ନୂଆଦିଲ୍ଲୀ: ଦେଶରେ ବର୍ତ୍ତମାନ କୋରୋନାର ଦ୍ବିତୀୟ ଷ୍ଟ୍ରେନ ତାଣ୍ଡବ ମଚାଉଛି । ଏପରି ସ୍ଥିତିରେ ସିଙ୍ଗାପୁର ଷ୍ଟ୍ରେନ ଭାରତ ପାଇଁ ଆଉ ଏକ ବଡ ବିପଦ ସାବ୍ୟସ୍ତ ହୋଇପାରେ । ଏହା ପିଲାମାନଙ୍କ ପାଇଁ ଅଧିକ ମାରାତ୍ମକ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସିଙ୍ଗାପୁର ଷ୍ଟ୍ରେନକୁ ନେଇ କରିଥିବା ଟ୍ବିଟ୍ ପରେ ଏବେ ବଢୁଛି ଚର୍ଚ୍ଚା ।
ଏନେଇ ଗତକାଲି(ମଙ୍ଗଳବାର) ଅରବିନ୍ଦ କେଜ୍ରିୱାଲ ଭାରତରୁ ସିଙ୍ଗାପୁରକୁ ବିମାନ ଚଳାଚଳ ସମ୍ପୂର୍ଣ୍ଣ ବନ୍ଦ ରଖିବାକୁ ଟ୍ବିଟ୍ ଯୋଗେ ଦାବି କରିଥିଲେ । ଯାହାର ଜବାବ ରଖିଛନ୍ତି ଭାରତରେ ଅବସ୍ଥାପିତ ସିଙ୍ଗାପୁର ହାଇକମିଶନର ।
ହାଇକମିଶନରଙ୍କ କହିବା ମୁତାବକ, ସିଙ୍ଗାପୁରରେ କୋରୋନାର କୌଣସି ନୂତନ ଷ୍ଟ୍ରେନ ଦେଖିବାକୁ ମିଳିନାହିଁ । ସିଙ୍ଗାପୁରରେ ଠାବ ହୋଇଥିବା ଷ୍ଟ୍ରେନ ପୂର୍ବରୁ ଭାରତରେ ରହିଛି । ଏହି ଷ୍ଟ୍ରେନ କାରଣରୁ ସିଙ୍ଗାପୁରରେ ସଂକ୍ରମଣ ହାର ହୁ ହୁ ହୋଇ ବୃଦ୍ଧି ପାଉଛି । ଯଦ୍ବାରା ଛୋଟ ପିଲାମାନେ ଅଧିକ ଆକ୍ରାନ୍ତ ହେଉଛନ୍ତି । ତେବେ ସିଙ୍ଗାପୁରରେ ନୂଆ ଷ୍ଟ୍ରେନ ସୃଷ୍ଟି ହୋଇଥିବା ନେଇ ଯାହା ଚର୍ଚ୍ଚା ହେଉଛି ସେଥିରେ କୌଣସି ସତ୍ୟତା ନାହିଁ । ଦେଶରେ ସଂକ୍ରମଣ ବଢିବା ପଛରେ B.1.617.2 ଭ୍ୟାରିଏଣ୍ଟ ହିଁ ଏହାର ପ୍ରମୁଖ କାରଣ । ବିଭିନ୍ନ ପରୀକ୍ଷାରୁ ଏହି ଷ୍ଟ୍ରେନ ଠାବ ହୋଇଥିବା ସିଙ୍ଗାପୁର କମିଶନ ସ୍ପଷ୍ଟ କରିଛନ୍ତି । ତେବେ ଏହି ଷ୍ଟ୍ରେନ ପ୍ରଥମେ ଭାରତରେ ହିଁ ଠାବ ହୋଇଥିଲା ।
ସେପଟେ କେଜ୍ରିୱାଲଙ୍କୁ ବିରୋଧ କରି ଆଜି ସିଙ୍ଗାପୁର ସରକାର ସିଙ୍ଗାପୁରରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତଙ୍କୁ ସମନ ଜାରି କରିଛନ୍ତି । ଏନେଇ ସୂଚନା ଦେଇଛନ୍ତି ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚୀ । ଅପରପକ୍ଷେ ବୈଦେଶିକ ମନ୍ତ୍ରୀ ଏସ ଜୟଶଙ୍କର କହିଛନ୍ତି, ଭାରତ ସିଙ୍ଗାପୁର ଦ୍ବିପାକ୍ଷିକ ସମ୍ପର୍କ ମଜବୁତ ଅଛି । କୌଣସି ଦାୟିତ୍ବହୀନ ମନ୍ତବ୍ୟ ଉଭୟ ଦେଶର ସମ୍ପର୍କକୁ ପ୍ରଭାବିତ କରିପାରେ । ସିଙ୍ଗାପୁର ସରକାରଙ୍କ ସହ ଭାରତ ସରକାର ଆଲୋଚନା କରିଛନ୍ତି, ଦିଲ୍ଲୀ ମୁଖ୍ୟମନ୍ତ୍ରୀ ନୁହେଁ ବୋଲି ପ୍ରତିକ୍ରିୟା ରଖିଲେ ବୈଦେଶିକ ମନ୍ତ୍ରୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
