କୋଲକାତା/ମୁମ୍ବାଇ: ମହାରାଷ୍ଟ୍ର ମନ୍ତ୍ରୀ ତଥା ବରିଷ୍ଠ ଏନସିପି ନେତା ନଓ୍ବାବ ମଲ୍ଲିକଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଗିରଫ କରିବା ପରେ ମହାରାଷ୍ଟ୍ର ରାଜନୀତିରେ ହଲଚଲ ଆରମ୍ଭ ହୋଇଛି । ଦଳୀୟ ନେତାଙ୍କ ଏପରି ଗିରଫଦାରୀ ପରେ ଆତଙ୍କିତ ହୋଇପଡିଛନ୍ତି ଏନସିପି ମୁଖ୍ୟ ଶରଦ ପାଓ୍ବର ।
ଆଜି ପାଓ୍ବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ବିଜେପିର ଏକ ପ୍ରମୁଖ ବିରୋଧୀ ଟିଏମସି ମୁଖ୍ୟ ମମତା ବାନାର୍ଜୀଙ୍କ ସହ ଆଲୋଚନା କରିଛନ୍ତି । ଉଭୟଙ୍କ ମଧ୍ୟରେ ଫୋନରେ ବାର୍ତ୍ତାଳାପ ହୋଇଛି ।
ଆଜି ମମତା ନଓ୍ବାବ ମଲ୍ଲିକଙ୍କ ଗିରଫଦାରୀକୁ ନିନ୍ଦା କରିବା ସହ ଶରଦ ପାୱାରଙ୍କୁ ମହାରାଷ୍ଟ୍ର ସରକାରରୁ ତାଙ୍କୁ ନହଟାଇବା ପାଇଁ ମଧ୍ୟ ପରାମର୍ଶ ଦେଇଥିବା ସୂୂଚନା ରହିଛି । ପ୍ରବର୍ତ୍ତନ ନିର୍ଦ୍ଦେଶାଳୟ ପରି ସଂସ୍ଥାକୁ ବିଜେପି ରାଜନୈତିକ ଉଦ୍ଦେଶ୍ୟରେ ବ୍ୟବହାର କରିଛି ବୋଲି ମମତା କହିଥିଲେ ।
ତେବେ ଉଭୟଙ୍କ ଆଲୋଚନାର ମାତ୍ର କିଛି ଘଣ୍ଟା ପରେ ମହାରାଷ୍ଟ୍ର ସରକାର ମନ୍ତ୍ରୀ ନଓ୍ବାବଙ୍କୁ ପଦରୁ ହାଟାଇବେ ନାହିଁ ବୋଲି ଘୋଷଣା କରିଥିଲେ । ଅନ୍ୟପଟେ ଗିରଫ ନଓ୍ବାବଙ୍କର ଜାମିନ ଖାରାଜ ହେବା ସହ ତାଙ୍କୁ ୮ ଦିନିଆ ଇଡି ରିମାଣ୍ଡରେ ପଠାଇଛନ୍ତି କୋର୍ଟ । ଏହି ଅବଧି ମଧ୍ୟରେ ଇଡି ତାଙ୍କୁ ଜେରା କରିବା ସହ ବହୁ ଗୁରୁତ୍ବପୂର୍ଣ୍ଣ ତଥ୍ୟ ହାସଲ କରିବା ପାଇଁ ଚେଷ୍ଟା କରିବ ।
