ଲକ୍ଷ୍ନୌ: ଉତ୍ତର ପ୍ରଦେଶର କରହଲ ବିଧାନସଭା ଆସନରୁ ଅଖିଳେଶ ଯାଦବଙ୍କ ବିରୋଧରେ ନିର୍ବାଚନ ଲଢିବେ କେନ୍ଦ୍ରମନ୍ତ୍ରୀ ଏସପି ସିଂ ବାଘେଲ । ତେବେ ବଘେଲ ଆଜି ଜିଲ୍ଲା ମୁଖ୍ୟାଳୟରେ ତାଙ୍କ ନାମାଙ୍କନ ପତ୍ର ଦାଖଲ କରିଛନ୍ତି । ତାର କିଛି ଘଣ୍ଟା ପୂର୍ବରୁ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ମଧ୍ୟ ଏହି ଆନସରୁ ନିଜ ନାମାଙ୍କନ ପତ୍ର ଦାଖଲ କରିଥିଲେ ।
ବଘେଲ ବର୍ତ୍ତମାନ ଆଇନ ଓ ସାମାଜିକ ନ୍ୟାୟ ମନ୍ତ୍ରଣାଳୟରେ ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ ତୁଲାଉଛନ୍ତି । ଉତ୍ତର ପ୍ରଦେଶରେ ଅଖିଳେଶ ଯାଦବଙ୍କ ସମାଜବାଦୀ ପାର୍ଟି ଓ କ୍ଷମତାରେ ଥିବା ବିଜେପି ମଧ୍ୟରେ ମୁଖ୍ୟ ପ୍ରତିଦ୍ବନ୍ଦିତା ହେବାକୁ ଯାଉଛି । ସମାଜବାଦୀ ପାର୍ଟିର ପାରମ୍ପାରିକ ଗଡ ତଥା ବାପା ମୁଲାୟମ ସିଂ ଯାଦବଙ୍କ ସୁରକ୍ଷିତ ଆସନ କୁହାଯାଉଥିବା କରହଲରୁ ପ୍ରାର୍ଥୀ ହୋଇଛନ୍ତି ଅଖିଳେଶ ।
ତେବେ ଆଜି ବିଜେପି ପକ୍ଷରୁ କେନ୍ଦ୍ରମନ୍ତ୍ରୀ ଏସପି ସିଂ ବଘେଲ ପ୍ରାର୍ଥୀ ହେବା ପରେ ଉଭୟଙ୍କ ମଧ୍ୟରେ ପ୍ରତିଦ୍ବନ୍ଦିତା ତୀବ୍ର ହେବ ବୋଲି ଆଶା କରାଯାଉଛି । ଆଜି ବିଜେପି ପ୍ରାର୍ଥୀ ନାମାଙ୍କନ ଦାଖଲ କରିବା ପରେ ପ୍ରତିକ୍ରିୟା ରଖିଛନ୍ତି ଅଖିଳେଶ । ବିଜେପି ସେଠାରୁ ନିର୍ବାଚନ ହାରିବା ସହ ସପା ଭଲ ବ୍ୟବଧାନରେ ନିର୍ବାଚନ ଜିତିବ ବୋଲି କହିଛନ୍ତି ଅଖିଳେଶ ।
ବ୍ୟୁରୋ ରିପୋର୍ଟ, ଇଟିଭି ଭାରତ
