଶୁକ୍ରବାର ମଧ୍ୟରାତ୍ରୀରେ ଭୋଳାବାବାଙ୍କର ବିଧି ପୂର୍ବକ ପୂଜାର୍ଚ୍ଚନା ପରେ ଆରତୀ କରାଯାଇଥିଲା । ବାବାଙ୍କ ଏହି ଆରତୀରେ ସାଧାରଣ ଲୋକଙ୍କ ବ୍ୟତୀତ ବିଭିନ୍ନ ରାଜନୈତିକ ଦଳର ବ୍ୟକ୍ତି ବିଶେଷ ଯଥା ସମ୍ବଲପୁର ପୂର୍ବତନ ବିଧାୟିକା ରାସେଶ୍ବରୀ ପାଣିଗ୍ରାହୀ, ବରଗଡ ସାଂସଦ ସୁରେଶ ପୂଜାରୀ, ସମ୍ବଲପୁର ବିଧାୟକ ଜୟନାରାୟଣ ମିଶ୍ର, ସମ୍ବଲପୁର ସାଂସଦ ନିତେଶ ଗଙ୍ଗଦେବ ଓ ରେଙ୍ଗାଲି ବିଧାୟକ ନାଉରି ନାଏକ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ରାଜନେତାମାନେ ସମଗ୍ର ଓଡିଶାବାସୀଙ୍କ ପାଇଁ ଶୁଭକାମନା କରିଥିଲେ ।
ଅପରପକ୍ଷେ ବାବାଙ୍କ ବରଯାତ୍ରୀ ଶୋଭାଯାତ୍ରାରେ ଭକ୍ତ ଶ୍ରଦ୍ଧାଳୁଙ୍କ ସମେତ ହଜାର ହଜାର କଳାକାର ମଧ୍ୟ ସାମିଲ ହୋଇଥିଲେ । ଭୋଲାବାବା ଶିବ ଶଙ୍କର ଦିବ୍ୟ ବିମାନ ଆରୁଢ଼ ହୋଇ କନ୍ୟା ପିତା ମାତାଙ୍କ ଅଭିମୁଖେ ଆଗେଇ ଚାଲିଥିବା ବେଳେ ଉଭୟ ପାରମ୍ପରିକ ଲୋକ କଳା ଓ ଆଧୁନିକ ଡ୍ୟାନସର ମଜା ନେଇଥିଲେ ଦର୍ଶକ । ଏହା ପରେ ବର ପକ୍ଷ କନ୍ୟା ଘରେ ପହଞ୍ଚିବା ପରେ ସେମାନଙ୍କୁ ଭବ୍ୟ ସ୍ବାଗତ କରାଯାଇଥିଲା । ଆଉ ଆରମ୍ଭ ହୋଇଥିଲା ଦେବ ଦମ୍ପତିଙ୍କ ବାହାଘର ପାଇଁ ସମସ୍ତ ପ୍ରକିୟା ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
