ଭୁବନେଶ୍ବର: ଆପଣ ନିତିଦିନ ଆପଣଙ୍କ ମୋଟର ସାଇକେଲରେ ପେଟ୍ରୋଲ ପକାଉଛନ୍ତି କି? ପେଟ୍ରୋଲ ପମ୍ପରୁ ପେଟ୍ରୋଲ ପକାଇଲା ବେଳେ କେବେ ଯାଞ୍ଚ କରିଛନ୍ତି କି ? ଯଦି ନା ତାହାହେଲେ ଏବେ ଠାରୁ ପେଟ୍ରୋଲ ପକାଇବା ପୂର୍ବରୁ ଯାଞ୍ଚ କରିନିଅନ୍ତୁ । କାରଣ ଆପଣଙ୍କ ଗାଡିରେ ପେଟ୍ରୋଲ ପରିବର୍ତ୍ତେ ଭର୍ତି ହେଉଛି ଅଜଣା କେମିକାଲ । ଏହି କେମିକାଲ କେତେବେଳେ କିପରି ବି ଆପଣଙ୍କ ଏବଂ ଆପଣଙ୍କ ମୋଟର ସାଇକେଲର କ୍ଷତି ପହଞ୍ଚାଇ ପାରେ ।
ଏମିତି ଏକ ଅପମିଶ୍ରଣର ଅଭିଯୋଗ ଆସିଛି ଖୋଦ ରାଜ୍ୟ ରାଜଧାନୀ ଭୁବନେଶ୍ବରରୁ । ଗତକାଲି ସୌମ୍ଯରଂଜନ ପାତ୍ର ନାମକ ଜଣେ ଗ୍ରାହକ ରାଜଭବନ ନିକଟସ୍ଥ ପେଟ୍ରୋଲ ପମ୍ପରୁ ନିଜ ଗାଡିରେ ଏକ ହଜାର ଟଙ୍କାର ପେଟ୍ରୋଲ ଭର୍ତି କରିଥିଲେ । ତେବେ ସକାଳୁ ଗାଡିର ଓଭର ଫ୍ଲୋ ପାଇପରୁ ପେଟ୍ରୋଲ ଲିକ ହେଉଥିବାର ସେ ଦେଖିଥିଲେ । ତେବେ ସୌମ୍ୟରଞ୍ଜନ ଏହାକୁ ଏକ ବୋତଲରେ ଭର୍ତି କରିଥିଲେ ହେଲେ ତାହା ପେଟ୍ରୋଲ ନଥିଲା ଥିଲା ଏକ ଅଜଣା କେମିକାଲ ।
ସେ ନିକଟସ୍ଥ ଗାଡି ଗ୍ୟାରେଜକୁ ଯାଇ ପଚାରିବାରୁ ଏହା କେମିକାଲ ବୋଲି ଜାଣିବାକୁ ପାଇଥିଲେ । ତୁରନ୍ତ ସୌମ୍ୟ ରଞ୍ଜନ ପକାଇଥିବା ପେଟ୍ରୋଲ ପମ୍ପକୁ ଯାଇ ଅଭିଯୋଗ କରିବାରୁ ପେଟ୍ରୋଲ ପମ୍ପ କତ୍ତୃପକ୍ଷ ସିଧା ସିଧା କଥା ଫାଙ୍କିଥିଲେ । ଆଉ ପେଟ୍ରୋଲ ପମ୍ପର କର୍ମଚାରୀ କହିଛନ୍ତି ଆମେ ପେଟ୍ରୋଲ କେବଳ ମାପ କରି ବିକ୍ରି କରୁ କୌଣସି କେମିକାଲ ମିଶ୍ରଣ କରୁନାହିଁ।
ତେବେ ଏହି କେମିକାଲ ଦେଖିବାକୁ ଧଳା ଆଉ ଗୁରୁତ୍ବପୂର୍ଣ୍ଣ କଥା ହେଲା ଏଥିରେ ନିଆଁ ଲଗାଇଲେ ହୁତୁହୁତୁ ହୋଇ ଜଳୁଛି ମଧ୍ୟ । ତେବେ ଘଟଣାକୁ ନେଇ ସୌମ୍ୟ ପୋଲିସ ନିକଟରେ ଅଭିଯୋଗ କରିବା ପରେ ପୋଲିସ ପହଞ୍ଚି ଘଟଣାର ତଦନ୍ତ କରୁଛି ।
ତେବେ ପ୍ରଶ୍ନ ଉଠୁଛି ଏହି କେମିକାଲ ଆସିଲା କେଉଁଠୁ ? କିଏ ଏହାକୁ ପେଟ୍ରୋଲରେ ମିଶ୍ରଣ କରିଛନ୍ତି । କେଉଁ ଉଦ୍ଦେଶ୍ୟରେ ଏହା ମିଶ୍ରଣ ହୋଇଛି? ଖାଲି ଏହି ପେଟ୍ରୋଲ ପମ୍ପ ନା ଆଉ କୋଉଠି ଚାଲିଛି ଏମିତି ମିଶ୍ରଣ କାରବାର? ମିଶ୍ରଣ କାରବାରରେ କେଉଁମାନେ ସଂପୃକ୍ତ? ଯୋଗାଣ ବିଭାଗ ପାଖରେ ଏହିସବୁ ଖବର ଅଛିତ? ଏବଂ ଏହି ପେଟ୍ରୋଲ ପମ୍ପ ଏହା ମିଶ୍ରଣ କରିଛି । ଏହିସବୁର ଉତ୍ତର ଚାହିଁଛନ୍ତି ରାଜ୍ୟବାସୀ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
