ନୂଆଦିଲ୍ଲୀ: ଭାରତୀୟ କୁସ୍ତିସଙ୍ଘ ଅଧ୍ୟକ୍ଷ ବ୍ରିଜଭୂଷଣ ଶରଣ ସିଂହଙ୍କ ବିରୋଧରେ ସୋମବାରକୁ ୨୩ ଦିନରେ ଧାରଣା ଜାରି ରଖିଛନ୍ତି କୁସ୍ତିଯୋଦ୍ଧା । ଆଜି ଯନ୍ତରମନ୍ତରରେ ପହଞ୍ଚି କୁସ୍ତିଯୋଦ୍ଧାଙ୍କୁ ସାକ୍ଷାତ କରିଥିଲେ ଜମ୍ମୁ ଓ କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲ୍ଲିକ, ଭୀମ ଆର୍ମି ମୁଖ୍ୟ ଚନ୍ଦ୍ରଶେଖର ରାବଣ ଓ ପୂର୍ବତନ କେନ୍ଦ୍ରମନ୍ତ୍ରୀ ତଥା ବିଜେପି ନେତା ବୀରେନ୍ଦ୍ର ସିଂହ । ସେପଟେ ଏକ ସାମ୍ବାଦିକ ସମ୍ମିଳନୀର ଆୟୋଜନ କରି ଦେଶବାସୀଙ୍କ ସମର୍ଥନ ଭିକ୍ଷା କରି ଏକ ଫୋନ୍ ନମ୍ବର ଜାରି କରିଛନ୍ତି ଧାରଣାରତ କୁସ୍ତିଯୋଦ୍ଧା ।
ଆୟୋଜିତ ସାମ୍ବାଦିକ ସମ୍ମିଳନୀରେ ଆନ୍ଦୋଳନରତ କୁସ୍ତିଯୋଦ୍ଧାମାନେ ସୂଚନା ଦେଇ ସୋମବାରଠାରୁ ଦିଲ୍ଲୀରୁ ଏକ ନୂଆ ଅଭିଯାନ ଆରମ୍ଭ ହୋଇଥିବା କହିଥିଲେ । ସନ୍ଧ୍ୟା 6ଟା ସମୟରେ ଦିଲ୍ଲୀର କର୍ନଟ ପ୍ଲେସ୍ ପହଞ୍ଚି ସମର୍ଥନ ମାଗିବାକୁ ସେମାନେ ସୂଚନା ଦେଇଥିଲେ । ସେଠାରେ ସମସ୍ତଙ୍କ ସମ୍ମୁଖରେ ଆମେ ଆମର କଥା କହିବୁ ବୋଲି ବିନେଶ ଫୋଗାଟ କହିଥିଲେ । ତେବେ ଆସନ୍ତା ମେ 21 ତାରିଖରେ ଧାରଣାରତ କୁସ୍ତିଯୋଦ୍ଧାମାନେ ଏକ ବଡ଼ ପଦକ୍ଷେପ ନେଇପାରନ୍ତି । ତେବେ ଏହି ସାମ୍ବାଦିକ ସମ୍ମିଳନୀରେ ମହିଳା କୁସ୍ତିଯୋଦ୍ଧା ସାକ୍ଷୀ ମଲ୍ଲିକ ଏକ ନମ୍ବର ଜାରି କରିଥିଲେ । 9053903100 ନମ୍ବରରେ ମିସ୍-କଲ୍ ଦେଇ କୁସ୍ତି ଯୋଦ୍ଧାଙ୍କ ଆନ୍ଦୋଳନକୁ ସମର୍ଥନ କରିବା ପାଇଁ ସେ ଦେଶବାସୀଙ୍କୁ ଅନୁରୋଧ କରିଛନ୍ତି ।
କୁସ୍ତିଯୋଦ୍ଧାଙ୍କ ଆନ୍ଦୋଳନ ବନ୍ଦ କରିବାକୁ ଅପଚେଷ୍ଟା କରାଯାଉଥିବା ଅଭିଯୋଗ କରି ସେମାନେ କହିଛନ୍ତି, "ଗତକାଲି ରାତିରେ ମଧ୍ୟ ଆମର ଆନ୍ଦୋଳନ ବନ୍ଦ କରିବା ପାଇଁ ଚେଷ୍ଟା କରାଯାଇଥିଲା । ତେବେ ଆମେ ଚିଠି ଲେଖି ଅନ୍ତର୍ଜାତୀୟ ଅଲିମ୍ପିଆନ୍ଙ୍କୁ ସମର୍ଥନ ମାଗିବୁ । ନ୍ୟାୟ ନମିଳିଲେ ଆମର ଆନ୍ଦୋଳନକୁ ଯନ୍ତରମନ୍ତରରୁ ବାହାରକୁ ମଧ୍ୟ ନେବୁ । ଏହି ଲଢ଼େଇ କେବଳ ଆମର ନୁହେଁ । ଏହା ଦେଶର ଲଢ଼େଇ, ମହିଳା ଓ ଖେଳକୁ ବଞ୍ଚାଇବାର ଲଢ଼େଇ । ତେବେ ଏହି ନୂଆ ଅଭିଯାନ ଆମେ ଦିଲ୍ଲୀର କନ୍ନୌଡ଼ ପ୍ଲେସରୁ ଆରମ୍ଭ କରିବୁ । ଏଥିପାଇଁ ଆମକୁ ପୁରା ଦେଶବାସୀଙ୍କର ସମର୍ଥନ ଆବଶ୍ୟକ । ଏଥିରେ ଆମେ ରାଷ୍ଟ୍ରପତି, ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କ ନାଁରେ ପ୍ରତି ଜିଲ୍ଲା ମୁଖ୍ୟାଳୟରେ ଚିଠି ଦେବୁ ।"
ଏନେଇ ମହିଳା କୁସ୍ତିଯୋଦ୍ଧା ବିନେଶ ଫୋଗାଟ ଆହୁରି କହିଛନ୍ତି, "ଆଜି ସନ୍ଧ୍ୟାରେ ଆମେ ଦିଲ୍ଲୀର କନ୍ନୌଡ଼ ପ୍ଲେସ୍ ଯିବୁ । ଏହା ସହିତ ଦିଲ୍ଲୀର ଅନ୍ୟ ସ୍ଥାନକୁ ଯାଇ ମଧ୍ୟ ଲୋକଙ୍କର ସମର୍ଥନ ଲୋଡ଼ିବୁ । ଭାରତୀୟ ଅଲିମ୍ପିକ ସଂଘର ଯେତେ ଖେଳାଳୀ ରହିଛନ୍ତି, ଆମେ ସେମାନଙ୍କୁ ମଧ୍ୟ ପତ୍ର ଲେଖି ସମର୍ଥନ ମାଗିବୁ । ବ୍ରିଜଭୂଷଣ ଶରଣ ସିଂହ ଗିରଫ ନହେବା ପର୍ଯ୍ୟନ୍ତ ଆମ ଲଢ଼େଇ ଆଗକୁ ମଧ୍ୟ ଜାରି ରହିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
