ଜୟପୁର: ଅଧିକାଂଶ ଦମ୍ପତି ପୁତ୍ର ସନ୍ତାନ ପ୍ରତି ଆଶା ରଖିଥାନ୍ତି । କାରଣ ପରିଣତ ବୟସରେ ପୁଅଟି ସାହା ହେବ । ହେଲେ ଏଠାରେ ପୁତ୍ର ସନ୍ତାନ ବୃଦ୍ଧ ପିତାର ଆଶା ବାଡ଼ି ହେବା ପରିବର୍ତ୍ତେ ନିଜ ପତ୍ନୀ ଓ ଝିଅ ସହ ମିଶି ବୃଦ୍ଧଙ୍କୁ ମାଡ଼ ମାରିଛି (Man Physically abused by Son) । ପୁଅ ନିଜ ପିତା ପ୍ରତି ଏପରି ଶାରୀରିକ ଅତ୍ୟାଚାର କରୁଥିବା ବେଳେ କେହି ଜଣେ ଭିଡ଼ିଓ ଉତ୍ତୋଳନ କରିଥିବା ବେଳେ ଏହି ଭିଡ଼ିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେଉଛି । ଏହି ଭିଡ଼ିଓଟି ରାଜସ୍ଥାନ ଲକ୍ଷ୍ମଣଗଡ଼ ଥାନା ଅନ୍ତର୍ଗତ (Alwar Laxmangarh police station area) ମୌଜପୁର ଗ୍ରାମର ବୋଲି ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ ମୌଜପୁର ନିବାସୀ ମିଶ୍ରିଲାଲ ସୈନୀ (୭୨) ପୁଅ ଦୌଲତରାମ ସୈନୀ ଦ୍ବାରା ଏଭଳି ନିର୍ଯାତନାର ଶିକାର ହେଉଛନ୍ତି । ପୁଅ ସହିତ କୌଣସି ପ୍ରସଙ୍ଗକୁ ନେଇ ମିଶ୍ରିଲାଲଙ୍କ ବଚସା ହୋଇଥିଲା । ଶନିବାର ମିଶ୍ରିଲାଲଙ୍କ ବୋହୂ ଓ ନାତୁଣୀ ତାଙ୍କୁ ମାଡ଼ ମାରୁଥିଲେ । ଏ ସମ୍ପର୍କରେ ଗ୍ରାମବାସୀ ତୁରନ୍ତ ପୁଅ ଦୌଲତରାମକୁ ସୂଚନା ଦେଇଥିଲେ । ହେଲେ ପୁଅ ପହଞ୍ଚି ବାପାକୁ ରକ୍ଷା କରିବା ପରିବର୍ତ୍ତେ ଓଲଟା ମାଡ଼ ମାରିଥିଲା । ଯାହାକୁ ଦେଖି ଉପସ୍ଥିତ ଗ୍ରାମବାସୀ ଆଶ୍ଚର୍ଯ୍ୟ ହୋଇଯାଇଥିଲେ ।
ଏହା ବି ପଢନ୍ତୁ- Building collapsed in Amravati: କୋଠାତଳେ ଚାପିହୋଇ 5 ମୃତ
ଦୌଲତରାମ ପିତାକୁ ଲାଠିରେ ମାଡ଼ ମାରୁଥିବା ଦେଖିବାକୁ ମିଳିଥିଲା । ଏହି ପାରିବାରିକ କଳି ଦେଖିବାକୁ ଗ୍ରାମବାସୀଙ୍କ ଭିଡ଼ ଜମିଥିଲା । ସେମାନଙ୍କ ମଧ୍ୟରୁ କେହି ଜଣେ ବାପା ପୁଅଙ୍କ ଗଣ୍ଡଗୋଳରେ ଭିଡିଓ କରି ସୋସିଆଲ ମିଡ଼ିଆରେ ପୋଷ୍ଟ କରିବା ପରେ ଏବେ ଏହା ଖୁବ ଭାଇରାଲ ହେଉଛି । ଏହାପରେ କିଛି ଗ୍ରାମବାସୀ ବୃଦ୍ଧଙ୍କୁ ଉଦ୍ଧାର କରି ସ୍ଥାନୀୟ ସରକାରୀ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ଏବେ ବୃଦ୍ଧଙ୍କ ଚିକିତ୍ସା ଜାରି ରହିଛି ।
ସେପଟେ ବୃଦ୍ଧଙ୍କ ଆଉ ଏକ ପୁଅ କମଳେଶ ଭାଇ ଦୌଲତରାମ, ଭାଉଜଙ୍କ ନାମରେ ଥାନାରେ ଏତଲା ଦେଇଛନ୍ତି (Case registered against accused son) । କମଳେଶଙ୍କ ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଛି । ନିଜ ବୃଦ୍ଧ ପିତା ପ୍ରତି ପୁଅର ଏହି ଆଚରଣକୁ ଗ୍ରାମବାସୀ ଖୁବ ନିନ୍ଦା କରିଛନ୍ତି ।
