କିଭ: ଋଷ-ୟୁକ୍ରେନ ମଧ୍ୟରେ ଜାରି ରହିଥିବା ଯୁଦ୍ଧରେ ଟାର୍ଗେଟ ହେଉଛି ଗୋଟିଏ ପରେ ଗୋଟିଏ ସାଧାରଣ ଅନୁଷ୍ଠାନ । ଆକ୍ରମଣରେ ପ୍ରାଣ ହରାଉଛନ୍ତି ସାଧାରଣ ଜନତା । ଆଜିି ୟୁକ୍ରେନର ଖାର୍କିଭ ସହର ନିକଟବର୍ତ୍ତୀ ଅଞ୍ଚଳରେ ଥିବା ଏକ ସ୍କୁଲ ଓ ସାଂସ୍କୃତିକ କେନ୍ଦ୍ରରେ ଋଷ ସେନାର କ୍ଷେପଣାସ୍ତ୍ର ମାଡ ହୋଇଥିବା ଅଭିଯୋଗ ହୋଇଛି । ଏଥିରେ ୨୧ଜଣ ପ୍ରାଣ ହରାଇଥିବା ସହ ପ୍ରାୟ ୧୦ରୁ ଉର୍ଦ୍ଧ୍ବ ଆହତ ହୋଇଥିବା ସୂଚନା ମିଳିଛି ।
ସୂଚନା ଅନୁସାରେ, ଆହତଙ୍କ ମଧ୍ୟରେ କିଛି ଗୁରୁତର ମଧ୍ୟ ରହିଛନ୍ତି । ଏହି ଆକ୍ରମଣ ସମ୍ପର୍କିତ ଏକ ଫୋଟୋ ମଧ୍ୟ ସୋସିଆଲ ମିଡିଆରେ ପୋଷ୍ଟ କରିଛନ୍ତି ସ୍ଥାନୀୟ ଜଣେ ୟୁକ୍ରେନୀୟ । ତେବେ ଜାରି ରହିଥିବା ଆକ୍ରମଣରେ ଅନେକ ସାଧାରଣ ନାଗିରିକ ପ୍ରାଣ ହରାଇ ସାରିଥିବା ଜାତିସଂଘ ମଧ୍ୟ ତାର ରିପୋର୍ଟରେ ଦର୍ଶାଇବା ସହ ଉଦବେଗ ପ୍ରକାଶ କରିଥିଲା ।
ଗତକାଲି ଅନ୍ତର୍ଜାତୀୟ ନ୍ୟାୟ ଅଦାଲତରେ ଋଷକୁ ବଡ ଝଟକା ଲାଗିଥିଲା । ଆକ୍ରମଣକୁ ନିନ୍ଦା କରିବା ସହ ତୁରନ୍ତ ଯୁଦ୍ଧ ବନ୍ଦ କରିବା ପାଇଁ କୋର୍ଟ ଋଷକୁ ନିର୍ଦ୍ଦେଶ ଦେଇଥିଲେ । ୟୁକ୍ରେନ ଏପରି ନିଷ୍ପତ୍ତିକୁ ବୃହତ ବିଜୟ ବୋଲି କହିବା ସହ ଋଷ ଏହାକୁ ପାଳନ କରିବାକୁ ବାଧ୍ୟ ବୋଲି କହିଥିଲା । ତେବେ ଆସିଜେଙ୍କ ନିର୍ଦ୍ଦେଶ ସମ୍ପର୍କରେ ଋଷ କୌଣସି ସକରାତ୍ମକ ଆଭିମୁଖ୍ୟ ଦେଖାଇଥିବା ପରି ମଧ୍ୟ ଦୃଷ୍ଟି ଗୋଚର ହେଉନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
