ଖୋର୍ଦ୍ଧା: ଗାଁ ଗାଁରେ ପହଞ୍ଚିବ ବିକାଶ । ଏଥିପାଇଁ ରାଜ୍ୟ ସରକାରଙ୍କ ମାଳମାଳ ଯୋଜନା । ହେଲେ ଏହି ସବୁ ସରକାରୀ ଯୋଜନାର ବାସ୍ତବିକତାର ପ୍ରମାଣ ଦେଉଛି ଖୋର୍ଦ୍ଧା ଜିଲ୍ଲା କଳାଙ୍ଗ ପଞ୍ଚାୟତର ଚଲଣାପଡା ଗାଁ । ରାଜଧାନୀଠାରୁ ମାତ୍ର 60 କିମି ଦୂରରେ ଥିବା ଏହି ଗାଁକୁ ଅଛି ନା ରାସ୍ତା ନା ପାଣିର ବ୍ୟବସ୍ଥା । ଗାଁରେ ଭଲ ରାସ୍ତାଟିଏ ନଥିବାରୁ ରୋଗୀ ସେବା ପାଇଁ ଗାଁକୁ ଆମ୍ବୁଲାନ୍ସଟିଏ ଆସିପାରେ ନାହେଁ । ଫଳରେ ରୋଗୀ ସେବା ବାଧାପ୍ରାପ୍ତ ହୋଇଥାଏ । ଏମିତି ପରିସ୍ଥିତିରେ ଗାଁରେ ଭଲ ରାସ୍ତାଟିଏ ପାଇଁ ନିଜେ ଅଣ୍ଟା ଭିଡିଛନ୍ତି ଗ୍ରାମବାସୀ ।
ଏହାଛଡା ଗ୍ରାମବାସୀଙ୍କ ପାଇଁ ପାଣି ଆଉ ଏକ ମୁଖ୍ୟ ସମସ୍ୟା ପାଲିଟିଛି । ଗାଁରେ ନା ଅଛି କୂଅ ନା ପୋଖରୀ । ସେଠାରେ ଥିବା ଗୋଟିଏ ମାତ୍ର ନଳକୂପ 150ରୁ ଊର୍ଦ୍ଧ୍ବ ଲୋକଙ୍କ ଶୋଷ ମେଣ୍ଟାଇବା ସହ ଗାଧୁଆ ଓ ଅନ୍ୟାନ୍ୟ କାମ ପାଇଁ ଏହି ପାଣିର ବ୍ୟବହାର କରିଥାନ୍ତି । ସେହିପରି ଗାଁ ଶିକ୍ଷା ବ୍ୟବସ୍ଥା ସମ୍ପର୍କରେ ନକହିବା ଭଲ । କୁନି କୁନି କୋମଳମତି ପିଲାଙ୍କ ପାଇଁ ଅଙ୍ଗନବାଡି କେନ୍ଦ୍ରଟିଏ ମଧ୍ୟ ନାହିଁ ଏଠାରେ ।
ଜଙ୍ଗଲ ଘେର ଏହି ଗାଁ ସରକାରଙ୍କ ଦୃଷ୍ଟି ଆଡୁଆଳରୁ ବଞ୍ଚିଯାଇଥିବାବେଳେ ଏପରି ଏକ ଗାଁକୁ ସନ୍ଧାନ କରି ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରିଥିଲା ଇଟିଭି ଭାରତ । ଏହା ପରେ ଖୁବ୍ ଶୀଘ୍ର ଏହି ଗାଁ ପ୍ରତି ଦୃଷ୍ଟି ଦେବେ ବୋଲି ବ୍ଲକ ଅଧ୍ୟକ୍ଷ କହିଛନ୍ତି । ସେପଟେ ଗାଁର ମୌଳିକ ସୁବିଧା ପ୍ରତି ପ୍ରାଥମିକତା ଭାବେ ଦୃଷ୍ଟି ଦିଆଯିବ ବୋଲି ନୂତନ ଭାବେ ଦାୟିତ୍ବ ନେଇଥିବା ଜିଲ୍ଲାପାଳ କହିଛନ୍ତି ।
ପ୍ରଶାସନ ଏବଂ ସରକାରଙ୍କ ଦୃଷ୍ଟିରୁ ବଞ୍ଚିଯାଇଥିବା ଏହି ଜଙ୍ଗଲ ଘେରରେ ଥିବା ଗ୍ରାମବାସୀ କେବେ ସରକାରୀ ଯୋଜନାର ଅନ୍ତର୍ଭୁକ୍ତ ହେବେ ତାହା ଦେଖିବାକୁ ବାକି ରହିଲା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
