ନୂଆଦିଲ୍ଲୀ: ଦେଶରେ ଜାରି ରହିଥିବା ଟମାଟୋ ସଙ୍କଟ ମଧ୍ୟରେ ଗ୍ରାହକଙ୍କୁ ଆଶ୍ବସ୍ତି ଦେବା ପାଇଁ ପ୍ରକ୍ରିୟା ଆରମ୍ଭ କରିଛନ୍ତି କେନ୍ଦ୍ର ସରକାର । କେନ୍ଦ୍ର ସରକାର ଜାତୀୟ କୃଷି ସମବାୟ ମାର୍କେଟିଂ ଫେଡେରେସନ (NAFED) ଓ ଜାତୀୟ ସମବାୟ ଖାଉଟି ସଂଘ ଇଣ୍ଡିଆ ଲିମିଟେଡ (NCCF)କୁ ଅଗ୍ରଣୀ ଟମାଟୋ ଉତ୍ପାଦନକାରୀ ରାଜ୍ୟରୁ ଟମାଟୋ କିଣି ନିର୍ଦ୍ଧାରିତ ସରକାରୀ ସବସିଡଯୁକ୍ତ ମୂଲ୍ୟରେ ଯୋଗାଇବା ପାଇଁ ନିର୍ଦ୍ଦେଶ ଦେଇଛନ୍ତି । ଆନ୍ଧ୍ର ପ୍ରଦେଶ, କର୍ଣ୍ଣାଟକ, ମହାରାଷ୍ଟ୍ରରୁ ଏହି ରାଷ୍ଟ୍ରାୟତ ମାର୍କେଟିଂ ସଂସ୍ଥା ଟମାଟୋ କିଣି ଦେଶର ବିଭିନ୍ନ ରାଜ୍ଯର ପ୍ରମୁଖ ବିତରଣ କେନ୍ଦ୍ରକୁ ରିହାତି ଦରରେ ରପ୍ତାନୀ କରିବେ ।
ଗତ ମାସରୁ ସମଗ୍ର ଦେଶରେ ଟମାଟୋ ଦର କ୍ରମାଗତ ବଢିବାରେ ଲାଗିଛି । କିଛି ରାଜ୍ୟରେ ଟମାଟୋ କେଜି 2ଶହ ପାର କଲାଣି । ମୌସୁମୀ ଜନିତ ଲଗାଣ ବର୍ଷାରେ ଫସଲ ନଷ୍ଟ ହେବା ସହ ଯୋଗାଯୋଗ ବାଧାପ୍ରାପ୍ତ ହେବା କାରଣରୁ ଯୋଗାଣ ଶୃଙ୍ଖଳା ମଧ୍ୟ ପ୍ରଭାବିତ ହୋଇଛି । ତେଣୁ ଏହି ସମସ୍ୟା କାରଣରୁ ବଜାରରେ ଟମାଟୋର ଉପଲବ୍ଧତାରେ ଅସ୍ଥିରତା ସୃଷ୍ଟି ହୋଇଛି । ଫଳରେ ପ୍ରାୟ ସମସ୍ତ ରାଜ୍ୟରେ ବହୁଳ ଭାବେ ବ୍ୟବହାର ହେଉଥିବା ଟମାଟୋର ମୂଲ୍ୟ ଆକାଶଛୁଆଁ ହୋଇଛି ।
ଦୈନଦିନ ରୋଷେଇରେ ବ୍ୟବହାର କରାଯାଉଥିବା ଟମାଟୋକୁ ନେଇ ଖାଉଟି ଏବେ ଚିନ୍ତାରେ । ପୂର୍ବରୁ ତାମିଲନାଡୁ ପରି ରାଜ୍ୟରେ ସରକାର ସବସିଡ ଦରରେ ଟମାଟୋ ବିକ୍ରି ମଧ୍ଯ ଆରମ୍ଭ କରିସାରିଛନ୍ତି । ଏହାରି ମଧ୍ୟରେ କେନ୍ଦ୍ର ସରକାର ମଧ୍ୟ ଏବେ ରିହାତି ମୂଲ୍ୟରେ ଟମାଟୋ ଯୋଗାଇବା ପାଇଁ ପ୍ରକ୍ରିୟା ଆରମ୍ଭ କରିଛନ୍ତି । କେନ୍ଦ୍ର ଖାଉଟି ବ୍ୟାପାର ମନ୍ତ୍ରଣାଳୟ ସୂଚନା ଦେଇଛି, ଶୁକ୍ରବାର ଠାରୁ ଦିଲ୍ଲୀ ଓ ଏନସିଆରରେ ସରକାରୀ ସବସିଡ ମୂଲ୍ୟରେ ଟମାଟୋ ବିକ୍ରି ଆରମ୍ଭ ହେବ ।
