ଶ୍ରୀନଗର: ଘାଟିରେ ସୁରକ୍ଷାକର୍ମୀଙ୍କୁ ବଡ ସଫଳତା । ଜମ୍ମୁ କାଶ୍ମୀରର ଟ୍ରାଲରେ ବଡ ଏନକାଉଣ୍ଟର । ସୁରକ୍ଷାକର୍ମୀଙ୍କ ଗୁଳିରେ ଆତଙ୍କୀ ସଂଗଠନ ଜୈଶ-ଏ-ମହମ୍ମଦର ଟପ୍ କମାଣ୍ଡର ଶାମ ସୋଫିର ଗଡିଛି ମୁଣ୍ଡ । ଏନେଇ ସୂଚନା ଦେଇଛନ୍ତି କାଶ୍ମୀର ଆଇଜିପି ବିଜୟ କୁମାର ।
ଅବନ୍ତିପୋରାର ଟ୍ରାଲରେ ଗୁଳିବିନିମୟ ଆରମ୍ଭ ହୋଇଥିଲା । ପୋଲିସ ଓ ସୁରକ୍ଷାକର୍ମୀଙ୍କ ମିଳିତ ପ୍ରୟାସରେ ଚାଲିଥିଲା ଅପରେସନ । ଗତ 2 ଦିନରେ 5 ଆତଙ୍କୀଙ୍କୁ ନିପାତ କରିସାରିଛନ୍ତି ସୁରକ୍ଷାକର୍ମୀ । ସୋପିଆନରେ ସୋମବାର ଓ ମଙ୍ଗଳବାର ସୁରକ୍ଷାକର୍ମୀଙ୍କ ଅପରେସନରେ 5 ଆତଙ୍କବାଦୀଙ୍କ ନିହତ ହୋଇଛି । ସୋପିଆନ ତୁଲରାନ ଓ ଫେରିପୋରା ଅଞ୍ଚଳରେ ହୋଇଥିବା ଏହି ଅପରେସନରେ ସିଆପପିଏଫର 187 ବାଟାଲିଅନ, ରାଷ୍ଟ୍ରୀୟ ରାଇଫଲ ଓ ଜମ୍ମୁ କାଶ୍ମୀର ପୋଲିସର ଯବାନ ସାମିଲ ଥିଲେ ।
ଘାଟିରେ ଆତଙ୍କବାଦୀଙ୍କ ଗତିବିଧି ବୃଦ୍ଧି ପାଇଛି । ସାଧାରଣ ଲୋକଙ୍କୁ ଟାର୍ଗେଟ କରୁଛନ୍ତି ଆତଙ୍କୀ । ଜମ୍ମୁ କାଶ୍ମୀରରେ ଗତ କିଛି ଦିନ ହେବ ଆତଙ୍କବାଦୀଙ୍କ ଗୁଳିରେ ଅନେକ ସାଧାରଣ ଲୋକେ ପ୍ରାଣ ହରାଇସାରିଲେଣି । ଏମାନଙ୍କ ମଧ୍ୟରେ 2 ଶିକ୍ଷକ ଓ କାଶ୍ମୀର ପଣ୍ଡିତ ମଧ୍ୟ ସାମିଲ ଅଛନ୍ତି । ସେପଟେ ଅପରେସନ ସମୟରେ ଆତଙ୍କୀଙ୍କ ଗୁଳିରେ 5 ଜଣ ସୁରକ୍ଷାକର୍ମୀ ଶହୀଦ ହୋଇଥିଲେ ।
