ମୁମ୍ବାଇ: 2010ରେ ମନ୍ତ୍ରୀ ଥିବା ବେଳେ ପୁଣେର ପୋଲିସ ଲ୍ୟାଣ୍ଡ ନିଲାମ କରି ନିଜର ଜଣେ ପରିଚିତ ବ୍ୟବସାୟୀଙ୍କୁ ପ୍ରଦାନ କରିଥିଲେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାଓ୍ବାର । ଅଜିତଙ୍କ ବିରୋଧରେ ଏପରି ସାଙ୍ଘାତିକ ଅଭିଯୋଗ ଆଣିଛନ୍ତି ପୁଣେର ପୂର୍ବତନ ପୋଲିସ କମିଶନର ମିରା ବୋରୱାନକର । ପୂର୍ବତନ ଆଇପିଏସ ମିରା ସିଧାସଳଖ ଅଜିତଙ୍କ ନାମ ନନେଇ ତାଙ୍କ ଲିଖିତ ପୁସ୍ତକରେ ନିଜ କାର୍ଯ୍ୟକାଳ ସମୟର ଏହି ଅନୁଭୂତିକୁ ଉଲ୍ଲେଖ କରିଛନ୍ତି । ସେତେବେଳେ ସେ ଅଜିତଙ୍କ ଏହି ନିଷ୍ପତ୍ତିକୁ ବିରୋଧ କରିଥିବା ମଧ୍ୟ ଲେଖିଛନ୍ତି ।
ପୁଣେର ପୂର୍ବତନ ପୋଲିସ କମିଶନର ଭାବେ କାର୍ଯ୍ୟ କରିଥିବା ମିରା ବୋରୱାନକର ତାଙ୍କ ଲିଖିତ 'ମ୍ୟାଡାମ୍ କମିଶନର' ଶୀର୍ଷକ ପୁସ୍ତକରେ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିରୋଧରେ ଏହି ଗୁରୁତର ଅଭିଯୋଗ ଆଣିଛନ୍ତି । ବୋରୱାନକର ଅଜିତ ପାୱାରଙ୍କ ନାମ ସିଧାସଳଖ ନେଇ ନେଇନାହାନ୍ତି । ପୁଣେର ତତ୍କାଳୀନ ସଂରକ୍ଷକ (କୌଣସି ଜିଲ୍ଲା ଭିତ୍ତିଭୂମି ପାଇଁ ଥିବା ବିଭାଗ) ମନ୍ତ୍ରୀ 'ଦାଦା' ବୋଲି ନିଜ ପୁସ୍ତକରେ ଉଲ୍ଲେଖ କରିଛନ୍ତି । ଯାହା ପରୋକ୍ଷରେ ଅଜିତଙ୍କୁ ହିଁ ସୂଚାଉଛି ।
ପୁସ୍ତକରେ ଲିଖିତ ଅଭିଯୋଗ ଅନୁସାରେ, 2010ରେ ପୁଣେର ୟେରୱାଡା ସହରରେ ତିନି ଏକର ଜମି ପୋଲିସ କାର୍ଯ୍ୟାଳୟ ଓ କ୍ବାଟର୍ସ ନିର୍ମାଣ ପାଇଁ ରାଜ୍ୟ ସରକାରଙ୍କ ପକ୍ଷରୁ ଆବଣ୍ଟିତ ହୋଇଥିଲା । ମାତ୍ର ଏହାକୁ ତତ୍କାଳୀନ ପୁଣେ ସଂରକ୍ଷକ ମନ୍ତ୍ରୀ ‘ଦାଦା’ ନିଲାମ କରିବାକୁ ନିଷ୍ପତ୍ତି ନେଇଥିଲେ । ସେ ଏହାକୁ ନିଲାମ କରି ନିଜର ପରିଚିତ ବିଲ୍ଡର୍ସଙ୍କୁ ପ୍ରଦାନ କରିଥିଲେ । ସେତେବେଳେ କମିଶନର ଥିବା ଅଧିକାରୀ ମିରା ଅଜିତଙ୍କ ଏହି ନିଷ୍ପତ୍ତିକୁ ବିରୋଧ ମଧ୍ୟ କରିଥିବା ତାଙ୍କ ପୁସ୍ତକରେ ଉଲ୍ଲେଖ କରିଛନ୍ତି ।
ଅଭିଯୋଗକୁ ଅଜିତଙ୍କ ଅସ୍ୱୀକାର :
ତେବେ ଏବେ ଅଭିଯୋଗ ଲୋକଲୋଚନକୁ ଆସିବା ପରେ ବିରୋଧୀ ଦଳ ଅଜିତଙ୍କୁ ଟାର୍ଗେଟ କରିଛନ୍ତି । ଅଜିତ ମଧ୍ୟ ଏହି ଅଭିଯୋଗକୁ ଖଣ୍ଡନ କରିବା ସହ ମିଥ୍ୟା ବୋଲି କହିଛନ୍ତି । ଏବେ ମହାରାଷ୍ଟ୍ର ସରକାରରେ ଉପମୁଖ୍ୟମନ୍ତ୍ରୀ ଥିବା ଅଜିତ ପୂର୍ବରୁ ମଧ୍ୟ ଏକାଧିକ ଥର ମନ୍ତ୍ରୀ ଓ ଭିନ୍ନ ଭିନ୍ନ ମେଣ୍ଟ ସରକାରରେ ଉପମୁଖ୍ୟମନ୍ତ୍ରୀ ମଧ୍ୟ ରହିଛନ୍ତି । ତେବେ ସେତେବେଳେ କାର୍ଯ୍ୟରତ ଥିବା ଜଣେ ବରିଷ୍ଠ ପୋଲିସ ଅଧିକାରୀ ନିଜ ଲିଖିତ ପୁସ୍ତକରେ ଏପରି ଘଟଣାକୁ ବର୍ଣ୍ଣନା କରିବା ପରେ ଅଜିତଙ୍କ ପାଇଁ ସମାଲୋଚନା ବଢିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
