ଲକ୍ଷ୍ନୌ: ଉତ୍ତରପ୍ରଦେଶରେ ଦିନକୁ ଦିନ ବଢିବାରେ ଲାଗିଛି ଅପରାଧିକ ମମାଲା । ଯେଉଁଠାରେ ଅପରାଧୀମାନେ ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ଗୋଟିଏ ପରେ ଗୋଟିଏ ଘୃଣ୍ୟ ଅପରାଧ କରିଚାଲିଛନ୍ତି । ଗତ ଗୁରୁବାର ଗୋରଖପୁରରେ ହତ୍ୟା ପରେ ଏବେ କାନପୁରରେ ହତ୍ୟା ଘଟଣା ସାମ୍ନାକୁ ଆସିଛି। ଅପରାଧୀମାନେ କାନପୁରର ପରିବା ବଜାରରେ ଏକ କାରରେ ଯାଉଥିବା ସମାଜବାଦୀ ପାର୍ଟି ନେତାଙ୍କୁ ଗୁଳି କରି ହତ୍ୟା କରିଛନ୍ତି । ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଥିଲେ। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।
ତେବେ ଦିନ ଦ୍ବିପ୍ରହରରେ ଏହି ହତ୍ୟାକାଣ୍ଡ ପରେ ସମଗ୍ର ଅଞ୍ଚଳରେ ଉତ୍ତେଜନା ଦେଖାଦେଇଥିଲା। ଏପଟେ ଅଭିଯୁକ୍ତମାନେ ଗୁଳି ଚଳାଇବା ପରେ ଆରାମରେ ଖସି ପଳାଇ ଯାଇଥିଲେ। ଘଟଣା ସମ୍ପର୍କରେ ସୂଚନା ପାଇବା ପରେ ସେଠାରେ ପୋଲିସ ଫୋର୍ସ ମୁତୟନ କରାଯାଇଛି ।
ସୂଚନାମୁତାବକ, ଏହି ଘଟଣା କାନପୁର ଜିଲ୍ଲାର ବାର୍ରା 2 ପୋଲିସ ଷ୍ଟେସନ ଅଞ୍ଚଳରେ ଘଟିଛି । ପୋଲିସ ଅଧିକାରୀଙ୍କ କହିବାନୁସାରେ, ମୃତ ସପା ନେତା ହର୍ଷ ଯାଦବ ସମାଜବାଦୀ ପାର୍ଟିର ଯୁବଜନ ସଭା କାନପୁରର ଉପସଭାପତି ଥିଲେ । କୁହାଯାଉଛି ଯେ ଦୁର୍ବୃତ୍ତମାନେ ବଜାରରେ ଗେଡାଇ ଗୋଡାଇ ସପା ନେତା ହର୍ଷଙ୍କୁ ଗୁଳି କରିଥିଲେ। ଏପଟେ ପୋଲିସ ଘଟଣାସ୍ଥଳରେ ପହଞ୍ଚି ସମସ୍ତ ସିସିଟିଭି ଫୁଟେ ଯାଞ୍ଚ କରୁଛି । ଏହାସହ ଖୁବଶୀଘ୍ର ଦୁର୍ବୃତ୍ତମାନଙ୍କୁ ଗିରଫ କରାଯିବ ବୋଲି ପୋଲିସ କହିଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
