ମୁମ୍ବାଇ: ପରଲୋକରେ ଭେଟେରାନ ମରାଠୀ ଅଭିନେତ୍ରୀ ମାଧବୀ ଗୋଗ୍ଟେ(Madhavi Gogate) । ଗତ କିଛି ଦିନ ହେବ ସେ କୋରୋନାରେ ଆକ୍ରାନ୍ତ ହୋଇ ମୁମ୍ବାଇର ସେଭେନ ହିଲ୍ସ ହସ୍ପିଟାଲରେ ଚିକିତ୍ସାଧୀନ ହୋଇ ଆସୁଥିବାବେଳେ ଗତକାଲି (ରବିବାର) ସେ ଗୁରୁତର ହୋଇପଡିଥିଲେ । ତେବେ ଆଜି ତାଙ୍କର ଦେହାନ୍ତ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ 58 ବର୍ଷ ହୋଇଥିଲା ।
ତେବେ ତାଙ୍କ ମୃତ୍ୟୁ ନେଇ ଗଣମାଧ୍ୟମରେ ଖବର ପ୍ରସାରିତ ହେବା ପରେ ମରାଠୀ ସିନେ ଜଗତର ଅନେକ ସହ କଳାକାରଙ୍କ ସହ ପ୍ରଶଂସକ ଦୁଃଖ ପ୍ରକାଶ କରିଛନ୍ତି । ମାଧବୀ ଅନେକ ଚଳଚ୍ଚିତ୍ର ଏବଂ ଟେଲିଭିଜନ ଶୋ’ରେ ଅଭିନୟ କରିଛନ୍ତି । ମରାଠୀ ଧାରାବାହିକ ’ଅନୁପମା’ (Anupama) ଓ ମରାଠୀ ଚଳଚ୍ଚିତ୍ର ଘନଚକ୍କରରେ ଅଭିନୟ ପାଇଁ ଦର୍ଶକୀୟ ଆଦୃତି ପାଇଥିଲେ । ଏହା ବ୍ୟତୀତ ମାଧବୀଙ୍କୁ ‘କୋଇ ଆପନା ସା’, ‘ଐସା କଭି ସୋଚା ନା ଥା’, ‘କାଲ ଭୈରବ ରହସ୍ୟ’ ଏବଂ ‘କାହିଁ ତୋହ ହୋଗା’ ଭଳି ଶୋ ରେ ମଧ୍ୟ ଦେଖିବାକୁ ପାଇଥିଲେ ଦର୍ଶକ ।
ବ୍ୟୁରୋ ରିପୋର୍ଟ, ଇଟିଭି ଭାରତ
