ଭୋପାଳ: ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଏକ ନୂତନ ଇତିହାସ ସୃଷ୍ଟି କରିଛନ୍ତି। ସେ ବିଜେପିର ଏପରି ଜଣେ ମୁଖ୍ୟମନ୍ତ୍ରୀ ଯିଏ 15 ବର୍ଷ 11 ଦିନ ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରିଛନ୍ତି । ସେ ଛତିଶଗଡର ପୂର୍ବତନ ମୁଖ୍ୟମନ୍ତ୍ରୀ ଡ଼.ରମଣ ସିଂଙ୍କ ରେକର୍ଡ ଭାଙ୍ଗିଛନ୍ତି, ଯିଏ 15 ବର୍ଷ 10 ଦିନ ଧରି ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ ।
ଶିବରାଜ ସିଂଙ୍କ ଯାତ୍ରା
ଶିବରାଜ ସିଂ ଚୌହାନ ପ୍ରଥମ ଥର ପାଇଁ 29 ନଭେମ୍ବର 2005ରେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଭାବରେ ଦାୟିତ୍ବ ଗ୍ରହଣ କରିଥିଲେ। ସେ ଏହି ପଦବୀରେ 12 ଡିସେମ୍ବର 2018 ପର୍ଯ୍ୟନ୍ତ ଜାରି ରଖିଥିଲେ। କଂଗ୍ରେସ 2018ରେ ନେତୃତ୍ୱ ନେଇ ଚୌହାନଙ୍କୁ ଚେୟାର ଛାଡିବାକୁ ବାଧ୍ୟ କରିଥିଲା। ଏହା ପରେ 22 ଜଣ ବିଧାୟକ ଏକତ୍ର ଇସ୍ତଫା ଦେବାରୁ କଂଗ୍ରେସରେ ଏକ ଅସନ୍ତୋଷ ଦେଖାଦେଇଥିଲା, ଫଳରେ କମଲ ନାଥଙ୍କ ନେତୃତ୍ୱାଧୀନ ସରକାର ଭାଙ୍ଗିଗଲା ଏବଂ 23 ମାର୍ଚ୍ଚ 2020ରେ ଚୌହାନ ପୁଣି ମୁଖ୍ୟମନ୍ତ୍ରୀ ହୋଇଥିଲେ।
'ପଦଚାରୀ ଭାଇ'ରୁ 'ମାମୁଁ' ପର୍ଯ୍ୟନ୍ତ କାହାଣୀ
ଶିବରାଜ ସିଂ ଚୌହାନଙ୍କ ଭାବମୂର୍ତ୍ତି ମଧ୍ୟପ୍ରଦେଶର ରାଜନୀତିରେ ନିଆରା । ଯିଏ ତୃଣମୂଳ ସ୍ତରରୁ ରାଜନୀତିର ଶିଖରକୁ ଯାଇଛନ୍ତି । ଭାଇଠାରୁ ମାମୁଁ ପର୍ଯ୍ୟନ୍ତ ଚୌହାନଙ୍କ ପଦ ଯାତ୍ରା ମଧ୍ୟ ଆକର୍ଷଣୀୟ ଅଟେ । ସେ ପୃଷ୍ଠଭୂମି କୌଣସି ରାଜନୈତିକ ପରିବାରରୁ ଆସିନାହିଁ କିମ୍ବା ସେ ରାଜନୀତିର ଉତ୍ତରାଧିକାରୀ ମଧ୍ୟ ହୋଇନାହାଁନ୍ତି। ସେ ରାଜ୍ୟର ସିହୋର ଜିଲ୍ଲାର ଏକ ଛୋଟ ଗାଁର ଅଟନ୍ତି । ସେଠାରୁ ସେ ମୁଖ୍ୟମନ୍ତ୍ରୀ ହେବା ପର୍ଯ୍ୟନ୍ତ 4ଥର ରେକର୍ଡ କରିଛନ୍ତି। ଶିବରାଜଙ୍କ ବିଷୟରେ କୁହାଯାଏ, ଯେତେବେଳେ ତାଙ୍କୁ ମାତ୍ର 9 ବର୍ଷ ହୋଇଥିଲା, ସେତେବେଳେ ସେ ଗାଁର ଶ୍ରମିକମାନଙ୍କୁ ଦୁଇଗୁଣ ମଜୁରୀ ଦେବା ପାଇଁ ଆନ୍ଦୋଳନ କରିଥିଲେ। ଏହା ତାଙ୍କ ରାଜନୈତିକ କ୍ୟାରିୟରର ଆରମ୍ଭ ଥିଲା । ସେ ରାଜନୈତିକ କ୍ୟାରିୟରର ଆରମ୍ଭରେ ଗାଁ ରୁ ଗାଁ ପାଦରେ ଯାତ୍ରା କରୁଥିଲେ। ଏହି କାରଣରୁ, ତାଙ୍କୁ ପଦଚାରି ଭାଇ କୁହାଯାଉଥିଲା।
ସେ ମଧ୍ୟପ୍ରଦେଶରେ ସର୍ବାଧିକ ଥର ପାଇଁ ମୁଖ୍ୟମନ୍ତ୍ରୀ ହେବାର ରେକର୍ଡ ରଖିଛନ୍ତି। ଏହି ରେକର୍ଡକୁ ବଜାୟ ରଖିବା ପାଇ ତାଙ୍କୁ ମାମୁଁ ଭାବରେ ପ୍ରତିଷ୍ଠିତ କରାଯାଇଥିଲା । ଏହା ପଛର ମୁଖ୍ୟ କାରଣ ଥିଲା, ଯେତେବେଳେ ସେ ମୁଖ୍ୟମନ୍ତ୍ରୀ ଥିଲେ, ପିଲାମାନଙ୍କ ସହିତ ତାଙ୍କର ସଂଲଗ୍ନତା ଏବଂ ଲାଡଲି ଲକ୍ଷ୍ମୀ ଏବଂ ବେଟି ବାଚାଓ ବେଟି ପଢାଓ ଭଳି ଯୋଜନାଗୁଡ଼ିକର ପ୍ରୟୋଗ। ଏହି ଯୋଜନାଗୁଡିକର ସଫଳତାର ଫଳାଫଳ ହେଉଛି ତାଙ୍କ ଭାବମୂର୍ତ୍ତି। ଏହା କେବଳ ରାଜ୍ୟରେ ନୁହେଁ ଦେଶରେ ମଧ୍ୟ ପ୍ରତିଷ୍ଠିତ ହୋଇଛି ।
ପ୍ରଧାନମନ୍ତ୍ରୀ ମୋଦୀ ଏବଂ ରମଣ ସିଂଙ୍କୁ ପଛରେ ଛାଡିଲେ ଚୌହାନ
ଶିବରାଜ ସିଂ ଚୌହାନ ପୂର୍ବତନ ଛତିଶଗଡର ମୁଖ୍ୟମନ୍ତ୍ରୀ ଡ଼.ରମଣ ସିଂଙ୍କ ରେକର୍ଡ ଭାଙ୍ଗିଛନ୍ତି। ସେ ଏବଂ ରମଣ ସିଂଙ୍କ ବ୍ୟତୀତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରାୟ 12 ବର୍ଷ ଗୁଜୁରାଟର ମୁଖ୍ୟମନ୍ତ୍ରୀ, ରାଜସ୍ଥାନର ବସୁ୍ନ୍ଧରା ରାଜେ ସିନ୍ଧିଆ ଏବଂ ହିମାଚଳର ପ୍ରେମ କୁମାର ଧୁମଲ 10 ବର୍ଷ କାର୍ଯ୍ୟ କରିଥିଲେ।
ବର୍ତ୍ତମାନ ଦେଶର ମୁଖ୍ୟମନ୍ତ୍ରୀଙ୍କ କାର୍ଯ୍ୟକାଳ ଅନୁଯାୟୀ ଶିବରାଜ ଚତୁର୍ଥ ସ୍ଥାନରେ ଅଛନ୍ତି।
ଯଦି ଆମେ ବର୍ତ୍ତମାନ ଦେଶର ମୁଖ୍ୟମନ୍ତ୍ରୀ ପଦବୀରେ ଥିବା ନେତାମାନଙ୍କୁ ଦେଖିବା, ତେବେ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ବିହାରର ନୀତୀଶ କୁମାର ଏବଂ ନାଗାଲାଣ୍ଡର କେ. ଏନ. ରିଓ ପରେ ଶିବରାଜ ସିଂ ଚୌହାନଙ୍କ ନାମ ଚତୁର୍ଥ ସ୍ଥାନରେ ଅଛି। ମୁଖ୍ୟମନ୍ତ୍ରୀ ଚୌହାନ କ୍ରମାଗତ ଚତୁର୍ଥ ଥର ପାଇଁ ମୁଖ୍ୟମନ୍ତ୍ରୀ ପଦରେ ଅଛନ୍ତି, ଏହାପୂର୍ବରୁ ସେ ମଧ୍ୟ ସାଂସଦ ହୋଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ