କୋଲକାତା: ମହାପୁରୁଷ ମହମ୍ମଦଙ୍କୁ ନେଇ ପୂର୍ବତନ ବିଜେପି ନେତା ନୂପୁର ଶର୍ମାଙ୍କ ବୟାନ ପରେ ଦେଶର ବିଭିନ୍ନ ସ୍ଥାନରେ ଜାରି ରହିଛି ହିଂସା । ଉତ୍ତକ୍ତ ଲୋକମାନେ ନୂପୁର ଶର୍ମାଙ୍କ ଗିରଫ ଦାବି କରି ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରିଥିଲେ । ହାଓ୍ବଡାରେ ଉପଦ୍ରବକାରୀଙ୍କ ଦ୍ବାରା ପଥର ମାଡ଼, ବ୍ୟାପକ ପୋଡ଼ାଜଳା ଓ ଭଙ୍ଗାରୁଜା ଘଟଣା ପରେ ଅଧିକାଂଶ ଅଞ୍ଚଳରେ ଇଣ୍ଟରନେଟ ସେବା ବନ୍ଦ କରିବା ସହ ୧୪୪ଧାରା ଲାଗୁ କରାଯାଇଛି । ପରିସ୍ଥିତିକୁ ନିୟନ୍ତ୍ରଣ କରିବା ନିମନ୍ତେ ସରକାରଙ୍କ ପକ୍ଷରୁ ଏହି କଠୋର ନିଷ୍ପତ୍ତି ଗ୍ରହଣ କରାଯାଇଛି ।
ସୂଚନାଅନୁସାରେ, ବେଲଡାଙ୍ଗା ଥାନା ଅଞ୍ଚଳରେ ବେଲଡାଙ୍ଗା ୧ ବ୍ଲକ ଓ ଶକ୍ତିପୁର ଥାନା ଅଞ୍ଚଳକୁ କଭର କରୁଥିବା ବେଲଡାଙ୍ଗା ୨ ବ୍ଲକରେ ଇଣ୍ଟରନେଟ୍ ସେବାକୁ ଜୁନ୍ ୧୪ ସକାଳ ୬ଟା ପର୍ଯ୍ୟନ୍ତ ବନ୍ଦ କରି ଦିଆଯାଇଛି । ସେହିପରି ପୁରା ହାଓଡ଼ା ଅଞ୍ଚଳରେ ଜୁନ୍ ୧୩ ପର୍ଯ୍ୟନ୍ତ ଇଣ୍ଟରନେଟ୍ ସେବାକୁ ବନ୍ଦ କରାଯାଇଛି ଓ ଜୁନ୍ ୧୫ପର୍ଯ୍ୟନ୍ତ ଉଲୁବେରିଆ, ଡୋମାଜୁର ଓ ପଞ୍ଚଲା ଭଳି ଅଞ୍ଚଳରେ ୧୪୪ ଧାରା ଲାଗୁ କରାଯାଇଛି । ଏହାସହ 5ରୁ ଅଧିକ ଲୋକଙ୍କ ସମାବେଶ ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି । ନିୟମ ଉଲ୍ଲଂଘନ କରୁଥିବା ବ୍ୟକ୍ତିଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ସୂଚନା ଦିଆଯାଇଛି ।
