ହାଇଦ୍ରାବାଦ: କର୍ଣ୍ଣାଟକ ବିଧାନସଭା ନିର୍ବାଚନ ଫଳାଫଳରେ ବିଜେପି ପରାସ୍ତ ହୋଇ କଂଗ୍ରେସ ଶାସନ କ୍ଷମତା ହାତେଇବା ପରେ ବିବାଦୀୟ ବୟାନ ଦେଇଛନ୍ତି ବିଜେପିରୁ ନିଲମ୍ବିତ ତେଲେଙ୍ଗାନା ବିଧାୟକ ଟି.ରାଜା ସିଂ । ନିଲମ୍ବିତ ବିଜେପି ବିଧାୟକ ଟି.ରାଜା ସିଂ କନ୍ନଡ ହିନ୍ଦୁମାନଙ୍କୁ ବିଜେପିର ପରାସ୍ତ କରିବାରେ ଦାୟୀ କରିଛନ୍ତି । ସେ ଅଭିଯୋଗ କରିଛନ୍ତି ଯେ କର୍ଣ୍ଣାଟକର ହିନ୍ଦୁମାନେ ସେମାନଙ୍କର ଭୋଟକୁ କିଛି ହଜାର ଟଙ୍କାରେ ବିକ୍ରି କରିଥିଲେ । ସେମାନେ ଧର୍ମ ବଦଳରେ ଟଙ୍କା ବାଛିଥିଲେ । ସେଥିପାଇଁ ବିଜେପି ସେଠାରେ ପରାସ୍ତ ହେଲା ।
ହାଇଦ୍ରାବାଦର ଗୋଶାମାହାଲ ବିଧାନସଭା ଆସନରୁ ବିଧାୟକ ଥିବା ଟି ରାଜ ସିଂ ଟ୍ୱିଟରରେ ଏହି ଭିଡିଓ ସେୟାର କରିଛନ୍ତି । ସେ ଅଭିଯୋଗ କରିଛନ୍ତି ଯେ "ମୁଁ କର୍ଣ୍ଣାଟକରେ ହିନ୍ଦୁମାନଙ୍କୁ ସେମାନଙ୍କର ଭୋଟ୍ ବିକ୍ରି କରିଥିବାର ଦେଖି ନାହିଁ ଏବଂ କିଛି ହଜାର ଟଙ୍କା ପାଇଁ କଂଗ୍ରେସକୁ ଭୋଟ୍ ଦେଇଥିଲେ ବୋଲି ମଧ୍ୟ କହୁନାହିଁ । କିନ୍ତୁ ଏକାଧିକ ଗଣମାଧ୍ୟମର ରିପୋର୍ଟ ତଥା ଅନ୍ୟାନ୍ୟ ସୂତ୍ର ଅନୁଯାୟୀ ସେମାନେ ସେମାନଙ୍କର ଭୋଟ୍ ବିକ୍ରି କରିଥିବାର ସୂଚନା ମିଳୁଛି । ସେମାନେ ଧର୍ମ ପରିବର୍ତ୍ତେ ଟଙ୍କାକୁ ବାଛିଛନ୍ତି । ସେମାନେ ଏମିତି କାହିଁକି କଲେ ତାହା ମଧ୍ୟ ବୁଝା ପଡୁନାହିଁ ।’’
‘‘କର୍ଣ୍ଣାଟକରେ ଅନେକ ହିନ୍ଦୁ ସଂଗଠନର କର୍ମୀଙ୍କୁ ହତ୍ୟା କରାଯାଇଥିଲା । ବିଜେପି ପିଏଫ୍ଆଇ ଉପରେ ପ୍ରତିବନ୍ଧକ ଲଗାଇଥିଲା, କିନ୍ତୁ କଂଗ୍ରେସ ସେମାନଙ୍କୁ ମୁକ୍ତ କରିଥିଲା, ଯେଉଁମାନେ ପିଏଫ୍ଆଇ ସହିତ ଜଡିତ ଥିଲେ । କିନ୍ତୁ କର୍ଣ୍ଣାଟକବାସୀ ସେହି କଂଗ୍ରେସକୁ ଭୋଟ୍ ଦେଇଛନ୍ତି । ଦେଶର ବିନାଶ ପଛରେ ଥିବା ଏକ ଦଳ ପାଇଁ ଏକ ହଜାର ଟଙ୍କା ପାଇଁ କର୍ଣ୍ଣାଟକବାସୀ ଭୋଟ ଦେଇଛନ୍ତି । ଭାରତକୁ 'ହିନ୍ଦୁ ରାଷ୍ଟ୍ର' ଭାବରେ ଦେଖିବା ମୋ ପାଇଁ ଏକ ସ୍ବପ୍ନ କିନ୍ତୁ ଯେତେବେଳେ ହିନ୍ଦୁମାନେ ସେମାନଙ୍କର ଭୋଟ୍ ବିକ୍ରି କଲେ ଦୁର୍ଭାଗ୍ୟଜନକ, ଆମେ କିପରି 'ହିନ୍ଦୁ ରାଷ୍ଟ୍ର'କୁ ହୃଦୟଙ୍ଗମ କରିପାରିବା ।’’
ପୂର୍ବରୁ ମଧ୍ୟ ରାଜା ସିଂ ଅନେକ ବିବାଦୀୟ ବୟାନରେ ଫସିଛନ୍ତି । ନୂପୁର ଶର୍ମାଙ୍କ ସମର୍ଥନରେ ଦେଇଥିବା ବୟାନ ପାଇଁ ତାଙ୍କୁ ଜେଲା ଯିବାକୁ ପଡିଥିଲା । ନିକଟରେ ସେ ରାମ ନବମୀ ଶୋଭାଯାତ୍ରାରେ ମଧ୍ୟ ସାମ୍ପ୍ରଦାୟିକ ଉତ୍ତେଜକ ମନ୍ତବ୍ୟ ଦେଇଥିଲେ । ତାଙ୍କ ନାମରେ ମାମଲା ରୁଜୁ ହୋଇଥିଲା । ଏହି ବିବାଦୀୟ ବୟାନ ପାଇଁ ତାଙ୍କୁ ଭାରତୀୟ ଜନତା ପାର୍ଟି ଦଳରୁ ନିଲମ୍ବିତ ମଧ୍ୟ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
