ପୁରୀ: ଫନି ମାଡ଼ରୁ ବର୍ତ୍ତିନି ପିଲାଙ୍କ ଭବିଷ୍ୟତ । ବହିବସ୍ତାନୀ ସିନା ବର୍ତ୍ତି ଯାଇଛି, ହେଲେ ଭୁଶୁଡ଼ି ପଡ଼ିଛି ବିଦ୍ୟାର ମନ୍ଦିର ସ୍କୁଲ ଘର । କମ୍ପ୍ୟୁଟର କ୍ଲାସ ରୁମ ଠାରୁ ଆରମ୍ଭ କରି ଏନସିସି ରୁମ, ଷ୍ଟୋର ରୁମ, କ୍ଲାସ ରୁମ ଗୁଡିକର ଅବସ୍ଥା ବେହାଲ। କେବଳ ଗୋଟିଏ କି ଦୁଇଟି ସ୍କୁଲର ଅବସ୍ଥା କଥା କହୁନାହୁଁ, ପୁରୀର ଅନେକ ସ୍କୁଲ ଘରର ଅବସ୍ଥା ଏଭଳି । ଜିଲ୍ଲାରେ ଏକ ପ୍ରକାର ମାଟିରେ ମିଶିଯାଇଛି ଶିକ୍ଷା ବିଭାଗର ଭିତ୍ତିଭୂମି ।
ରଜ ଛୁଟି ପରେ ଆରମ୍ଭ ହେବ ନୂତନ ଶିକ୍ଷାବର୍ଷ । କିନ୍ତୁ ଅଣ୍ଟା ସଳଖି ପାରିନି ଜିଲ୍ଲାର ଶିକ୍ଷା ବିଭାଗ । ବିପର୍ଯ୍ୟସ୍ତ ଅବସ୍ଥାରେ ପଡିରହିଛି ବିଦ୍ୟାମନ୍ଦିର । ଯଦି ଯୁଦ୍ଧକାଳୀନ ଭିତ୍ତିରେ ଏହାର ପୁନଃରୁଦ୍ଧାର କରାନଯାଏ ଏହା ଯେ ଶିକ୍ଷାଦାନ ଉପରେ ଗୁରୁତର ପ୍ରଭାବ ପକାଇବ ତାହା ନିଃସନ୍ଦେହରେ କୁହାଯାଇପାରେ । ସେପଟେ ସ୍କୁଲ ଗୁଡିକ ପୁନଃରୁଦ୍ଧାର ନେଇ ଯୋଜନା ପ୍ରସ୍ତୁତ କରୁଛି ପ୍ରଶାସନ।
ମହାବାତ୍ୟାର ରୂପ ନେଇ ଆସିଥିବା ଫନି ଖାଲି ପୁରୀର ଜୀବନରେଖାକୁ ଦୋହଲାଇ ଦେଇନି, ବରଂ ଜିଲ୍ଲାର ଶିକ୍ଷା ବ୍ୟବସ୍ଥାକୁ ସମ୍ପୂର୍ଣ୍ଣ ଧ୍ବଂସ କରିଦେଇଛି । ଏବେ ଅପେକ୍ଷା କେବେ ଫେରୁଛି ସ୍କୁଲର ପୂର୍ବାବସ୍ଥା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
