ଲକ୍ଷ୍ମୌ: ତାମିଲନାଡୁ ମୁଖ୍ୟମନ୍ତ୍ରୀଙ୍କ ପୁଅ ତଥା ମନ୍ତ୍ରୀ ଉଦୟନିଧି ଷ୍ଟାଲିନଙ୍କ ସନାତନ ଧର୍ମ ବିରୋଧି ମନ୍ତବ୍ୟକୁ ନେଇ ସରଗରମ ରାଜନୀତି । ଉଦୟନିଧି ଷ୍ଟାଲିନଙ୍କ ଧର୍ମ ବିରୋଧି ମତକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି । ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉଦୟନିଧି ଷ୍ଟାଲିନଙ୍କୁ କଡା କଟାକ୍ଷ କରିଛନ୍ତି । ଯିଏ ଧର୍ମକୁ ବିନାଶ କରିବାକୁ ଚାହିଁବ ସେ ନିଜେ ବିନାଶ ହୋଇଯିବ ବୋଲି କହିଛନ୍ତି ଯୋଗୀ ଆଦିତ୍ୟନାଥ ।
ଜନ୍ମାଷ୍ଟମୀ ଅବସରରେ ଗୁରୁବାର ଦିନ ଉତ୍ତରପ୍ରଦେଶର ରାଜଧାନୀ ଲକ୍ଷ୍ମୌ ସ୍ଥିତ ପୋଲିସ ଲାଇନ ଗ୍ରାଉଣ୍ଡରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ମୁଖ୍ୟମନ୍ତ୍ରୀ ଆଦିତ୍ୟନାଥ ଯୋଗୀ । ମୁଖ୍ୟମନ୍ତ୍ରୀଙ୍କ ସମେତ ମହୋତ୍ସବରେ ଉପମୁଖ୍ୟମନ୍ତ୍ରୀ ବ୍ରିଜେଶ ପାଠକ, ମୁଖ୍ୟ ସଚିବ ଦୁର୍ଗା ଶଙ୍କର ମିଶ୍ରା, ଡିଜିପି ବିଜୟ କୁମାର ସମେତ ଅନ୍ୟ ଅଧିକାରୀମାନେ ସାମିଲ ହୋଇଥିଲେ । ସେଠାରେ ଜନ୍ମାଷ୍ଟମୀ ମହୋତ୍ସବ ପାଳନ କରିବା ସହ ସନାତନ ଧର୍ମ ନେଇ ମତ ରଖିଥିଲେ ।
ଏହାମଧ୍ୟ ପଢନ୍ତୁ.. Sanatana Dharma row: ଉଦୟାନିଧିଙ୍କ ନାମରେ ସୁପ୍ରିମକୋର୍ଟରେ ମାମଲା
ଉଦୟନାଥ ଷ୍ଟାଲିନଙ୍କ ଧର୍ମ ବିରୋଧି ମତକୁ କଡା କଟାକ୍ଷ କରିବାକୁ ଯାଇ ଯୋଗୀ କହିଥିଲେ," ଯିଏ ସନାତନ ଧର୍ମ ବିନାଶ କରିବାକୁ ଚାହିଁବ ସେ ନିଜେ ବିନାଶ ହୋଇଯିବେ । ସନାତନ ଧର୍ମକୁ ବିନାଶ କରିବାକୁ ରାବଣ ଚେଷ୍ଟା କରିଥିଲା । ସନାତନ ଧର୍ମ ଧ୍ୱଂସ କରିବାକୁ କଂସ ବି ଚେଷ୍ଟା କରିଥିଲା । ହେଲେ ସନାତନ ଧର୍ମର ବିନାଶ ହେଲାନି ବରଂ ଧର୍ମର ବିନାଶକାରୀ ନିଜେ ବିନାଶ ହୋଇଗଲେ ।"
ଏହାମଧ୍ୟ ପଢନ୍ତୁ.. Udhayanidhi Stalin Remark: 'ଇଣ୍ଡିଆ ମେଣ୍ଟର ଏଜେଣ୍ଡା ସନାତନ ଧର୍ମର ସମୂଳ ବିନାଶ'
ସୂଚନା ଥାଉ କି, ଉଦୟନିଧି ଷ୍ଟାଲିନ ଶନିବାର ଦିନ ସନାତନ ଧର୍ମକୁ ନେଇ ଆପତ୍ତିଜନକ ମନ୍ତବ୍ୟ ଦେଇଥିଲେ । ଏହି ଧର୍ମକୁ ସମୂଳ ବିନାଶ କରିଦେବା ଉଚିତ ବୋଲି କହିଥିଲେ ଉଦୟନିଧି । ଏପରିକି ଉଦୟନିଧି ସନାତନ ଧର୍ମକୁ ଡେଙ୍ଗୁ, କୋରୋନା ଭାଇରସ, ମ୍ୟାଲେରିଆ ସହ ତୁଳନା କରିଥିଲେ । ଏହା ବିରୋଧରେ ଲଢିବା ବଦଳରେ ସମୂଳ ବିନାଶ କରିବା ଉଚିତ ବୋଲି କହିଥିଲେ ।
ଅନ୍ୟପଟେ ଧର୍ମବିରୋଧି ମତ ଦେଇ ଅଡୁଆରେ ଉଦୟନିଧି ଷ୍ଟାଲିନ । ସାରା ଦେଶରେ ଏହି ପ୍ରସଙ୍ଗ ରାଜନୈତିକ କେନ୍ଦ୍ରବିନ୍ଦୁ ପାଲଟିଥିବା ବେଳେ ସର୍ବୋଚ୍ଚ ନ୍ୟାୟାଳୟରେ ବି ଏହି ମାମଲା ପହଞ୍ଚିଛି । ଦିଲ୍ଲୀର ଭିନିତ ଜିନ୍ଦଲ ନାମକ ଜଣେ ଆଇନଜୀବୀ ଏହି ଆବେଦନ ଦାଖଲ କରିଛନ୍ତି । ଉଦୟନିଧି ଷ୍ଟାଲିନଙ୍କ ବିରୋଧରେ ଗିରଫ ପରଓ୍ୱାନା ଜାରି କରିବା ପାଇଁ କୋର୍ଟ ନିର୍ଦ୍ଦେଶ ଦେବାକୁ ଏହି ପିଟିସନରେ ଦର୍ଶାଯାଇଛି । ଏହା ଏକ ଧାର୍ମିକ ଘୃଣାସୃଷ୍ଟିକାରୀ ମନ୍ତବ୍ୟ ହୋଇଥିବା ବେଳେ କାହିଁକି ସ୍ଥାନୀୟ ଚେନ୍ନାଇ ଓ ଦିଲ୍ଲୀ ପୋଲିସ ଏପର୍ଯ୍ୟନ୍ତ ନିଜ ଆଡୁ ମାମଲା ରୁଜୁ କରିନାହାନ୍ତି, କୋର୍ଟ ସେ ସମ୍ପର୍କରେ ବି ହସ୍ତକ୍ଷେପ କରିବାକୁ ଆବେଦନରେ ଉଲ୍ଲେଖ କରିଛନ୍ଚି ଆଇନଜୀବୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
