ପାଟଣା: କେବଳ ନିର୍ବାଚନ ପାଇଁ କେନ୍ଦ୍ର ସରକାର ପେଟ୍ରୋଲ, ଡିଜେଲ ଉପରୁ ଉତ୍ପାଦ ଶୁଳ୍କ କମାଇଛନ୍ତି । ନିର୍ବାଚନ ସରିଗଲେ ପୁଣି ଦର ବୃଦ୍ଧି ପାଇବ ବୋଲି କଟାକ୍ଷ କରିଛନ୍ତି ଆରଜେଡି ନେତା ତଥା ବିହାର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ ।
ଯାଦବ କହିଛନ୍ତି ଯେ, 'କେନ୍ଦ୍ର ସରକାର ଘୋଷଣା କରିଥିବା ପେଟ୍ରୋଲ ଡିଜେଲ ଉପରେ ଏକ୍ସାଇଜ ଶୁଳ୍କ ହ୍ରାସ ଲୋକଙ୍କୁ କୌଣସି ଆଶ୍ବସ୍ତି ଦେବ ନାହିଁ । ଉତ୍ତର ପ୍ରଦେଶ ନିର୍ବାଚନ ପରେ ପୁଣି ପେଟ୍ରୋଲ, ଡିଜେଲ ଦର ବୃଦ୍ଧି ପାଇବ । ପେଟ୍ରୋଲ ଦର ହ୍ରାସ କରି ମୋଦି ସରକାର ଡ୍ରାମା କରୁଛନ୍ତି । ଯଦି ଲିଟର ପିଛା ୫୦ ଟଙ୍କା ହ୍ରାସ ପାଏ ତେବେ ଯାଇ ଲୋକଙ୍କୁ ଆଶ୍ବସ୍ତି ମିଳିବ ।'
ସୂଚନା ଅନୁଯାୟୀ ଗତକାଲି(ବୁଧବାର) କେନ୍ଦ୍ର ସରକାର ପେଟ୍ରୋଲ ଉପରେ ଏକ୍ସାଇଜ ଡ୍ୟୁଟି ୫ ଟଙ୍କା ଏବଂ ଡିଜେଲ ଉପରେ ୧୦ ଟଙ୍କା ହ୍ରାସ ପାଇବ ବୋଲି ଘୋଷଣା କରିଛନ୍ତି । ଗତ କିଛିଦିନ ହେବ ତେଲ ଦର ବୃଦ୍ଧିକୁ ନେଇ ଦେଶବ୍ୟାପୀ ଆନ୍ଦୋଳନ ଲାଗି ରହିଥିଲା । ପେଟ୍ରୋଲ ଓ ଡିଜେଲ ଦର ୧୦୦ ପାର କରିଥିବା ସମୟରେ ୫/୧୦ ଟଙ୍କା କମ୍ ପ୍ରହସନ ବୋଲି ଲାଲୁ ପ୍ରସାଦ କଟାକ୍ଷ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
