ମୁମ୍ବାଇ: ମହାରାଷ୍ଟ୍ରରେ କୋଭିଡ ସ୍ଥିତି ଗମ୍ଭୀର ହେବାରେ ଲାଗିଛି । ଏହି ପରିସ୍ଥିତିରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ସର୍ବ ଦଳୀୟ ବୈଠକରେ ରାଜ୍ୟରେ କୋଭିଡ ସ୍ଥିତି ଅନୁଧ୍ୟାନ କରିଛନ୍ତି । ଭର୍ଚୁଆଲରେ ଆୟୋଜିତ ସର୍ବଦଳୀୟ ବୈଠକରେ ମହାରାଷ୍ଟ୍ର ସରକାରଙ୍କ କ୍ୟାବିନେଟ ମନ୍ତ୍ରୀମାନଙ୍କ ସହ ବିରୋଧୀ ଦଳ ନେତା ଦେବେନ୍ଦ୍ର ଫଡନାଭିସ ମଧ୍ଯ ଯୋଗ ଦେଇଛନ୍ତି । ବୈଠକରେ ରାଜ୍ୟରେ ସାମ୍ପ୍ରତିକ କୋଭିଡ ସ୍ଥିତି ସମୀକ୍ଷା ସହ ମୁକାବିଲା ରଣନୀତି ଉପରେ ଆଲୋଚନା ହୋଇଛି । ତେବେ ରାଜ୍ୟରେ କୋଭିଡ ସ୍ଥିତି ଅତି ଗମ୍ଭୀର ପର୍ଯ୍ୟାୟରେ ପହଞ୍ଚିଥିବାବେଳେ ଏନେଇ ସରକାର କଣ ବଡ ନିଷ୍ପତ୍ତି ନେଉଛନ୍ତି ତାହା ଆସନ୍ତାକାଲି (ରବିବାର) ସ୍ପଷ୍ଟ ହେବ ।
ବର୍ତ୍ତମାନର ସ୍ଥିତିକୁ ଦେଖି ରାଜ୍ୟରେ ଲକଡାଉନ ଲାଗୁ ହେବାନେଇ ଚର୍ଚ୍ଚା ଜାରି ରହିଥିବାବେଳେ ଆସନ୍ତାକାଲି ଟାକ୍ସ ଫୋର୍ସର ସୁପାରିଶ ଆଧାରରେ କିଛି ବଡ ନିଷ୍ପତ୍ତି ନିଆଯାଇପାରେ ବୋଲି ସୂଚନା ରହିଛି । ମୁଖ୍ୟମନ୍ତ୍ରୀ ଉଦ୍ଧଭ ଠାକରେ ମୁଖ୍ୟମନ୍ତ୍ରୀ କାର୍ଯ୍ୟାଳୟରୁ ଭିସି ଯୋଗେ ଏହି ଆଲୋଚନା କରିଛନ୍ତି ।
ମହାରାଷ୍ଟ୍ରରେ ବିଭିନ୍ନ ସ୍ଥାନରେ ସଂକ୍ରମଣର ଦ୍ବିତୀୟ ଲହରକୁ ଦେଖି ସରକାର କଟକଣାକୁ କଡାକଡି କରିବାରେ ଲାଗିଛନ୍ତି । କିଛି ସ୍ଥାନରେ ରାତ୍ରକାଳୀନ କର୍ଫ୍ୟୁ ମଧ୍ୟ ଜାରି କରିଛନ୍ତି ସରକାର । ଆଜି କୋଭିଡ ସ୍ଥିତି ନେଇ ହୋଇଥିବା ଆଲୋଚନା ସମ୍ପର୍କରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
