କୋଲକାତା: ହତ୍ୟା ଅଭିଯୋଗରେ ଦୋଷୀ ସାବ୍ୟସ୍ତ ହୋଇ ଆଜୀବନ ସଜ୍ଜା କାଟୁଥିବା ବାପାଙ୍କୁ ମୁକ୍ତ କରିବା ପାଇଁ ଜଜଙ୍କ ଦସ୍ତଖତ ନକଲ କଲାପୁଅ । ସେ ପୁଣି କୋଲକାତା ହାଇକୋର୍ଟର ମୁଖ୍ୟ ବିଚାରପତିଙ୍କ ଦସ୍ତଖତର ନକଲ । ହେଲେ ଜଜଙ୍କ ଆଦେଶରେ ଜାରି ବେଲ ଅନୁମତି ମିଥ୍ୟା ଓ ଦସ୍ତଖତ ନକଲ କରାଯାଇଥିବା ତଳକୋର୍ଟରେ ଜଣାପଡିବା ପରେ ଯୁବକଙ୍କୁ କୋଲକାତା ସିଆଇଡି ଗିରଫ କରିଛି । ପଶ୍ଚିମବଙ୍ଗର ମୁର୍ସିଦାବାଦ ଅଞ୍ଚଳରେ ଏହି ଘଟଣା ସାମ୍ନାକୁ ଆସିଛି । ଯୁବକ ଜଣକ କେହି ଜଣେ ଓକିଲଙ୍କ ସହାୟତାରେ ଏପରିକରିଥିବା ନେଇ ସିଆଇଡି ସନ୍ଦେହ କରୁଛି ।
ତେବେ ପୁରା ମାମଲା କିଛି ଏହିପରି । ଲାଲୁ ଶେଖ ନାମକ ଜଣେ ଅଭିଯୁକ୍ତ ଏକ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇ ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିଲା । ସେ ଏବେ ଜେଲର ଚାରିକାନ୍ଥ ଭିତରେ ଅଛି । ଲାଲୁର ପୁଅ ଲାବୁ ଶେଖ ଏହି ମାମଲାରେ ବାପାଙ୍କ ଜାମିନ କରିବା ପାଇଁ ହାଇକୋର୍ଟଙ୍କ ମୁଖ୍ୟ ବିଚାରପତିଙ୍କ ନକଲ ହସ୍ତାକ୍ଷର ମାଧ୍ୟମରେ ଏକ ମିଛ ବେଲ ପେପର ପ୍ରସ୍ତୁତ କରିଥିଲା । ଏହା ପରେ ସେ ନିଜ ଦୋଷୀ ପିତାଙ୍କୁ ମୁକ୍ତ କରିବା ପାଇଁ ଏହି ମିଛ ବେଲ ଅର୍ଡର ସହ ପଶ୍ଚିମବଙ୍ଗର କାଣ୍ଡି ଜିଲ୍ଲା କୋର୍ଟରେ ଦ୍ବାରସ୍ଥ ହୋଇଥିଲା ।
ନିଜ ବାପାଙ୍କୁ ହାଇକୋର୍ଟରୁ ବେଲ ମିଳି ସାରିଥିବା ଦର୍ଶାଇ ସେ ତଳ କୋର୍ଟରେ ଆବେଦନ କରିଥିଲେ । ଏହି ସମୟରେ ସରକାରୀ ଓକିଲଙ୍କୁ ଏହି ବେଲ ଅର୍ଡର ନେଇ ସନ୍ଦେହ ହେବା ପରେ ସେ ଆଇନଗତ ଭାବେ ଏହାର ଅନୁମତି ପ୍ରକ୍ରିୟାକୁ ଯାଞ୍ଚ କରିଥିଲେ । ତେବେ ଉଚ୍ଚ ନ୍ୟାୟାଳୟରେ ଏହି ମାମଲାରେ କୌଣସି ବେଲ ଆବେଦନ ହୋଇନଥିବା ଜଣାପଡିଥିଲା । ସେହିପରି ବେଲ ଅର୍ଡରରେ ଥିବା ମୁଖ୍ୟ ବିଚାରପତିଙ୍କ ହସ୍ତାକ୍ଷର ମଧ୍ୟ ନକଲ କରାଯାଇଥିବା ସ୍ପଷ୍ଟ ହେବା ପରେ ତଳ କୋର୍ଟ ଏହି ମାମଲାକୁ ସିଆଇଡିକୁ ହସ୍ତାନ୍ତର କରିଥିଲେ ।
ଏହା ମଧ୍ୟ ପଢନ୍ତୁ :-ମୋଇତ୍ରା-ଥରୁର ଡିନର ଫଟୋ ଭାଇରାଲ, ବିଜେପିକୁ ଦାୟୀ କଲେ ମହୁଆ
ସିଆଇଡି ଏବେ ଅଭିଯୁକ୍ତ ଲାବୁ ଶେଖକୁ ଗିରଫ କରି ଜେରା କରୁଛି । ଏହି ସମସ୍ତ ଜାଲ ଦଲିଲ ପ୍ରସ୍ତୁତ କରିବାରେ ଅଭିଯୁକ୍ତ ଜଣେ ଆଇନଜୀବୀଙ୍କ ସାହାଯ୍ୟ ନେଇଥିବା ମଧ୍ୟ ପୋଲିସ ସନ୍ଦେହ କରୁଛି । ତେବେ କେଉଁ କୋର୍ଟର ଓକିଲ ଏଥିରେ ଅଭିଯୁକ୍ତକୁ ସହଯୋଗ କରିଥିଲେ । ସେ କିପରି ମୁଖ୍ୟ ବିଚାରପତିଙ୍କ ହସ୍ତାକ୍ଷର ନକଲ କରିବାରେ ସକ୍ଷମ ହେଲେ ସେ ନେଇ ତଦନ୍ତ ଜାରି ରଖିଛି ସିଆଇଡି । ଖୁବଶିଘ୍ର ଏନେଇ ସମ୍ପୃକ୍ତ ଓକିଲଙ୍କୁ ମଧ୍ୟ ଗିରଫ କରାଯିବା ନେଇ ସିଆଇଡି ପକ୍ଷରୁ କୁହାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
