ଯାଜପୁର: କୁଆଖିଆ ଥାନା ବାଲିପାଟଣା ଗାଁରେ ଅଘଟଣ । ଘର କାମ ଚାଲୁଥିବାବେଳେ କାନ୍ଥ ପଡି 2 ଜଣଙ୍କ ମୃତ୍ୟୁ ହୋଇଥିବାବେଳେ ଜଣେ ଗୁରୁତର ହୋଇଛନ୍ତି । ମୃତକ ଘର ମାଲିକ ବନମାଳି ସାହୁ ଓ ଶ୍ରମିକ ଚନ୍ଦନ ଲେଙ୍କା । ଗୁରୁତରଙ୍କୁ ଚିକିତ୍ସା ପାଇଁ ଧର୍ମଶାଳା ମେଡିକାଲରେ ଭର୍ତ୍ତି କରାଯାଇଛି ।
ସୂଚନାନୁସାରେ, ବନମାଳି ସାହୁଙ୍କ ଏକ ପୁରୁଣା ଘରର କାନ୍ଥ ଆଉ ଛାତକୁ ରିପାରିଂ କରାଯାଉଥିଲା । ଏହି ସମୟରେ ହଠାତ ଘରର କାନ୍ଥଟି ଭୁଶୁଡି ପଡିଥିଲା । ଫଳରେ ତଳେ ରହି କାମ ଦେଖୁଥିବା ବନମାଳିଙ୍କ ଉପରେ କାନ୍ଥ ପଡିଯାଇଥିଲା । ଏଥିସହିତ ଛାତରେ କାମ କରୁଥିବା 2 ଜଣ ଶ୍ରମିକ ଚନ୍ଦନ ଲେଙ୍କା ଓ ତାଙ୍କ ସହଯୋଗୀ ତଳକୁ ଖସି ପଡିଥିଲେ । ତେବେ 3 ଜଣଙ୍କୁ ଗୁରୁତର ଅବସ୍ଥାରେ ଗ୍ରାମବାସୀ ଧର୍ମଶାଳା ମେଡିକାଲକୁ ନେଇଥିଲେ ।
ହସ୍ପିଟାଲରେ ପ୍ରାଥମିକ ଚିକିତ୍ସା ପରେ ଡାକ୍ତର ବନମାଳି ଓ ଚନ୍ଦନଙ୍କୁ ମୃତ ଘୋଷଣା କରିଥିଲେ । ଗୁରୁତର ଅନ୍ୟ ଜଣେ ଶ୍ରମିକକୁ ଚିକିତ୍ସା ପାଇଁ କଟକ ବଡ ମେଡିକାଲକୁ ପଠାଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
