ଭୁବନେଶ୍ବର: ଆଜି ବିଶ୍ବ ତମାଖୁ ବର୍ଜନ ଦିବସ । ତମାଖୁ ନିଷିଦ୍ଧ ପାଇଁ ସରକାରୀ ଯୋଜନା ପ୍ରଣୟନ ହୋଇଛି, ବିକ୍ରି ଉପରେ ଲାଗିଛି କଟକଣା । ହେଲେ ଏହି ନିୟମର ଖୋଲାଖୋଲି ଉଲ୍ଲଘଂନ ଚାଲିଛି । ରାଜଧାନୀର ଗଳି କନ୍ଧିରେ ବେଧଡକ ଭାବେ ବିକ୍ରି ହେଉଛି ତମାଖୁ । ଏ ହେଉଛି ରାଜଧାନୀରେ ଖୋଲାଖୋଲି ବିକ୍ରି ହେଉଥିବା ତମାଖୁ ଦୃଶ୍ୟ । ରାଜଧାନୀ ଭୁବନେଶ୍ବରର ବାସିନ୍ଦାଙ୍କ ମତରେ ନିୟମ କଡାକଡି ନଥିବାରୁ ଏଭଳି ସ୍ଥିତି ଉପୁଜିଛି । ଯୁବକମାନେ ତମାଖୁ ସେବନର ଶିକାର ହେଉଛନ୍ତି ।
ତମାଖୁ ସେବନ କାରଣରୁ ବଢୁଛି କ୍ୟାନସର ରୋଗୀଙ୍କ ସଂଖ୍ୟା । ଅଧିକ ଶିକାର ହେଉଛନ୍ତି ଯୁବପିଢି । ମୁଖ କର୍କଟ ଭଳି ରୋଗ ବ୍ୟାପୁଛି । ପ୍ରତିବର୍ଷ ୬୦ ଲକ୍ଷରୁ ଅଧିକ ଲୋକ ତମାଖୁ ସେବନ ଜନିତ ରୋଗରେ ଆକ୍ରାନ୍ତ ହୋଇ ମୃତ୍ୟୁବରଣ କରୁଛନ୍ତି ।
ସବୁସ୍ତରରେ ଏହାର ସଚେତନତା ଆବଶ୍ୟକତା ରହିଛି । ତମାଖୁ ସେବନ ଦ୍ବାରା ପରିବାର ଉଜୁଡି ଯାଉଛି ।ତେଣୁ ତୁରନ୍ତ ଏହାର ନିରାକରଣ ଆବଶ୍ୟକ ଅଛି ବୋଲି କ୍ୟାପିଟାଲ ହସ୍ପିଟାଲର କାନ ନାସା ଓ ଗଳା ବିଭାଗର ବରିଷ୍ଠ ବିଶେଷଜ୍ଞ ଡାକ୍ତର ସନ୍ତୋଷ କୁମାର ପଣ୍ଡା କହିଛନ୍ତି ।
ସେହିପରି କୋରାପୁଟ ଅଞ୍ଚଳରେ ତମାଖୁ ସେବନ ମାତ୍ରାଧିକ ରହିଛି । ତେବେ ଜନ ସଚେତନତା ଧୀରେ ଧୀରେ ବୃଦ୍ଧି ପାଉଥିବା ଯୋଗୁଁ ନିଶାମୁକ୍ତ ସମାଜ ଗଠନ ଦିଗରେ ଏହା ଏକ ଶୁଭଙ୍କର ସୂଚନା ବୋଲି ଗୀତା ସ୍ବେଚ୍ଛା ସେବୀ ସଂଗଠନର ସ୍ଥାନୀୟ ପରାମର୍ଶଦାତା ବିଭୁତି ନନ୍ଦ ଜଣାଇଛନ୍ତି ।
ଗତ 3ବର୍ଷରେ ଜିଲ୍ଲା ସ୍ବାସ୍ଥ୍ୟ ବିଭାଗ ଆନୁକୂଲ୍ୟରେ କୋରାପୁଟ ଜିଲ୍ଲାରେ ୪୪୧୨ ଜଣ ବିଡି, ସିଗାରେଟ ଓ ହୁକ୍କା ପାନ କରୁଥିବା ବ୍ୟକ୍ତିଙ୍କ ସମେତ ତମାଖୁ ଓ ତମାଖୁ ଯୁକ୍ତ ପାନ ଖାଉଥିବା ବ୍ୟକ୍ତିଙ୍କୁ ପରାମର୍ଶ ଦେଇ ନିଶାମୁକ୍ତ ହେବା ପାଇଁ ସହଯୋଗ କରାଯାଇଛି । ବର୍ତ୍ତମାନ ସେମାନଙ୍କ ମଧ୍ୟରୁ ମାତ୍ର ୬୨୦ ଜଣ ତମାଖୁସେବନରୁ ନିଜକୁ ଦୂରେଇ ରଖିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ ଏବଂ କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
