ବ୍ରହ୍ମପୁର: ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧିକୁ ନେଇ ଆସନ୍ତାକାଲି ଠାରୁ ଗଞ୍ଜାମ ଜିଲ୍ଲାର ସହରାଞ୍ଚଳରେ ଆରମ୍ଭ ହେବ ଡୋର ଟୁ ଡୋର ସ୍କ୍ରିନିଂ । ପ୍ରଥମେ କେଉଁ ଅଞ୍ଚଳରେ ହେବ ତାହା ପ୍ରଶାସନ ପକ୍ଷରୁ ଘୋଷଣା କରାଯିବ । ତେବେ ଘରକୁ ଘର ବୁଲି ସ୍ୱାସ୍ଥ୍ୟ ପରୀକ୍ଷା କରାଯିବା ସମୟରେ ସମସ୍ତେ ସହଯୋଗ କରିବା ସହ କେହି କୌଣସି ଲକ୍ଷଣ ନ ଲୁଚାଇବାକୁ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ସୂଚନା ଦେଇଛନ୍ତି ।
ସେପଟେ ସରକାରଙ୍କ ପକ୍ଷରୁ ଗଞ୍ଜାମ ଜିଲ୍ଲାକୁ ରାପିଡ୍ ଆଣ୍ଟିଜେନ୍ ଟେଷ୍ଟ କିଟ୍ ପହଞ୍ଚିସାରିଥିବାବେଳେ ଏହା ଆଜି ଠାରୁ ଆରମ୍ଭ ହେବ ।
ଦୋକାନୀ ଯଦି ସାମାଜିକ ଦୂରତ୍ୱ ନିୟମକୁ ଉଲଙ୍ଘନ କରିବେ, ତେବେ ପାଞ୍ଚ ହଜାର ଟଙ୍କା ଜୋରିମାନା ସହ ୧୫ ଦିନ ପାଇଁ ଉଲଙ୍ଘନକାରୀଙ୍କ ଦୋକାନ ସିଲ୍ କରାଯିବ ।
ଦ୍ବିତୀୟ ଥର ପୁଣି ଯଦି ଉଲଙ୍ଘନ କରନ୍ତି ତେବେ ତାଙ୍କ ବିରୁଦ୍ଧରେ ମାମଲା ରୁଜ୍ଜୁ ହେବା ସହ ଏକ ମାସ ପାଇଁ ସଂପୃକ୍ତ ଦୋକାନକୁ ବନ୍ଦ କରାଯିବ ବୋଲି ଜିଲ୍ଲାପାଳ ଟ୍ବିଟ କରି ଜଣାଇଛନ୍ତି । ସେହିପରି ଜିଲ୍ଲାରେ ଗାଡି ଚଳାଚଳକୁ ସଂପୂର୍ଣ୍ଣ ଭାବରେ ବନ୍ଦ କରାଯିବ । କେବଳ କୃଷି ଭିତ୍ତିକ, ପରିବହନ ଏବଂ ସ୍ୱାସ୍ଥ୍ୟଗତ ସମସ୍ୟା କ୍ଷେତ୍ରରେ ଗାଡି ଚଳାଚଳ କରାଯିବ ବୋଲି ସୂଚନା ଦିଆଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
