ନୂଆଦିଲ୍ଲୀ: ଉତ୍ତର ପ୍ରଦେଶରେ ଲାଗୁ ହେବନି ଲକଡାଉନ । ଆହ୍ଲାବାଦ ହାଇକୋର୍ଟଙ୍କ ନିର୍ଦ୍ଦେଶ ଉପରେ ରୋକ ଲଗାଇଲେ ସୁପ୍ରିମକୋର୍ଟ । ବଢୁଥିବା କୋରୋନା ସଂକ୍ରମଣକୁ ନେଇ ଉତ୍ତରପ୍ରଦେଶର 5 ସହରରେ ଲକଡାଉନ କରିବାକୁ ଗତକାଲି(ସୋମବାର) ହାଇକୋର୍ଟ ନିର୍ଦ୍ଦେଶ ଦେଇଥିଲେ ।
ଆହ୍ଲାବାଦ ହାଇକୋର୍ଟଙ୍କ ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରି ଉତ୍ତରପ୍ରଦେଶ ସରକାର ଆଜି ସୁପ୍ରିମକୋର୍ଟର ଦ୍ବାରସ୍ଥ ହୋଇଥିଲେ । ଉଚ୍ଚ ନ୍ୟାୟାଳୟଙ୍କ ପାଖରେ ଏଭଳି କୌଣସି ନିର୍ଦ୍ଦେଶ ଜାରି କରିବାର ଅଧିକାର ନାହିଁ ବୋଲି ରାଜ୍ୟ ସରକାର କହିଥିଲେ । ସୁପ୍ରିମକୋର୍ଟର ମୁଖ୍ୟ ବିଚାରପତି ଜଷ୍ଟିସ ଏସ.ଏ ବୋବେଡ ଖଣ୍ଡପୀଠରେ ଏହି ମାମଲାର ଶୁଣାଣି କରିଥିଲେ ।
ଏହାପୂର୍ବରୁ ସଲିସିଟିର ଜେନେରାଲ ତୁଷାର ମେହେଟ୍ଟା ତୁରନ୍ତ ଶୁଣାଣି କରିବାକୁ ମୁଖ୍ୟ ବିଚାରପତିଙ୍କ ନେତୃତ୍ବାଧୀନ ଏକ ବେଞ୍ଚକୁ ପଠାଇଥିଲେ ।
ଆହ୍ଲାବାଦ ହାଇକୋର୍ଟ ଉତ୍ତରପ୍ରଦେଶ ସରକାରଙ୍କୁ ସବୁଠାରୁ ଅଧିକ ପ୍ରଭାବିତ ସହରରେ ଲକଡାଉନ ଲାଗୁ କରିବାକୁ ନିର୍ଦ୍ଦେଶ ଦେଇଥିଲେ । ଏହା ସହ ସେହି ଅଞ୍ଚଳ ଗୁଡିକରେ ଟ୍ରାକିଂ, ଟେଷ୍ଟିଂ ଓ ଟ୍ରିଟମେଣ୍ଟ ଉପରେ ଗୁରୁତ୍ବାରୋପ ଦେବାକୁ କହିଥିଲେ ।
ଉତ୍ତରପ୍ରଦେଶ ସରକାର ନବରାତ୍ରୀ ଓ ରମଜାନକୁ ଦେଖି ବିଭିନ୍ନ ଧାର୍ମିକ ଅନୁଷ୍ଠାନ ଗୁଡିକରେ କଟକଣା ଲାଗୁ କରିଛନ୍ତି । ଗୋଟିଏ ସ୍ଥାନରେ 5 ଜଣ ରହିବେ ନାହିଁ । ତେବେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ରାଜ୍ୟରେ ଲକଡାଉନ ଲାଗୁ କରାଯିବ ନାହିଁ ବୋଲି କହିଥିଲେ ।
