ନୟାଗଡ: ଗମନାଗମନକୁ ସରଳ ସୁବିଧା କରିବା ପାଇଁ ରାଜ୍ୟ ସରକାର ବଜେଟରେ କୋଟି କୋଟି ଟଙ୍କା ବ୍ୟୟ ବରାଦ କରୁଛନ୍ତି । ହେଲେ ସେହି ଟଙ୍କା କେତେ ଉପଯୋଗ ହେଉଛି କେତେ ବାଟମାରଣା ହେଉଛି ତାହାର ହିସାବ ସରକାରଙ୍କ ପାଖରେ ନାହିଁ ।
ରାଜ୍ୟ ସାରା ରାସ୍ତା ନିର୍ମାଣରେ କୋଟି କୋଟି ଟଙ୍କା ଚଳୁ ହେଉଛି , ଏମିତି ଏକ ସାଂଘାତିକ ଦୁର୍ନୀତିର ଅଭିଯୋଗ ଆସିଛି ନୟାଗଡ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ମିନଗଡ଼ିଆ ଗାଁରେ । ଜାତୀୟ ରାଜପଥ 57ର ରକ୍ତପଟା ଠାରୁ ମିନଗଡ଼ିଆ ପର୍ଯ୍ୟନ୍ତ ଆରଡ଼ି ରାସ୍ତା ନିର୍ମାଣ ପାଇଁ ସରକାର ଦେଢ଼କୋଟି ମଞ୍ଜୁର କରିଥିଲେ , ଆଉ କାମ ମଧ୍ଯ ଶେଷ ହୋଇଛି ।
ହେଲେ ଏହି କାମକୁ ନେଇ ଆସିଛି ସାଂଘାତିକ ଅଭିଯୋଗ । ଉକ୍ତ ରାସ୍ତା ଉପରେ ନିର୍ଭର କରୁଥିବା ପାଞ୍ଚଟି ଗ୍ରାମର ଲୋକ ମିଳିତ ଭାବେ ଅଭିଯୋଗ କରି କହିଛନ୍ତି ରାସ୍ତା କାମରେ ବ୍ୟାପକ ଦୁର୍ନୀତି ହୋଇଛି । ପିଚୁ ହେବାର ପନ୍ଦର ଦିନ ମଧ୍ୟରେ ପିଚୁ ଉଠିଗଲାଣି । ଲୋକଙ୍କ ଅଭିଯୋଗ ଅନୁସାରେ ସେମାନେ ନିମ୍ନ ମାନର କାମକୁ ନେଇ ଜେଇ, କଣ୍ଟ୍ରାକ୍ଟରଙ୍କୁ କହିଥିଲେ ମଧ୍ୟ କେହି ଶୁଣିନଥିବା ସହ ଅନ୍ୟପଟେ ଗ୍ରାମବାସୀଙ୍କୁ ଧମକ ଚମକ ଦେଇଥିଲେ ।
ଏଥିଯୋଗୁଁ ଗ୍ରାମବାସୀ ବାଧ୍ୟ ହୋଇ ଆଜି ରାସ୍ତା ଅବରୋଧ କରିବା ସହ ଘଟଣାସ୍ଥଳକୁ ବିଭାଗୀୟ ଇଞ୍ଜିନିୟରଙ୍କୁ ଡାକି ନିମ୍ନମାନର କାମ ଦେଖାଇବା ସହ ତୁରନ୍ତ ଆଉଥରେ କାମ କରିବାକୁ ଦାବି କରିଛନ୍ତି ।
ନୟାଗଡରୁ ଉତ୍ପଲ ସାହୁ, ଇଟିଭି ଭାରତ
