ଜୟପୁର: ରାଜସ୍ଥାନର ବହୁଚର୍ଚ୍ଚିତ ନାଲି ଡାଏରୀ ପ୍ରସଙ୍ଗରେ ଆଜି ପୁଣି ମୁଖ୍ୟମନ୍ତ୍ରୀ ଓ କଂଗ୍ରେସକୁ ଘେରିଛନ୍ତି ଗେହେଲଟ କ୍ୟାବିନେଟରୁ ବରଖାସ୍ତ ମନ୍ତ୍ରୀ ରାଜେନ୍ଦ୍ର ଗୁଡ୍ଡା । ରାଜେନ୍ଦ୍ର ଆଜି ଏହି ତଥାତଥିତ ଦୁର୍ନୀତି ଡାଏରୀର 3ପୃଷ୍ଠା ସାର୍ବଜନୀନ କରିଛନ୍ତି । ଦାବି କରିଛନ୍ତି, ଏଥିରେ ରାଜସ୍ଥାନ କ୍ରିକେଟ ଆସୋସିଏନ ନିର୍ବାଚନରେ ହୋଇଥିବା ଭ୍ରଷ୍ଟାଚାର ସମ୍ପର୍କିତ ତଥ୍ୟ ରହିଛି । ଡାଏରୀରେ ଲେଖାଥିବା ହସ୍ତାକ୍ଷର କଂଗ୍ରେସ ନେତା ଧର୍ମେନ୍ଦ୍ର ରାଠୋରଙ୍କର । ଏହି ହସ୍ତାକ୍ଷରକୁ ଯାଞ୍ଚ କଲେ, ତାଙ୍କ କଥାରେ କେତେ ସତ୍ୟତା ରହିଛି ତାହା ସ୍ପଷ୍ଟ ହେବ ବୋଲି ମଧ୍ୟ ସେ ଦାବି କରିଛନ୍ତି ।
ଏହି 3ପୃଷ୍ଠାରେ ରାଜ୍ୟ କ୍ରିକେଟ ଆସୋସିଏସନ ନିର୍ବାଚନର ଭ୍ରଷ୍ଟାଚାର ସହ ଏଥିରେ ମୁଖ୍ୟମନ୍ତ୍ରୀ ଅଶୋକ ଗେହେଲଟଙ୍କ ପୁଅ ତଥା ବର୍ତ୍ତମାନ ରାଜ୍ୟ କ୍ରିକେଟ ସଂଘ ସଭାପତି ବୈଭବ ଗେହେଲଟଙ୍କ ନାମ ଥିବା ମଧ୍ୟ ସେ ଦାବି କରିଛନ୍ତି । ଡାଏରୀର କିଛି ପୃଷ୍ଠା ସେ ଆଜି ଗଣମାଧ୍ୟମ ସମ୍ମୁଖରେ ସାର୍ବଜନୀନ କରିଛନ୍ତି । କହିଛନ୍ତି ରାଜ୍ୟ କ୍ରିକେଟ ସଂଘ ନିର୍ବାଚନରେ ଭୋଟ କିଣାଯାଇଛି । ଏହି ସମ୍ପର୍କରେ ବହୁ ଗୁପ୍ତ ତଥ୍ୟ ଏହି ଡାଏରୀରେ ଉଲ୍ଲେଖ ରହିଛି । ସେ ଏହି ଡାଏରୀରେ ଥିବା ସମସ୍ତ ତଥ୍ୟର ଖୁଲାସା କରିବେ ।
ଗତମାସ 24 ତାରିଖରେ ଗୁଡ୍ଡା ଗେହେଲଟଙ୍କ କ୍ୟାବିନେଟରୁ ବରଖାସ୍ତ ହୋଇଥିଲେ । ରାଜ୍ୟରେ ମହିଳାଙ୍କ ପ୍ରତି ହେଉଥିବା ଅପରାଧ ପ୍ରସଙ୍ଗରେ ସେ ନିଜ ସରକାର ବିରୋଧରେ ପ୍ରଶ୍ନ କରିବାରୁ ତାଙ୍କୁ କ୍ୟାବିନେଟରୁ ବରଖାସ୍ତ କରାଯାଇଥିବା ସେ ଅଭିଯୋଗ କରିଥିଲେ । ଏହାପରେ ସାମ୍ନାକୁ ଆସିଥିଲା ଗୁଡ୍ଡାଙ୍କ ନାଲି ଡାଏରୀ । ଗୁଡ୍ଡା ହାତରେ ଏକ ନାଲି ଡାଏରୀ ଧରି ବିଧାନସଭାକୁ ପ୍ରବେଶ କରିବାକୁ ଉଦ୍ୟମ କରିିଥିଲେ । ତାଙ୍କୁ ସୁରକ୍ଷା ଅଧିକାରୀମାନେ ରୋକିବା ସହ ଗୃହକୁ ପ୍ରବେଶ କରିବାକୁ ଦେଇନଥିଲେ ।
ଏହା ମଧ୍ୟ ପଢନ୍ତୁ :-PM Modi in Rajasthan:‘କଂଗ୍ରେସର ପରାଜୟର କାରଣ ହେବ ନାଲି ଡାଏରୀ’
ପ୍ରଥମ ଥର ଗୁଡ୍ଡା ସାଙ୍ଗରେ ଆଣିଥିବା ନାଲି ଡାଏରୀକୁ ନେଇ ଚର୍ଚ୍ଚା ଆରମ୍ଭ ହୋଇଥିଲା । ଗୁଡ୍ଡା କହିଥିଲେ, ସେ ସାଙ୍ଗରେ ଆଣିଥିବା ନାଲି ଡାଏରୀରେ ଗେହଲୋଟ ସରକାରଙ୍କ ବହୁ ଆର୍ଥିକ ଅନିୟମିତତାର ପ୍ରମାଣ ଥିଲା । ସେ ଏହାକୁ ବିଧାନସଭାରେ ଉପସ୍ଥାପିତ କରିବାକୁ ଆସିଥିଲେ । ହେଲେ ତାଙ୍କୁ ପ୍ରବେଶ କରିବା ପାଇଁ ଅନୁମତି ମିଳିଲା ନାହିଁ । ଏହାପରେ ଏହି ଡାଏରୀକୁ ନେଇ ରାଜନୀତି ଜାରି ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ରାଜସ୍ଥାନରେ ଜନସଭାକୁ ସମ୍ବୋଧିତ କରିବା ସମୟରେ ଏହି ତଥାକଥିତ ଦୁର୍ନୀତି ଡାଏରୀ ପ୍ରସଙ୍ଗ ଉଠାଇ ଗେହେଲଟ ସରକାରକୁ ସମାଲୋଚନା କରିଥିଲେ । କହିଥିଲେ ଏହି ଡାଏରୀ ରାଜ୍ୟରେ କଂଗ୍ରେସର ପରାଜୟର କାରଣ ହେବାକୁ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
