ଚଣ୍ଡିଗଡ: ପଞ୍ଜାବରେ ପୋଲିସ ଓ ନିହାଙ୍ଗ ଶିଖ ଗୋଷ୍ଠୀ ମଧ୍ୟରେ ସଂଘର୍ଷ । ନିହାଙ୍ଗ ଶିଖ୍ ଗୋଷ୍ଠୀର ଗୁଳି ମାଡରେ ଜଣେ ପୋଲିସ କର୍ମୀଙ୍କ ମୃତ୍ୟୁ ହୋଇଥିବା ବେଳେ 2ଜଣ ଆହତ ହୋଇଛନ୍ତି । ପଞ୍ଜାବର କାପୁରଥାଲା ଜିଲ୍ଲାରେ ଏପରି ଘଟଣା ଘଟିଥିବା ସୂଚନା ମିଳିଛି । ଗୁରୁଦ୍ୱାରର ମାଲିକାନାକୁ ନେଇ ଏହି ସଂଘର୍ଷ ଘଟିଥିବା ସୂଚନା ମିଳିଛି । ନିହାଙ୍ଗଙ୍କ ବିରୋଧରେ ଥାନାରେ ଏକ ମାମଲା ରହିଥିବା ବେଳେ ପୋଲିସ କିଛି ନିହାଙ୍ଗ ସଦସ୍ୟଙ୍କୁ ଗିରଫ କରିବାକୁ ସୁଲତାନପୁର ଲୋଧୀକୁ ଯାଇଥିବା ବେଳେ ସଂଘର୍ଷ ଘଟିଥିବା ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ।
ପୋଲିସ ଅଧୀକ୍ଷକ ତେଜବୀର ସିଂ ହୁଣ୍ଡାଲଙ୍କ କହିବା ମୁତାବକ, କାପୁରଥାଲା ଜିଲ୍ଲାର ସୁଲତାନପୁର ଲୋଧୀରେ ପୋଲିସ ଓ ନିହାଙ୍ଗ ଶିଖ ଗୋଷ୍ଠୀ ମୁହାଁମୁହିଁ ହୋଇଥିଲେ । ପ୍ରଥମେ ନିହାଙ୍ଗ ସଦସ୍ୟ ପୋଲିସ ଉପରକୁ ଗୁଳିମାଡ଼ କରିଥିଲେ । ଫଳରେ ଘଟଣା ସ୍ଥଳରେ ଜଣେ କନେଷ୍ଟବଳଙ୍କ ମୃତ୍ୟୁ ହୋଇଥିଲା ଓ ଅନ୍ୟ ଦୁଇଜଣ କର୍ମଚାରୀ ଆହତ ହୋଇଥିଲେ । ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସୁରକ୍ଷା ଦୃଷ୍ଟିରୁ ବହୁ ସଂଖ୍ୟାକ ପୋଲିସ କର୍ମୀ ଘଟଣାସ୍ଥଳରେ ମୁତୟନ କରାଯାଇଛି। ଗୁରୁଦ୍ୱାରରେ ଜବରଦଖଲ ଅଭିଯୋଗରେ ପୋଲିସ ନିହାଙ୍ଗ ସମ୍ପ୍ରଦାୟର 10 ଜଣଙ୍କୁ ଗିରଫ କରିଛି । କିନ୍ତୁ ଏବେ ବି ଏହି ଘଟଣାରେ ପୋଲିସ ତଦନ୍ତ ଜାରି ରଖିଛି । ଗୁରୁଦ୍ୱାରରେ ଅତି କମରେ 30 ଜଣ ନିହାଙ୍ଗ ସଦସ୍ୟ ଥିବା ପୋଲିସ କହିଛି ।
ଏହା ମଧ୍ୟ ପଢନ୍ତୁ-ନିହାଙ୍ଗ ଶିଖଙ୍କ ଖଣ୍ଡା ଚୋଟରେ 2 ପୋଲିସ ଆହତ
ଏହା ପୂର୍ବରୁ 2021 ମସିହା ମାର୍ଚ୍ଚ ମାସରେ ପଞ୍ଜାବର ତରନତାରାରେ ପୋଲିସ ଓ ନିହାଙ୍ଗ ଶିଖ ମୁହାଁମୁହିଁ ହୋଇଥିଲେ । ପୋଲିସ କର୍ମୀଙ୍କୁ ଖଣ୍ଡାରେ ଆକ୍ରମଣ କରିଥିଲେ ନିହାଙ୍ଗ ଶିଖ । ଏହି ଘଟଣାରେ 2 ପୋଲିସ କର୍ମୀ ଆହତ ହୋଇଥିଲେ । ତରନତାରନର ସୁରସିଂହ ଗାଁରେ ଘଟିଥିଲା ଏହି ଘଟଣା । ମହାରାଷ୍ଟ୍ରର ନାନ୍ଦେଡରେ 2 ନିହାଙ୍ଗ ଶିଖ କର ସେବକଙ୍କୁ ହତ୍ୟା କରିବା ପରେ ଫେରାର ହୋଇଯାଇଥିଲେ । ଏନେଇ ପଞ୍ଜାବ ପୋଲିସକୁ ମହାରାଷ୍ଟ୍ର ପୋଲିସ ସୂଚନା ଦେବା ପରେ 2 ଅଭିଯୁକ୍ତଙ୍କୁ ଗିରଫ କରିବାକୁ ଯାଇଥିଲେ ପୋଲିସ କର୍ମୀ । ଏହି ସମୟରେ ପୋଲିସ କର୍ମୀଙ୍କୁ ଆକ୍ରମଣ କରିଥିଲେ ନିହାଙ୍ଗ ଶିଖ । ପୋଲିସର ପାଲଟା ଜବାବରେ 2 ଜଣ ଅଭିଯୁକ୍ତଙ୍କ ମୃତ୍ୟୁ ହୋଇଥିଲା ।
