ହାଇଦ୍ରାବାଦ: ମାର୍ଚ୍ଚ ୮ ତାରିଖରେ ବିଶ୍ବ ପାଳନ କରିବାକୁ ଯାଉଛି ଅନ୍ତର୍ଜାତୀୟ ମହିଳା ଦିବସ । ଏହି ଅବସରରେ ରାମୋଜୀ ଫିଲ୍ମ ସିଟିରେ ଏହି ଦିବସକୁ ଭିନ୍ନ ଢଙ୍ଗରେ ପାଳନ କରାଯିବାକୁ ଯାଉଛି । କେବଳ ଏକ ଦିବସୀୟ କାର୍ଯ୍ୟକ୍ରମ ନୁହେଁ ବରଂ ପୁରା ଏକ ମାସ ବ୍ୟାପି ମହିଳାଙ୍କ ବିଭିନ୍ନ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯିବ । ମାର୍ଚ୍ଚ ପହିଲା (ଆସନ୍ତାକାଲି) ଠାରୁ ଏକ ମାସ ଧରି ଆୟୋଜିତ ହେବାକୁଥିବା ଏହି ସ୍ବତନ୍ତ୍ର କାର୍ଯ୍ୟକ୍ରମର ଶୁଭାରମ୍ଭ ହେବ । ଏବେ ସମର ଭ୍ୟାକେସନ ପାଇଁ ରାମୋଜୀ ଫିଲ୍ମ ସିଟି ପର୍ଯ୍ୟଟକଙ୍କ ପାଇଁ ପ୍ରଥମ ପସନ୍ଦ ରହିଆସିଥିବା ବେଳେ ଏହି ସ୍ବତନ୍ତ୍ର କାର୍ଯ୍ୟକ୍ରମ ପର୍ଯ୍ୟଟକଙ୍କୁ ଭିନ୍ନ ଅନୁଭବ ପ୍ରଦାନ କରିବ ।
ଏହିି ସ୍ବତନ୍ତ୍ର ଆୟୋଜନ ସମ୍ପର୍କରେ ଫିଲ୍ମ ସିଟିର ମୁଖପାତ୍ର ଇଟିଭି ଭାରତକୁ ଦେଇଥିବା ସୂଚନା ଅନୁସାରେ, ମାର୍ଚ୍ଚ ପହିଲାରୁ ଏହି କାର୍ଯ୍ୟକ୍ରମ ଆରମ୍ଭ ହୋଇ ମାର୍ଚ୍ଚ ୩୧ ରେ ଶେଷ ହେବ । ତେବେ ଏଥିରେ ଫିଲ୍ମ ସିଟି କର୍ତ୍ତୃପକ୍ଷ ପର୍ଯ୍ୟଟକଙ୍କ ପାଇଁ ଏକ ସ୍ବତନ୍ତ୍ର ରିହାତିର ବ୍ୟବସ୍ଥା ରଖିଛନ୍ତି । ଜଣେ ମହିଳା ପର୍ଯ୍ୟଟକ ଗୋଟିଏ ଟିକେଟ ବୁକିଂ କରି ସାଥିରେ ଜଣେ ସମ୍ପର୍କୀୟ ମହିଳା କିମ୍ବା ଯୁବତୀଙ୍କୁ ଦେୟମୁକ୍ତ ଭାବେ ଫିଲ୍ମ ସିଟି ପରିଦର୍ଶନରେ ଆଣିପାରିବେ । ଯଦି କେହି ମହିଳା ପର୍ଯ୍ୟଟକ ନିଜ ସହ ମହିଳା ଓ ଯୁବତୀଙ୍କୁ ଆଣୁଛନ୍ତି ସେମାନେ ନିଜ ଟିକେଟ ସହ ଫିଲ୍ମସିଟି କର୍ତ୍ତୃପକ୍ଷଙ୍କୁ ଯୋଗାଯୋଗ କରିବେ । ଏଥିପାଇଁ ରାମୋଜୀ ଫିଲ୍ମ ସିଟିର ଅଫିସିଆଲ ଓ୍ବେବସାଇଟ www.ramojifilmcity.com ଓ ଏକ ଦେୟମୁକ୍ତ ନମ୍ବର (1800 120 2999) ମଧ୍ୟ ଜାରି କରାଯାଇଛି । ଅଧିକ ଜାଣିବା ପାଇଁ ଏହି ମାଧ୍ୟମରେ ମହିଳା ପର୍ଯ୍ୟଟକମାନେ ଫିଲ୍ମ ସିଟି କର୍ତ୍ତୃପକ୍ଷଙ୍କ ସହ ଯୋଗାଯୋଗ ମଧ୍ୟ କରିପାରିବେ ।
କେବଳ ଭିିଜିଟିଂ ଟିକେଟରେ ବାଏ ଓ୍ବାନ, ଗେଟ ଓ୍ବାନ ନୁହେଁ, ବରଂ ଫିଲ୍ମସିଟିର ଦୈନଦିନ ପରିଭ୍ରମଣ ତାଲିକାରେ ମଧ୍ୟ ମହିଳାଙ୍କ ପାଇଁ ଅନେକ ବିଶେଷ କାର୍ଯ୍ୟକ୍ରମ ସାମିଲ କରାଯାଇଛି । ମହିଳା ପର୍ଯ୍ୟଟକମାନେ ଷ୍ଟୁଡିଓ ଟୁର, ଗ୍ରାଣ୍ଡ ଫ୍ଯାମିଲି ସେଟର ମଜା ନେବା ସହ ଏକାଧିକ ଗାର୍ଡେନ ଓ ବାର୍ଡ ପାର୍କ, ବଟରଫ୍ଲାଏ ପାର୍କ, ବୋନସାଇ ଗାର୍ଡେନ ପ୍ରମୁଖ ପରିଦର୍ଶନ କରିବେ । ସେହିପରି ଆଡଭେଞ୍ଜର ସେଗମେଣ୍ଟ ‘ସାହସ’ ର ମଜା ମଧ୍ୟ ନେଇ ପାରିବେ । ଏହା ସହ ଏକାଧିକ ପ୍ରତିଯୋଗିତା ମୂଳକ କାର୍ଯ୍ୟାନୁଷ୍ଠାନ ମଧ୍ୟ ଆୟୋଜନ କରାଯାଇଥିବା କହିଛନ୍ତି ଫିଲ୍ମସିଟି ମୁଖପାତ୍ର ।
୨୦୦ ଏକର ପରିମିତ ସ୍ଥାନରେ ନିର୍ମିତ ‘ରାମୋଜୀ ଫିଲ୍ମ ସିଟି’ ହେଉଛି ବିଶ୍ବର ସର୍ବବୃହତ ଫିଲ୍ମ ସିଟି । ଏହା ଗିନିଜ ବୁକ ଅଫ ରେକର୍ଡ ପକ୍ଷରୁ ପୁରସ୍କୃତ ମଧ୍ୟ ହୋଇସାରିଛି । ପ୍ରତ୍ୟେକ ବର୍ଷ ଏହି ସ୍ଥାନ ପର୍ଯ୍ୟଟକଙ୍କ ପ୍ରଥମ ପସନ୍ଦ ରହିଆସିଛି । କେବଳ ଦେଶ ନୁହେଁ ବରଂ ସମଗ୍ର ବିଶ୍ବରୁ ପର୍ଯ୍ୟଟକମାନେ ଏଠାକୁ ବୁଲିବାକୁ ଆସିଥାନ୍ତି । କେବଳ ପର୍ଯ୍ୟଟନ ନୁହେଁ, ବରଂ ସିନେମା ନିର୍ମାଣ କ୍ଷେତ୍ରରେ ସାରା ବିଶ୍ବରେ ବୈଷୟିକ ଭାବେ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିପାରିଛି ରାମୋଜୀ ଫିଲ୍ମ ସିଟି । ପ୍ରତିବର୍ଷ ବିଭିନ୍ନ ଭାଷାର ପ୍ରାୟ ୨୦୦ ସିନେ ନିର୍ମାତା ନିଜ ସିନେମାର ସୁଟିିଂ ଓ ପରବର୍ତ୍ତୀ ପୋଷ୍ଟ ପ୍ରଡକ୍ସନ କାର୍ଯ୍ୟ ପାଇଁ ଫିଲ୍ମ ସିଟିକୁ ବାଛୁଛନ୍ତି । ବର୍ତ୍ତମାନ ସୁଦ୍ଧା ପ୍ରାୟ ୨,୫୦୦ ସିନେମା ଏଠାରେ ସୁଟିଂ ହୋଇସାରିଲାଣି । ଯାହା ରାମୋଜୀ ଫିଲ୍ମ ସିଟିକୁ ପର୍ଯ୍ୟଟନ ଓ ସିନମା ଜଗତରେ ବିଶ୍ବ ରେକର୍ଡର ଅଧିକାରୀ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
