ନୂଆଦିଲ୍ଲୀ: ଉତ୍ତର ପ୍ରଦେଶ, ଉତ୍ତରାଖଣ୍ଡ, ମଣିପୁର ଓ ଗୋଆ ସମେତ ୪ ଟି ରାଜ୍ୟରେ ବିଜେପି ସରକାର ଗଠନ କରିବାକୁ ଯାଉଛି । ବର୍ତ୍ତମାନ ସୁଦ୍ଧା ଆସିଥିବା ଲିଡ୍ ଏବଂ ଟ୍ରେଣ୍ଡକୁ ଦେଖିଲେ ୪ ଟି ରାଜ୍ୟରେ ଦଳର ବିଜୟ ସମ୍ଭାବନା ବଢିଯାଇଛି । ତେବେ ବିଜୟ ପରେ ଆଜି ଦଳୀୟ ମୁଖ୍ୟାଳୟ ଯାଇ ଦଳର ନେତା, କର୍ମୀଙ୍କୁ ସମ୍ବୋଧିତ କରିବେ ପ୍ରଧାନମନ୍ତ୍ରୀ ମୋଦି । ସଂଧ୍ୟା ୬ ଟାରେ ପ୍ରଧାନମନ୍ତ୍ରୀ ନିଜ ବାସଭବନରୁ ସିଧା ବିଜେପି ମୁଖ୍ୟାଳୟରେ ପହଞ୍ଚିବେ ।
ପ୍ରଧାନମନ୍ତ୍ରୀ ମୋଦି ଦଳୀୟ ମୁଖ୍ୟାଳୟରେ ପହଞ୍ଚିବା ପରେ ସେଠାରେ ଥିବା ଦିବଂଗତ ଦଳୀୟ ନେତାଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଦେବେ। ପରେ ପ୍ରଧାନମନ୍ତ୍ରୀଙ୍କୁ ଦଳ ପକ୍ଷରୁ ସ୍ବାଗତ କରାଯିବା ସହ ଦଳର ବିଜୟ ପାଇଁ ଧନ୍ୟବାଦ ଦିଆଯିବ ।
ପରେ ପ୍ରଧାନମନ୍ତ୍ରୀ ମୋଦି ଦଳୀୟ ନେତା କର୍ମୀଙ୍କୁ ସମ୍ବୋଧିତ କରିବେ । ଏହି ବିଜୟ ଉତ୍ସବରେ ଗୃହମନ୍ତ୍ରୀ ଅମିତ ଶାହା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବିଜେପି ଅଧ୍ୟକ୍ଷ ଜେପି ନଡ୍ଡା, ଏକାଧିକ କେନ୍ଦ୍ରୀୟ ମନ୍ତ୍ରୀ, ସାଂସଦ ବିଧାୟକ ନେତା କର୍ମୀ ସାମିଲ ହେବେ । ଯାହାର ପ୍ରସ୍ତୁତି ଶେଷ ହୋଇଛି ।
ସୂଚନାଯୋଗ୍ୟ ଆଜି ଆସିଥିବା ୫ ଟି ରାଜ୍ୟ ବିଧାନସଭା ନିର୍ବାଚନ ଫଳାଫଳରେ ବିଜେପିକୁ ବଡ ସଫଳତା ମିଳିଛି । ଦଳ ୟୁପିରେ ୨୬୪ ଆସନରେ ବିଜୟ ଅଭିମୁଖେ ଅଗ୍ରସର ହେଉଥିବା ବେଳେ, ସପା ୧୨୯ ଆସନରେ ଆଗୁଆ ରହିଛି । ସେହିପରି ବିଜେପି ଉତ୍ତରାଖଣ୍ଡରେ ୪୭ ଟି ଆସନରେ ଆଗୁଆ ଥିବାବେଳେ, ମଣିପୁରରେ ମଧ୍ୟ ୨୫ ଟି ଆସନରେ ବିଜୟୀ ହୋଇସାରିଛି । ଏହାବାଦ ଗୋଆରେ ମଧ୍ୟ ଦଳ ବହୁମତ ପାଇବା ଏକ ପ୍ରକାର ସ୍ପଷ୍ଟ ହୋଇ ସାରିଛି ।
@ANI
