ଜେନେଭା: ପ୍ରଥମ, ଦ୍ବିତୀୟ ଲହର ପରେ ବିଶ୍ବକୁ ମାଡି ଆସୁଛି କୋରୋନାର ତୃତୀୟ ଲହର । ବିଶ୍ବ ବର୍ତ୍ତମାନ ତୃତୀୟ ଲହରର ପ୍ରାଥମିକ ପର୍ଯ୍ୟାୟରେ ଅଛି ବୋଲି ବିଶ୍ବ ସ୍ବାସ୍ଥ୍ୟ ସଂଗଠନ(WHO)ର ମୁଖ୍ୟ ଟେଡ୍ରସ ଅଧାନମ ଘେବ୍ରେସସ ଗୁରୁବାର ସୂଚନା ଦେଇଛନ୍ତି ।
ଟେଡ୍ରସ କହିଛନ୍ତି ଯେ ଦୁର୍ଭାଗ୍ୟବଶତଃ ବିଶ୍ବ ବର୍ତ୍ତମାନ ମହାମାରୀର 3ୟ ଲହରର ପ୍ରାଥମିକ ପର୍ଯ୍ୟାୟରେ ଅଛି । ତୃତୀୟ ଲହର ବା କୋଭିଡ ଭାଇରସ ନୂଆ ଷ୍ଟ୍ରେନ ଡେଲଟା ଭ୍ୟାରିଆଣ୍ଟ ବ୍ୟାପିଲେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବା ସହିତ ମୃତ୍ୟୁ ସଂଖ୍ୟା ମଧ୍ୟ ବଢିବ । ଏହି ସମୟରେ ସାମାଜିକ ଦୂରତା ବଜାୟ ରଖିବା ସହିତ ସମସ୍ତ କୋଭିଡ ନିୟମ ମାନିବା ନିହାତି ଆବଶ୍ୟକ ବୋଲି ସଂଗଠନର ମୁଖ୍ୟ ବୁଧବାର ବିଶ୍ବବାସୀଙ୍କ ସତର୍କ କରାଇଛନ୍ତି ।
ବିଶ୍ବବାସୀଙ୍କ ସମେତ ସରକାର ମହାମାରୀ ବିରୋଧରେ ଲଢେଇ କରି କିଛି ମାସ ମଧ୍ୟରେ ସଂକ୍ରମଣକୁ ନିୟନ୍ତ୍ରଣରେ ଆଣିଛନ୍ତି । ଟୀକାକରଣ ସହିତ ଲକଡାଉନ ସଟଡାଉନ ଆଦି ନିୟମ ଲାଗୁ ହେବା ଦ୍ବାରା ଏହି ସଂକ୍ରମଣ ନିୟନ୍ତ୍ରଣକୁ ଆସିବା ପରେ ନୂଆ ଭାରିଆଣ୍ଟକୁ ନେଇ ସତର୍କ କରାଯାଇଛି । ଏହି ଡେଲଟା ଭ୍ୟାରିଆଣ୍ଟ ବିଶ୍ବର ପ୍ରାୟ 111ଟି ଦେଶରେ ରହିଛି । ତେବେ ଏହା ଖୁବଶୀଘ୍ର କୋଭିଡ ଭାଇରସର ସକ୍ରିୟ ଷ୍ଟ୍ରେନ ହୋଇ ବିଶ୍ବରେ ବ୍ୟାପିବାର ସମ୍ଭାବନା ରହିଛି ବୋଲି ସେ କହିଛନ୍ତି ।
ବର୍ତ୍ତମାନ ମଧ୍ୟ ଅନେକ ଦେଶରେ ଏପର୍ଯ୍ୟନ୍ତ ଟୀକାକରଣ ହୋଇନାହିଁ । ପ୍ରତିଟି ଦେଶ ନିଜ ଜନସଂଖ୍ୟାର ପ୍ରାୟ 10 ପ୍ରତିଶତଙ୍କୁ ସେପ୍ଟେମ୍ବର ସୁଦ୍ଧା ଟିକା ଦିଅନ୍ତୁ ବୋଲି ସଂଗଠନ ଅପିଲ କରିଛି । ଏହାସହିତ 2021 ସୁଦ୍ଧା ମୋଟ ଜନସଂଖ୍ୟାର 40 ପ୍ରତିଶତ ଓ 2022 ମଧ୍ୟ ସୁଦ୍ଧା 70 ପ୍ରତିଶତ ଲୋକଙ୍କୁ ଟିକା ଦେବା ପାଇଁ ସେ ଅପିଲ କରିଛନ୍ତି । କେବଳ ଟିକା ମହାମାରୀକୁ ରୋକି ପାରିବ ନାହିଁ । ଆମକୁ ଲଗାତର ଭାବରେ ସମସ୍ତ ନିୟମ ମାନିବାକୁ ପଡିବ ବୋଲି ଟେଡ୍ରସ କହିଛନ୍ତି ।
@ANI
