କୋଲକାତା:‘ରାଜ୍ୟବାସୀ ରାଜ୍ୟର ଉନ୍ନତି ଧାରାରେ ସାମିଲ ହେବାକୁ ଭୋଟ ଦେବେ। କେବଳ ଲୋକଙ୍କୁ ମିଛ ଆଶ୍ବସନାକୁ ଭୋଟ ଦେବେନି ରାଜ୍ୟବାସୀ।’ ଏଭଳି ପ୍ରତିକ୍ରିୟା ଦେଇଛନ୍ତି ପଶ୍ଚିମବଙ୍ଗ ନନ୍ଦିଗ୍ରାମରୁ ପ୍ରତିଦ୍ବନ୍ଦିତା କରୁଥିବା ବିଜେପି ବିଧାୟକ ପ୍ରାର୍ଥୀ ଶୁଭେନ୍ଦୁ ଅଧିକାରୀ । ନନ୍ଦୀଗ୍ରାମ ସମେତ 30ଟି ବିଧାନସଭା ଆସନରେ ଭୋଟିଂ ଆରମ୍ଭ ହୋଇଛି । ନନ୍ଦିଗ୍ରାମରେ ଶୁଭେନ୍ଦୁ ଅଧିକାରୀଙ୍କ ସହ ପ୍ରତିଦ୍ବନ୍ଦିତା କରୁଛନ୍ତି ତୃଣମୂଳ କଂଗ୍ରେସ ଅଧ୍ୟକ୍ଷା ମମତା ବାନାର୍ଜୀ ।
ଗୁରୁବାର ନନ୍ଦୀଗ୍ରାମର ପୋଲିଂ ବୁଥ ବୁଲି ଦେଖିଥିଲେ ବିଜେପି ପ୍ରାର୍ଥୀ ଶୁଭେନ୍ଦୁ ଅଧିକାରୀ। ନନ୍ଦିଗ୍ରାମରେ ଭୋଟ ଦେବାପରେ ମମତା ବାନାର୍ଜୀଙ୍କ ଉପରେ ବର୍ଷିଥିଲେ ଶୁଭେନ୍ଦୁ ଅଧିକାରୀ । ସେ କହିଛନ୍ତି ଯେ, ‘ରାଜ୍ୟରେ ବେକାରୀ ସମସ୍ୟା ବଢ଼ିଥିବାରୁ ମମତାଙ୍କ ବିରୋଧରେ ସ୍ବର ଉତ୍ତୋଳନ କରିଛନ୍ତି ରାଜ୍ୟର ଯୁବଗୋଷ୍ଠୀ । ଚାଷୀମାନେ ମଧ୍ୟ ମମତାଙ୍କ ଉପରେ ସନ୍ତୁଷ୍ଟ ନାହାଁନ୍ତି । ଅମ୍ଫାନ ବାତ୍ୟା ବେଳେ ମଧ୍ୟ ଲୋକଙ୍କ ପାଇଁ ଆସିଥିବା ସହାୟତାକୁ ମଧ୍ୟ ସେ ଆତ୍ମସାତ କରିଛନ୍ତି । ପଶ୍ଚିମବଙ୍ଗରେ ମମତାଙ୍କୁ ନେଇ କେହି ବି ଖୁସି ନାହାନ୍ତି।’
ପଶ୍ଚିମବଙ୍ଗରେ ଦ୍ବିତୀୟ ପର୍ଯ୍ୟାୟ ଭୋଟ ଗ୍ରହଣ ପ୍ରକ୍ରିୟା ଆରମ୍ଭ ହୋଇଛି । ନନ୍ଦିଗ୍ରାମ ବିଧାନସଭା ଆସନ ଉପରେ ସଭିଙ୍କ ନଜର ରହିଛି। କାରଣ ଏହି ଆସନରୁ ମମତା ବାନାର୍ଜୀ ଓ ଶୁଭେନ୍ଦୁ ଅଧିକାରୀ ପ୍ରତିଦ୍ବନ୍ଦିତା କରୁଛନ୍ତି । ଦ୍ବିତୀୟ ପର୍ଯ୍ୟାୟରେ 58ରୁ 80 ପ୍ରତିଶତ ଭୋଟଦାନ କରିବେ ବୋଲି ଆଶା ରଖିଛନ୍ତି ବିଜେପି ବିଧାୟକ ପ୍ରାର୍ଥୀ। ଶୁଭେନ୍ଦୁ ଅଧିକାରୀ। ଏଥିପାଇଁ ସେ ଲୋକଙ୍କୁ ବହୁଳ ମାତ୍ରା ଭୋଟ ଦେବାକୁ ଅପିଲ କରିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
